ދުވަހަކު ވެސް ސިޔާސީ ދާއިރާ އަށް ވަނުމުގެ ހިޔާލެއް ނެތް ކަމަށް ބޮލީވުޑްގެ މަޝްހޫރު ބަތަލާ މަދޫރީ ޑިކްޝިތް ބުނެފި އެވެ.
އަންނަ ހުކުރު ދުވަހު ރިލީޒް ކުރާ މަދޫރީގެ އާ ފިލްމް "ގުލާބް ގޭންގް" ގެ ޕްރޮމޯޝަނަލް އިވެންޓެއްްގައި ނޫސްވެރިއަކު މަދޫރީ ކައިރިން ސިޔާސީ ދާއިރާ އަށް ވަނުމުގެ ޝައުގުވެރިކަން އެބަ ހުރިތޯ އެހުމުން އުމުރުން 46 އަހަރުގެ ބަތަލާ ބުނީ "އެއީ ދުވަހަކު ހިޔާލު ވެސް ކުރި ކަމެއް ނޫން" ކަމަށެވެ.
"އަހަރެން ދުވަހަކު ވެސް އެކަމަކާ ނުވިސްނަން. އަދި ސިޔާސީ ދާއިރާ އަށް އެއްވެސް ޝައުގުވެރިކަމެއް ނެތް. ވޯޓެއް ލާން ޖެހިއްޖެ ނަމަ އާންމު އެހެން ރައްޔިތުންނެކޭ އެެެއްގޮތަށް އަހަރެން ވެސް ހުންނާނީ ހަމަ ސިއްރު ވޯޓެއްލާ މީހެއްގެ ގޮތުގައި،" ކާމިޔާބު ވަރަށް ގިނަ ފިލްމްތަކެއް ކުޅެ، ގިނަ އެވޯޑްތަކެއް ވެއް ހާސިލްކޮށްފައިވާ ދެ ކުދިންގެ މަންމަ ބުންޏެވެ.
މަދޫރީ އަދި ބުނީ އޭނާއަކީ ބުނީ އޭނާ އިންޑިއާގެ ގާނޫނު ހަދާ މަޖިލިސް "ލޯކްސަބާ" އަށް ވާދަ ކުރަން ސިޔާސީ އެއްވެސް ޕާޓިއަކުން ފުރުސަތެއް ވެސް ލިބިފައި ނެތް ކަމަށެވެ.
އަދި އޭނާއަކީ ސިޔާސީ ކަންކަމާ ދޭތެރޭ އެހާ ބޮޑަށް ވިސްނައި، ސިޔާސީ ޕާޓީތަކާ މާ ބޮޑު ގުޅުމެއް އޮންނަ މީހެއް ނޫން ކަމަށް ވެސް ޑޮކްޓަރު ސްރީރާމް މާދަވް ނޭނޭ އާ ކައިވެނިކޮށްގެން އުޅޭ މަދޫރީ ބުންޏެވެ.
ބޮލީވުޑްގެ ކުރީގެ ބަައެއް ބަތަލާއިންނަށް ބަލާ އިރު ހެމާ މާލިނީ އާއި ޖާޔާ ޕްރަދާ އަދި ޖާޔާ ބައްޗަން ފަދަ ބަތަލާއިންނަކީ އެ މީހުންގެ ކެރިއަރުގެ ކޮންމެވެސް ހިސާބެއްގައި ސިޔާސީ ދާއިރާގައި ހަރަކާތްތެރިވެފައިވާ ތަރިންނެވެ.