ކުރިއަށް އޮތް ރައްޔިތުންގެ މަޖިލީހުގެ ސ. ފޭދޫ ދާއިރާގެ ގޮނޑި އަށް ރައްޔިތުން އޭނާ ހޮވައިފި ނަމަ މަސައްކަތް ކުރައްވާނީ ޒިންމާދާރުކަމާއި އިހުލާސްތެރިކަމާ އެކު ކަމަށާއި އަދި މަޖިލިސް ތެރޭގައި ރައްޔިތުން ލަދު ގަންނަ ފަދަ ގޮތަކަށް ނޫޅުއްވާނެ ކަަމަށް ޕީޕީއެމް ޓިކެޓްގައި ވާދަ ކުރައްވާ އިބްރާހީމްދީދީ (އައިބީ) ވިދާޅުވެއްޖެ އެވެ.
އޭނާގެ ކެމްޕޭން ލޯންޗް ކުރަން ރޭ ފޭދޫ ބަނދަރުމަތީގައި ބޭއްވި ކުލަ ގަދަ ހަފުލާގައި އައިބީ ވިދާޅުވީ އޭނާ އަބަދު ވެސް މަސައްކަތް ކުރައްވާނީ ރައްޔިތުންގެ ހައްގުގައި، ރައްޔިތުންގެ ބޭނުންތައް ދަނެގެން ކަމަށެވެ. އަދި އޭނާއަކީ ޕާޓީ ބަދަލު ކުރައްވާނެ މީހެއް ނޫން ކަމަށް ވެސް ވިދާޅުވި އެވެ.
އެގޮތުން ފޭދޫގެ ރައްޔިތުންނަށާއި މުޅި އައްޑޫގެ ރައްޔިތުންނަށް ބޭނުންވާ ކަންކަން ހާސިލް ކުރައްވަން މަސައްކަތް ކުރައްވާނެ ކަމަށް ވިދާޅުވި އެވެ.
އޭގެ ތެރޭގައި ސިއްހީ ހިދުމަތާއި ފެނާއި ނަރުދަމާ އަދި ތައުލީމީ ދާއިރާގައި މަސައްކަތް ކުރައްވާ ޓީޗަރުން ފަދަ މުވައްޒަފުންނަށް ލިބެންވާ ފުރިހަމަ ހައްގުތައް ހޯދައި ދެއްްވުމަށް މަސައްކަތް ކުރައްވާނެ ކަމަށް އައިބީ ވިދާޅުވި އެވެ. އަދި އެކަން އޭނާ ހާސިލް ކުރައްވަން މަސައްކަތް ކުރައްވާނީ މިނިސްޓަރު ވެސް ޒިންމާދާރު ކުރުވައިގެން ކަމަށް ވިދާޅުވި އެވެ.
އައިބީ ވިދާޅުވީ ފޭދޫ ރައްޔިތުން އޭނާ އަށް ވޯޓް ދޭން ޖެހޭ ގިނަ ސަބަބުތަކެއް އެބަ ހުރި ކަމަށެވެ. އޭގެ ތެރޭގައި އޭނާއަކީ އަބަދު ވެސް ރަށުގައި އުޅޭ. ރަށުގެ އާންމު ހާލަތު ގާތުން ފެނިވަޑައިގަންނަވާ އަދި ރަށުގެ އުމުރުފުރައެއްގެ ބަޔަކާ އަބަދު ވެސް ގާތްގުޅުމެއް ބާއްވައި ރައްޔިތުންގެ ހާލު އަހުވާލު ބެއްލެވޭނެ ބޭފުޅަކަށްވުން ހިމެނޭ ކަމަށް ވިދާޅުވި އެވެ.
އަދި އޭނާއަކީ މަޖިލީހުގައި ފޭދޫ ދާއިރާގެ ގޮނޑި ތަމްސީލް ކުރައްވަން އެންމެ އެކަށީގެންވާ ކެންޑިޑޭޓް ކަމަށް ވެސް ވިދާޅުވި އެވެ.
ޑިފެންސް މިނިސްޓަރު މުހައްމަދު ނާޒިމް ޝަރަފުވެރިކޮށް ދެއްވައި، ލޯންޗްކޮށް ދެއްވި އައިބީގެ ކެމްޕޭނު ލަވަ ވެސް ރޭ ވަނީ އާންމުކޮށްފަ އެވެ. އަދި އޭނާ އާ ބެހޭ ޕްރެޒެންޓޭޝަނެއް ވެސް ހުށަހަޅާފައިވެ އެވެ. އޭގައި އޭނާ އާ ދޭތެރޭ ފޭދޫގެ ބައެއް މީހުން ފާޅުކޮށްފައިވާ ހިޔާލުތައް ވެސް ހިމެނެ އެވެ.
ކެމްޕޭން ހަފުލާ އޮތް ތަނަށް އައިބީ ވަޑައިގަތީ ބޮޑު ބެރު ހަރަކާތަކާ އެކު ބަނދަރުމަތީގައި ހަދާފައިވާ ސްޓޭޖް ސަރަހައްދަށް ލިންކް ރޯޑުން ހިންގަވާފަ އެވެ.