ޓީޗަރުންގެ މުސާރަ ބޮޑުކުރާތީ ރާއްޖޭގެ ޕްރައިވެޓް ސްކޫލްތަކުގެ ފީ ވެސް ބޮޑުކުރަން ފަށައިފި އެވެ.
މި ބަދަލު ގެންނާތީ ރާއްޖޭގެ އެކި ހިސާބުތަކުގައި ހިންގާ ޕްރައިވެޓް ސްކޫލްތަކުން އެކަން އެޑިއުކޭޝަން މިނިސްޓްރީއާ ވެސް ހިއްސާކޮށް، ޕްރައިވެޓް ސްކޫލްތަކުގެ ދަރިވަރުންގެ ބެލެނިވެރިންގެ ސަމާލު ކަމަށް ވެސް އެކަން ގެނެސްފައިވެ އެވެ.
ރާއްޖޭގައި ގިނަ އަދަދަކަށް ޕްރައިޓް ސްކޫލްތައް ވެސް ހިންގާ އިރު ފީ އަށް ބަދަލު ގެންނަން ނިންމީ ސަރުކާރުގެ ސްކޫލްތަކުގެ ޓީޗަރުންގެ މުސާރަ ވެސް ބޮޑުކުރަން ނިންމުމާ ގުޅިގެން، އެ ބަދަލާ އެކު ޕްރައިވެޓް ސްކޫލްތަކުގެގެ މުސާރަ ވެސް ބޮޑުކުރަން ސްކޫލްތަކުން މަސައްކަތްކުރާތީ އެވެ. އަދި މި ބަދަލަކީ ޓީޗަރުން ހޯދަން ދަތިވެދާނެތީ ގެންނަ ބަދަލެއް ކަމަށް ވެސް އެނގިފައިވެ އެވެ.
ބައެއް ސްކޫލްތަކުން މިހާރު އަންނަނީ ޓީޗަރުންގެ މުސާރަ އާއި ދަރިވަރުންގެ ފީއަށް ގެންނާނެ ބަދަކުތަކާ ގުޅޭ ގޮތުން މަޝްވަރާކޮށް އޮނިގަނޑު ވެސް އެކުލަވާލަމުންނެވެ. އެނގިފައިވާ ގޮތުގައި ބައެއް ސްކޫލްތަކުން ނިންމާފައި ވަނީ މި އަހަރުގެ ދިރާސީ އާ އަހަރު އޮގަސްޓްގައި ފެށޭ އިރު، އާ ފީއާ އެކީ ކިޔެވުން ފެށުމެވެ
އައްޑޫ ބިލަބޮން ސްކޫލްގެ ގެ ޕްރިންސިލަޕް އައިމިނަތު އަޒުރާ "އައްޑޫ ލައިވް" މިއަދު ވިދާޅުވީ ޓީޗަރުންންގެ މުސާރަ އާއި ދަރިވަރުންގެ ފީ އަށް އެއްވެސް ބަދަލެއް ގެންނަން އަދި މިހާތަނަށް ނިންމާފައި ނެތް ކަމަށެވެ.
"އެކަމަކު އެކަހަލަ މަޝްވަރާތަކެއް ކުރެވެމުން އެބަދޭ." އޭނާ ވިދާޅުވި އެވެ.
އަޒުރާ ވިދާޅުވި ގޮތުގައި އެފަދަ ބަދަލުތަކެއް ގެންނަ ނަމަ ގެންނާނީ ކަމާ ގުޅުން ހުރި ހުރިހާ ފަރާތްތަކަކާ އެކީ މަޝްވަރާ ވެސް ކުރުމަށް ފަހު އެވެ.
މިކަމާ ބެހޭ ގޮތުން އައްޑޫ ހިރާ ސްކޫލްގެ މެނޭޖްމަންޓްގެ ބަހެއް ރަސްމީކޮށް އަދި ލިބޭ ގޮތެއް ނުވެ އެވެ. އެކަމަކު ސްކޫލްގެ މެނޭޖްމަންޓުން ވަނީ މިކަމާ ގުޅޭ ގޮތުން ބެލެނިވެރިންނާ ބައްދަލުކޮށްފަ އެވެ. ބެލެނިވެރިޔަކު ބުނި ގޮތުގައި ހިރާގެ މެނޭޖްމަންޓުން މަސައްކަތްކުރަނީ ދަރިވަރުންގެ ފީ ބޮޑުނުކޮށް، ޓީޗަރުންގެ މުސާރަ އަށް ބަދަލުތަކެއް ގެންނަން ސަރުކާރުގެ އެހީ ހޯދުމަށެވެ.
"އެހެންވެ އެކަމުގެ ޕެޓިޝަނެއްގައި ބެލެނިވެރިންގެ ސޮއި ހޯދަމުން އަންނަނީ." ބެލެނިވެރިޔަކު ބުންޏެވެ.
އެޑިއުކޭޝަން މިނިސްޓްރީން ބުނި ގޮތުގައި ޕްރައިވެޓް ސްކޫލްތަކުން ފީ ބޮޑުކުރިޔަސް މިހާރު ނަގަމުން އަންނަ ފީއަށް ވުރެ ފަސް ޕަސެންޓް ބޮޑުކޮށްގެން ނުވާނެ އެވެ. އަދި ދިރާސާ އަހަރު ފެށޭ ފަހުން ފީ ބޮޑުނުކުރެވޭނެ ކަމަށް ވެސް ބުންޏެވެ.