(ފެބްރުއަރީ 27، 2014 ވަނަ ދުވަހުގެ ބަޔާ ގުޅޭ)
މި ފާލަން ހެދުމަށް ބިންގާ އަޅުއްވައި ދެއްވީ މާޗް 30، 1981 ގައި އިލްޔާސް އިބްރާހީމެވެ. މި ފާލަން ހުޅުވީ ސެޕްޓެމްބަރު 29، 1981 ގަ އެވެ. ތިމާވެށްޓާ "ރުޅިވެރި ގޮތަކަށް" ފަރުންނާއި ފަޅުން ގަލުން ހެދިޔަސް މި ފާލަމުގެ މި ދެ ރަށް ދޭތެރޭގެ މޫދުން އޮއިދެމޭ ވަރު ބަންދުކޮށްގެން މި ހެދި ދިގު ފާލަމުގެ ސަބަބުން އިސާހިތަކު ރަށްރަށަށް އުދަ އެރުމާއި ރަށް ގިރުން ފަދަ ތިމާވެށީގެ ނާޒުކު މުސީބާތްތަކާ ކުރިމަތިވާން ފެށި އެވެ.
ގަމާއި ފޭދު އާއި ދޭތެރޭގައި މި ވާ ފާލަން ވަނީ ދެވަނަ ބޮޑު ހަނގުރާމައިގެ ދުވަސްވަރު އިނގިރޭސީން ދަތުރު ކުރުމަށް މި ދެ ރަށް ދޭތެރޭގައި އަޅާފައިވާ ކޯޒްވޭމަތީގަ އެވެ. އެ ދުވަސްވަރު ފާލަން އޮތީ އޮއި ދައުރު ކުރާނެހެން ތިމާވެށްޓާ ރައްޓެހި ގޮތަކަށެވެ.
ކޮންކްރީޓް ބުޑުތަކެއްގެ މަތީގައި ބީމާއި ލަކުނޑި ފިލާ އަޅައިގެން 1942 ވަނަ އަހަރު ހެދި މި ކޯޒްވޭގެ ކޮންކްރީޓްތައް ވަނީ އަލުން މި ހެދި ފާލަމުގެ އެތެރޭގަ އެވެ. މި ފާލަމުގެ ސަބަބުން ދަތުރުފަތުރުގެ ފަސޭހަ މަގު ހުޅުވިގެން ދިޔަ އެވެ. ހިތަދޫ ކޯއްޓޭން ގަމުގެގެ ކޮޅަށް ދަތުރު ކުރެވެ އެވެ. ދިގު މިނުގައި 19 ކިލޯ މީޓަރުގެ މި މަގަކީ ރާއްޖޭގައި ދަތުރު ކުރެވޭ އެންމެ ދިގު މަގަށް ވެގެން ދިޔަ އެވެ.
* ވައިގެ ދަތުރު މާލޭން ގަމަށް
އައްޑޫގައި ފެކްޓްރީތައް ހުޅުވި ހިނގައިގަތުމާ ގުޅިގެން އަތޮޅުގެ އާންމު ހާލަތު ރަނގަޅު ވަމުން ދިޔަ އެވެ. މުސާރަ ކިތަންމެ ކުޑަ ނަމަވެސް މީހުން ހަމަޖެހިގެން ދިރިއުޅެމުންދާ ތަން ފެނުނެވެ. ނަމަވެސް 12 ވަރަކަށް އަހަރު ފަހުން ގަމުގައި ހިންގަމުން ދިޔަ ފެކްޓްރީތައް ވަނީ ހުއްޓުމަކަށް އައިސްފަ އެވެ.
ފެކްޓްރީތައް އޯޑަރުތަކަށް މަސައްކަތް ކުރުން މަދުވަމުން ގޮސް މަސައްކަތް މުޅިންހެން ހުއްޓުނެވެ. ބޭރު މީހުން މަޑުމަޑުން އެ މީހުން ގައުމަށް ފޮނުވައި، ދިވެހިންނަށް ވެސް އެކިއެކި ބަހަނާތައް ދައްކައި ވަޒީފާތަކުން ވަކި ކުރަމުން ދިޔަ އެވެ. ތިބި ބޭރު މީހުންނަށް ވެސް މުސާރަ ނުދީ ހިފަހައްޓަމުން ދިޔަ އެވެ.
މަސައްކަތް ނެތުމުން ފައިސާ އާއި ލޯންތައް ނުލިބުމުން ހަމައެކަނި މަހު މުސާރަ އަށް ބަރޯސާވެގެން އިތުރު ގަޑީގެ ތިބެވޭ ވަރު ނުވާތީ ބައެއް މީހުން ވަޒީފާ ދޫކޮށް އަނެއްކާވެސް މާލެ އާ ދިމާއަށް މިސްރާބް ޖެހި އެވެ.
މިފަދައިން ކަންތައްތައް ހިނގަން ފެށުމުން ސިލްވަ ލައިން ގާމެންޓް ފެކްޓްރީ ސަރުކާރާ ހަވާލު ކުރެއްވުމަށް އެ ފެކްޓްރީގެ މެނޭޖްމަންޓަށް މުއްދަތެއް ދެއްވައި، އެކަން ވެސް އެގޮތަށް ނުހިނގުމުން މި ފެކްޓްރީގެ މައްސަލަ ޓްރޭޑް މިނިސްޓްރީން ކޯޓަށް ހުށަހެޅުއްވި އެވެ. އެއީ 1994 ވަނަ އަހަރުގެ އެޕްރީލް މަހުގެ ތެރޭގަ އެވެ.
ސަރުކާރަށް ފެކްޓްރީ ނެންގެވުމަށް އެތަން ހަވާލު ކުރައްވާނެ ފަރާތެއް ހޯއްދެވުމުގެ މަސައްކަތް ކުރައްވަމުން ގެންދަވާ ކަމަށް ޓްރޭޑް މިނިސްޓަރު ޔާމީން ވިދާޅުވި އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސްކުރަމެވެ.