މިދިޔަ މަހުގެ 25 އިން މި މަހުގެ ނުވަ ވަނަ ދުވަހާ ހަމައަށް ހޮންކޮންގުގައި ބާއްވަން ތާވަލް ކުރި ރޯވިން ކޮމްޕެޓިޝަން ނުވަތަ ފަލި ޖެހުމުގެ މުބާރާތުގައި އައްޑޫން ހަތަރު ކުއްޖަކު ބައިވެރިވާ ގޮތަށް ހަމަޖެހިފައި ވަނިކޮށް އެ ދަތުރު ކެންސަލްވެއްޖެ އެވެ.
މި މުބާރާތަށް އައްޑޫން ހޮވިފައި ވަނީ ހިތަދޫ ސްކޫލްގެ އައިޝަތު ނައުފާ އާއި އަލީ މުސެއިދު އަޙްމަދު ސައީދުގެ އިތުރުން ޒުރާރު ސަލާހެވެ.
މި މުބާރާތަށް ކުދިން ހޮވުމުގެ ގޮތުން ރޯވިން އެސޯސިއޭޝަނުން އައްޑޫގައި ވަނީ މިދިޔަ ޑިސެމްބަރު މަހު "އައްޑޫ ސިޓީ ފެސްޓިވަލް އޮފް ރޯވިން" ގެ ނަމުގައި މުބާރާތެއް ވެސް ބާއްވައިފަ އެވެ.
ަެއެހެން ނަމަވެސް މުބާރާތުގައި ބައިވެރިވާން ދިއުމަށް ހުރިހާ ތައްޔާރީތަކެއް ވެފައި ވަނިކޮށް، ދަތުރު ކެންސަލްވުމުން ބެލެނިވެރިން ތިބީ ވަރަށް ބޮޑަށް ހިތްހަމަނުޖެހިފަ އެވެ.
"އައްޑޫ ލައިވް" އާ ވާހަކަ ދެއްކި ބެލެނިވެރިއަކު ބުނީ ދަތުރު ކެންސަލްވާން ދިމާވީ، ހޮންކޮންގަށް ދަރިވަރުންނާ އެކު ދާން، ބެލެނިވެރިއަކު ކުރިން ހަމަޖައްސާފައި ވަނިކޮށް، ރޯވިން އެސޯސިއޭޝަންގެ މެމްބަރަކު ދާ ގޮތަށް ނިންމުމުން ކަމަށެވެ.
'ކޮންމެ ގޮތެއް ވިޔަސް ޕޭރަންޓަކާ އެކު ކުދިން ދިޔައި ހުރިހާ ގޮތަކުން ވެސް ރަނގަޅު ވާނެ ކަމަށް ބަލާފައި އެގޮތަށް ނިންމީ. އެހެން ނަމަވެސް ފަހު ވަހުތު އެސޯސިއޭޝަންގެ މެމްބަރަކު ދާ ކަަހަލަ ގޮތަކަށް ވާހަކަ ދެކެވެން ފެށީމާ މީތި ކުރިއަށް ނުގޮސް އެންމެ ފަހުން ކެންސަލް މިވީ،" ބެލެނިވެރިއަކު ބުންޏެވެ. "ހުރިހާ ތައްޔާރީތަކެއް ވެސް ވެފައި ވަނިކޮށް މިހެން ދިމާވީމަ ވަރަށް ދެރަ."