އަންހެނުންކީ ގައުމު ބިނާ ކުރުމުގައި ވަރަށް މުހިއްމު ދައުރެއް އަދާ ކުރާ ބައެއް ކަމަށާއި ކުރިއަަށް އޮތް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ގޮނޑި އަށް ރައްޔިތުން އޭނާ ހޮވައިފި ނަމަ، އަންހެނުންގެ ކުރިއެރުމާއި ތަރައްގީ އަށް ވަރަށް ބޮޑަށް މަަަސައްކަތް ކުރައްވާނެ ކަމަށް އެ ދާއިރާ އަށް ވާދަ ކުރައްވާ ޕީޕީއެމްގެ ކެންޑިޑޭޓް އަލީ އިބްރާހީމް ރޭ ވިދާޅުވެއްޖެ އެވެ.
ހިތަދޫ އޮޑައްސައު ސަރަހައްދުގައި ރޭ ހުޅުވި އަންހެނުންގެ ޖަގަަހާގައި ވާހަކަ ދައްކަވަމުން އަލީ ވިދާޅުވީ އޭނާގެ ކެމްޕޭނުގައި އަންހެނުންނަށް ހާއްސަ ޖަގަހެއް ހުޅުވީ އޭނާ އަންހެނުންގެ ކަންތައްތަކަށް އިސްކަންދެއްވާލެއް ބޮޑު ކަމުން ކަމަށެވެ. އަދި އެ ޖަގަހާއި އަންހެނުންނަށް ސިޔާސީ ސައްލާތަކާއި އިޖުތިމާއި ވާހަކަތައް ވެސް ވަރަށް ހުޅުވާލެވިފައިވާ މާހައުލެއްގައި ދެއްކުމުގެ ފުރުސަތު އޮންނާނެ ކަމަށް ވިދާޅުވި އެވެ.
ޑީސީސީ ޓްރޭޑާސް ކުރިމަތީގައި ހުންނަ 100 ފްލާގައި ހުޅުވި ޖަގަހާގައި އިތުރަށް ވާހަކަ ދައްކަވަމުން އަލީ ވިދާޅުވީ، އަންހެނުންނަށް އެކިއެކި ދާއިރާތަކުން ކުރިއަށް ދެވޭނެ ގޮތްތައް ފަހިކޮށް ދޭން ޖެހޭ ކަމަށާއި އެ މީހުންނަކީ ފުދުންތެރި ބަޔަކަށް ހެދުމަށް، އާމްދަނީ ހޯދޭނެ ގޮތްތައް ވެސް ހޯދައި ދޭން ޖެހޭ ކަމަށެވެ. އެހެންވެ އެއީ އޭނާގެ ވަރަށް މުހިއްމު މަަަސައްކަތަކަށް ވާނެ ކަމަށް ވިދާޅުވި އެވެ.
އަލީ ވިދާޅުވީ އޭނާ މަޖިލީހަށް ހޮވިވަޑައިގެންފި ނަމަ އޭނާގެ ދާއިރާ އިން 40 ނުވަތަ 50 ވަރަަކަށް އަންހެނުން ނަަގައިގެން، އެކި ކަންކަމުގައި ވަކާލާތުކޮށް، އަންހެނުންނަށް ލިބެން ޖެހޭ ފުރުސަތުތައް ހޯދައި ދިނުމަށް ވެސް މަސައްކަތް ކުރައްވާނެ ކަމަށެވެ. އަދި އެކަން ކުރާނީ އެފަދަ މީހުންނަށް ތަމްރީނު ޕްރޮގްރާމްތަކެއް ވެސް ހިންގައިގެން ކަމަށް ވިދާޅުވި އެވެ.
އަލީ އަދި ވިދާޅުވީ އައްޑު ސިޓީ ކައުންސިލްގައި ވެސް އަންހެން ބޭފުޅުން ތިއްބެވުމަކީ ދެކެވަޑައިގަންނަވާ ހުވަފެނެއް ކަމަށެވެ. އަދި އެއީ ނުކުރެވޭނެ ކަމެއް ނޫން ކަމަށާއި ކުރިއަށް އޮތް ތަނުގައި ކައުންސިލުން އަންހެން ބޭފުޅުން ފެނުމަކީ ކުރައްވާ ވަރަށް ބޮޑު އުންމީދެއް ކަމަށެވެ.
އަލީގެ އަންހެެެނުންގެ ޖަގަހަ ރޭ ހުޅުއްވައި ދެއްވީ ދައުލަތަށް ގިނަ ދުވަހު ހިދުމަތް ކުރައްވާފައިވާ އަދި އަންހެނުންގެ ތަރައްގީ އަށް ވަރަށް ބޮޑަށް ވަކާލާތު ކުރައްވާ އަނީސާ އަހުމަދެވެ. އަނީސާ ރޭ ވަނީ އަންހެނުންގެ ޖަގައިގެ ދިދަ ވެސް ނަންގަވައި ދެއްވާފަ އެވެ.
އަނީސާ ވެސް ރޭ ވިދާޅުވީ އައްޑޫ ސިޓީ ކައުންސިލްގައި އަންހެން މެމްބަރުން ތިބޭނެ ކަމަށް 2011 ވަނަ އަހަރު ބޭއްވި، ފުރަތަމަ ސިޓީ ކައުންސިލް އިންތިހާބުގައި ވެސް އުންމީދު ކުރެވުނު ކަމަށެވެ.
ނަމަވެސް އޭރު ވެސް އެކަން ނުވެ، ކައުންސިލް ދެ ވަނަ ދައުރަކަށް މަސައްކަތް ފެށި އިރު ކައުންސިލުގައި އަންހެނަކު ނެތުމަކީ ހިތާމަ ކުރައްވާ ކަމެއް ކަމަށް އަންހެނުންގެ ތަރައްގީ އަށް ގިނަ މަސައްކަތްތަކެއް ކުރައްވަމުން ގެންދަވާ އަނީސާ ވިދާޅުވި އެވެ.
"އައްޑޫ ސިޓީ އަށް ބަލާލިޔަސް ވެސް މި ފަހަރު ވެސް އައްޑޫ ސިޓީ ކައުންސިލް އިންތިހާބުވެގެން ދިޔަ އިރު، އެއްވެސް އަންހެން ބޭފުޅަކު ނެތް. ދެހާސް އެގާރަ ވަނަ އަހަރު އެހެން ދިމާވި ނަމަވެސް އަޅުގަނޑު އުންމީދު ކުރިން 2014 ވަނަ އަހަރު މަދުވެގެން އެންމެ އަންހެން ބޭފުޅަކު ނަމަވެސް އައްޑޫ ސިޓީ ކައުންސިލްގައި ހިމެނިވަޑައިގަންނަވާނެ ކަމަށް،" ކުރިން ހެލްތު މިނިސްޓަރުކަން ވެސް ކުރައްވާފައިވާ އަނީސާ ވިދާޅުވި އެވެ. "އައްޑޫ ކަހަލަ ސިޓީއެއްގައި އަންހެނުން މި ކަހަލަ ދައުރެއް އަދާކުރާ ތަން ނުފެނުމަކީ އަޅުގަނޑު ހިތާމަ ކުރާ ކަމެއް."