މި ޒަމާނުގެ އަންހެން ކުދިންނަކީ ފާޑުފާޑުގެ އަތްދަބަހަށް ވަރަށް ބޮޑަށް ލޯބި ކުރާ ބައެކެވެ. އަތްދަބަހަކީ މިހާރު ހަމައެކަނި ފެޝަނަކަށް ގެންގުޅޭ އެއްޗެއް ނޫނެވެ. އެެއީ އެ މީހެއްގެ ބޭނުންތަކާ ގުޅޭ ގޮތުން ވަރަށް ގިނަ ތަކެތި ރައްކާ ކުރާ އެއްޗަކަށް މިހާރު ވަނީ ވެފަ އެވެ. ކުރު ގޮތަކަށް ބުނާ ނަމަ ބުނެވޭނީ އަންހެނެއްގެ އަތްދަބަހަކީ އޭނާގެ މުޅި "ދުނިޔެ" އެވެ.
އެގޮތުން ތިމާއާ އެންމެ ގުޅޭ އެންމެ ބޭނުން ހިފޭ އަތްދަބަހެއް ހޯދުމަކީ ވެސް ވަރަށް ބޭނުންތެރި ކަމެކެވެ. ސަބަބަކީ އަތްދަބަހަކުން ތިމާގެ ހަށިގަނޑުގެ އެކި ވަނާތަކުގެ ރީތިކަމާއި ހުތުރުކަން ފޮރުވޭނެތީ އެވެ.
މިޒަމާނުގައި އަތްދަބަހަކީ އެކިއެކި ބައްޓަމަށް އެކިއެކި ސައިޒުތަކުގައި އުފައްދާ އެއްޗެކެވެ. އެހެންކަމުން އެންމެ ގުޅޭ އަތްދަބަހެއް ހޯދުމުގައި ތިރީގައިވާ ކަންތައްތަކަށް ބަލާލުން ރަނގަޅު ވާނެ އެވެ.
ބޮޑެތި ދަބަސް: މާ ކުދި ދަބަސް ނުހޯދާށެވެ. އޭރުން ތިމާއަކީ ތަންކޮޅެއް ފަލަ، ނުވަތަ ބިޔަކޮށް ހުންނަ މީހެއް ނަމަ މާ ބޮޑަށް ބިޔަ ކަމަށް ދައްކާނެ އެވެ. މިފަދަ މީހުންނާ ގުޅޭނީ މެދުވަރެއްގެ ދަބަހެވެ. ނުވަތަ ތަންކޮޅެއް ބޮޑެތި ދަބަހެވެ.
ހިކިކޮށް ކުރުކޮށް ތިބޭ މީހުން ތަންކޮޅެއް ދިގުކޮށް ހުންނަ ވާގަނޑު ދިގު ދަބަސް ހިޔާރުކުރުން ރަނގަޅެވެ. އޭރުން މީހާ މާ ކުރު ކަމަކަށް ނުދައްކާނެ އެވެ. ނަމަވެސް މި ސައިޒުގެ މީހުން އާދަޔާ ހިލާފަށް ބޮޑެތި ދަބަސް ގެންގުޅުމާ ދުރުހެލިވާން ޖެހެ އެވެ.
އުނަގަނޑު ހިމަ ފޫކޮޅު ތަންކޮޅެއް ބޮޑުކޮށް ތިބޭ މީހުންނަށް ތަންކޮޅެއް ވާގަނޑު ކުރު ދަބަސް އެޅުން ރަނގަޅުވާނެ އެވެ. ކިރިޔާ ކޮނޑުގައި އަޅުވާލެވޭ ވަރުގެ ވާގަނޑެއް ހުންނަ ދަބަސް މިފަދަ މީހުންނާ ވަރަށް ގުޅޭނެ އެވެ. މީހުންގެ ސަމާލުކަން ލިބެން ބޭނުންނުވާ ހިސާބާ އަޅައިގަތުން ކުޑަވާނެ އެވެ.
ބައިމަތި ފުޅާކޮށް ތިބޭ މީހުންނާ ގުޅޭނީ ދިގު ވާގަނޑެއް ހުންނަ ދަބަހެވެ. ވާގަނޑު ކުރު ދަބަސް އެއްގޮތަކަށް ވެސް މިފަދަ މީހުން ބޭނުން ކުރުން ރަނގަޅެއް ނޫނެވެ.
މިފަދަ މީހުން ވާގަނޑު އެއްގޮތަކަށް ވެސް ނުހުންނަ ނުވަތަ އަތުން އެލުވާލައިގެން ގެންގުޅޭ ވައްތަރުގެ ދަބަސް ގެންގުޅެވިދާނެ އެވެ.
ދަބަހެއް ހިޔާރުކުރާއިރު އެންމެ ރަނގަޅުވާނީ އެމީހެއްގެ ހަށިގަނޑުގެ ބައްޓަމާ ގުޅޭ ސްޓައިލެއްގެ ދަަބަހެއް ހިޔާރު ކުރުމެވެ. ހިމަ ފްރޭމެއްގެ ހަށިގަނޑެއްގެ ވެރިއެއް ނަމަ ބޮޑެތި ދަބަސް، ތަންކޮޅެއް ބިޔަކޮށް ތިބޭ މީހުން ވާގަނޑު ދިގު ދަބަސް މިފަދަ ގޮތަކަށެވެ.
ވިސްނަންވީ ކަމަކީ ކޮނޑުގައި އަޅާލެވޭ ދަަބަހަކުން ވެސް ހަށިގަނޑުގެ ބައްޓަން ތަފާތު ގޮތަކަށް ފެނިދާނެ ކަމެވެ.