(މާޗް 1، 2014 ވަނަ ދުވަހުގެ ބަޔާ ގުޅޭ)
ފެކްޓްރީތަކުގެ ބޮޑު އިންޑަސްޓްރީއެއް ގަމަަށް ގެނެވުނީ ވެސް މިފަދަ ގޮތަކަށް އައްޑޫގެ ރައްޔިތުންނަށް ގަން ހިންގަވާ ދެއްވަން ވަރަށް މަސައްކަތް ކުރައްވާ ކާޅެއް ނުފެނި ދިޔަ ދުވަސްވަރެއްގަ އެވެ. ގަން ބޭރު ބަޔަކަށް ވިޔަފާރީގެ އުސޫލުން ހިންގެވުމަށް ކުއްޔަށް ދެއްވަން ނިންމެވުމާ ގުޅިގެން ގަން ބަލަން ބޭރުގެ އިންވެސްޓަރުން އަންނަމުން ދިޔަ އެވެ.
ރައީސް މައުމޫން ވެރިކަމާ ހަވާލުވެ ވަޑައިގަތީއްސުރެ އައްޑޫ ރައްޔިތުންނާއި ދިވެހި ރާއްޖެ އަށް އެންމެ ފައިދާ ހުރި ގޮތަކަށް ބޭރު ބަޔަކަށް ގަން ކުއްޔަށް ދެއްވުމަށް ދިވެބި ސަރުކާރުން ދޔައީ ކެނޑިނޭޅި މަސައްކަތް ކުރައްވަމުންނެވެ.
ނަމަވެސް ގަން ހަވާލު ކުރައްވާނެ، ސަރުކާރަށް އިތުބާރު ކުރެވޭ ފަދަ ރަނގަޅު ފަރާތެއް ލިބިވަޑައެއް ނުގެންނެވި އެވެ.
ވީމާ ގަމަށް އިންވެސްޓް ކުރާނޭ އެފަދަ ރަނގަޅު ފަރާތެއް ހޯދަން ބަލަބަލާ ތިބެވޭކަށް ނެތެވެ. އައްޑޫގެ ހާލަތު އެއް ދުވަހުން އަނެއް ދުވަހަށް ގޯސްވަމުންދާ ކަމަށް ފެނިވަޑައިގެން ވީހާ އަވަހަށް މަސައްކަތެއް ފެށުން މުހިއްމުވި އެވެ.
ކުރެވެން އޮތް މަސައްކަތެއް ފަށައި، އައްޑޫގެ ވީހާ ވެސް ގިނަ ބަޔަކަށް ވަޒީފާގެ ފުރުސަތު ހޯއްދަވައި ދެއްވުން އެއީ އެ ވަގުތަށް އެެންމެ ރަނގަޅު ގޮތް ކަމަށް ނިންމެވި އެވެ.
* އީކްއޭޓަ ވިލެޖް: ގަމުގެ ސިޓީ ހޮޓާ
ލޮކޭޝަން: 400 ކިލޯމީޓަރު (މާލެ އާ)
ކެޕޭސިޓީ: 79 ކޮޓަރި
ކުޅިވަރު: ޑައިވިން ސްކޫލް، ސްކްއަޝް، ޓެނިސް، ޓޭބަލް ޓެނިސް
ހިދުމަތް: ސްވިމިންޕޫލް، ލައުންޖް ބާ، ޓީވީ ރޫމް، ސްޕާ، ބައިސްކަލް ޓުއާ
އައްޑޫގެ މަޝްހޫރު ވިޔަފާރިވެރިޔާ މުހައްމަދު ސައީދު ބަނގުރޫޓް ވުމެވެ. ރާއްޖޭގެ ފަތުރުވެރިކަމުގެ މޭސްތިރިން ކަމަށްގާ ހިކިފިނިފެންމާގޭ އާއިލާގެ ބޭފުޅުން ވިޔަފާރި ދޫކޮށްލެއްވި ތަނެވެ. ގަމުގެ އީކްއެޓާ ވިލެޖެވެ. އައްޑު އަށް ފަތުރުވެރިކަން ގެނައުމަށް އެޅުއްވި ބިންގަލެވެ.
އައްޑޫ ޑިވެލޮޕްމަންޓް އޮތޯރިޓީ (އޭޑީއޭ) ގެ ވައިސް ޗެއާމަންގެ މަގާމުގައި ހުންނަވައިގެން މައިޒާން އާދަމް މަނިކުގެ އިސް ނެންގެވުމުގެ މަތިން ފެއްޓެވި މި ސިޓީ ހޮޓާ ތަރަައްގީ ކުރެވުނީ އިނގިރޭސީން ގަމުގައި ތިބި ދުވަސްވަރު އާރްއޭފްގެ ސާޖަންޓް ކުއާޓަރަށް ބޭނުން ކުރި ސަރަހައްދުގަ އެވެ. ހަމަ އެ އިމާރާތްތަކެވެ. އެ ކޮޓަރިތަކެވެ. އެ މީހުންގެ މެސް އާއި ބާ އެވެ.
މި ހޮޓާ ވަނީ ގަމުގެ އެެއާޕޯޓުން ފަސޭހައިން ހިނގާފައި އާދެވޭހާ ހިސާބުގަ އެވެ. މިތަނަށް ހިލޭ ދޫކުރެވިފައިވާ ގަމުގެ ފެނާއި ނަރުދަމާ ނިޒާމުގެ ސަބަބުން ފަސޭހަވެފައި ހަރަދު ކިތަންމެ ކުޑަވި ނަމަވެސް، ކަރަންޓް ބޭނުން ކުރާ އައްޑޫގެ ޔުޓިލިޓީ ކަރަންޓް ބިލް ވަރަށް ބޮޑެވެ.
ފަތުރުވެރިންނަށް މިތަން އެންމެ ހިތްގައިމީ އައްޑޫގެ ދެކުނުގެ ބިތުގެ ގުޅާލެވިފައިވާ ރަށްތަކުގެ ތެރެއިން، ދިވެހިންގެ ދިރިއުޅުން ބަލާލުމަށް ދަތުރު ކުރެވެން އޮންނަ ފަސޭހަކަމުންނެވެ. އެ އަށް ވުރެ ވެސް ބޮޑަށް އައްޑޫގެ ޑައިވިން ސައިޓްތައް ރީތިކަމާއި ނަލަކަމުންނެވެ.
މި ހުރިހާ ކަމަކަށް ވުރެ ވެސް ބޮޑަށް އައްޑޫ މީހުން މިތާނގެ ވާހަކަ ދައްކައި އުޅެނީ މިތާގެ ދިގު ފަސްމަތާ ގުޅިފައިވާ ހިތި ހަނދާންތަކަކާ އެކުގަ އެވެ. އާދެ! އެއީ މި ވާހަކަތަކެވެ.
މަރުހޫމް މުހައްމަދު ސައީދު ފަތުރުވެރިކަމުގެ ވިޔަފާރީގައި ކުރި ހޯދާފައިވާ އަލްޓާފް ކޮމްޕެނީގެ ވިޔަފާރީން ވަކިވެގެން އެނބުރި އައްޑު އަށް އައީ ވަރަށް ފޮނި އުންމީދުތަކަކާ އެކުގަ އެވެ. އެއީ 1984 ގައި އޭޑީއޭ އިން ކުއްޔަށް ދޫކުރި ގަމުގެ މި ސިޓީ ހޮޓާ-ހޮލިޑޭ ވިލެޖް (މިހާރުގެ އީކްއޭޓާ) އޭނާ އަށް ލިބުމުންނެވެ.
އެއީ ކާމިޔާބް ވިޔަފާރިއަކަށް ހެދިދާނެ ކަމުގެ އުންމީދުގަ އެވެ. މިތަނުން އައްޑޫގެ ވަރަށް ގިނަ ބަޔަކަށް ވަޒީފާގެ ފުރުސަަތު ދެވިދާނެ ކަމުގެ ހިތްހަމަޖެހުމުގަ އެވެ. އޭގެ ސަބަބުން އަނބިދަރިންނާއ ވަކިވެގެން މާލެ އާއި ރިސޯޓްތަކުގައި ވަޒީފާ އަދާ ކުރަން މަޖުބޫރުވެފައިވާ އެތައް ހާސް ބައެއްގެ ތެރެއިން މަދު ބަޔަކަށް ނަމަވެސް އެނބުރި އާދެވިދާނެތީ އެވެ.
އެ މީހުންނާ އާއިލާތަކާ އެކު ދިރިއުޅުމުގެ ފަަސޭހަ ހޯދައި ދެވިދާނެތީ އެވެ. އެއީ އަބަދުވެސް މުހައްމަދު ސައީދު ދެކެމުން އައި ހުވަފެނެކެވެ. ހޮލިޑޭ ވިލެޖް ހުޅުވުނީ މެއި 23، 1984 ގަ އެވެ.
"ގަމުގެ ހޮލިޑޭ ވިލެޖް ހޮޓާ ކުއްޔަށް ހިފި އިރު އަޅުގަނޑަށް އެނގިފައި އޮތީ، އިންޑިއާ އެއާލައިންގެ ދެ ދަތުރު (ހަފުތާއަކު) ގަމާއި ހުޅުމާލެ އާއި ގަމާ ދެމެދު ކުރާ ދަތުރު އޮންނާނެ ކަމަށް. އެކަން ހަމަޖެހޭނެ ކަމަށް. ނަމަވެސް މިތަން ހިފައި ހުރިހާ ކަމެއް ނިމުމުން އެނގުނީ ގަމާއި މާލެ އާއި ދެމެދު ކުރަން ރޭވި ރޭވިފައިވާ އިންޑިއަން އެއާލައިންގެ ދަތުރުތައް އޮޕަރޭޓް ކުރާ ގޮތަކަށް ނޫންކަން އޮތީ. ވާހަކަ ދެކެވިފައިވާ ގޮތަށް މިކަން ހަމަނުޖެހުނީ ކީއްވެގެން ކަމެއް ނޭނގޭ އެއްގޮތަކަށް ވެސް،" މުހައްމަދު ސައިދު ކިޔައި ދިނެވެ.
މި ވާހަކައިގެ ތެދުކަން ބަޔާންކޮށް މައިޒާން އާދަމް މަނިކު މިއަށް ވުރެ ވެސް ތަފުސީލްކޮށް މި ވާހަކަ ކިޔުއްވައިު ދެއްވި އެވެ.
"މުހައްމަދު ސަައީދަށް ޕްރޮމިސް ކުރީ (ޔަގީންކަން) އަޅުގަނޑުގެ ކުރިމަތީގައި. އޭނާ (މުހައްމަދު ސައިދު) ކުއްޔަށް ހިފާފައިވާ ގަމުގެ ހޮލިޑޭ ވިލެޖަށް ޓޫރިސްޓުން ގެނައުމަށް އިންޑިއަން އެއާލައިންސްގެ ދަތުރުތައް (ގަމަށް) ހަމަޖައްސައި ދެއްވާނެ ކަމަށް."
އާދަމް މަނިކަކީ އެ ދުވަސްވަރު ގަމާއި އައްޑޫގެ ތަރައްގީ ކުރަން އުފެއްދި އޭޑީއޭގެ ވައިސް ޗެއާމަންގެ މަގާމުގައި ހުންނަވައިގެން ހޮލިޑޭ ވިލެޖް ތަރައްގީ ކުރެއްވުމަށް އިސް ނެންގެވި މޭސްތިރި އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސްކުރަމެވެ.