އަނިލް ކަޕޫރު ޕްރޮޑިއުސް ކުރަން ހަމަޖެހިފައިވާ އާ ފިލްމުގެ ބަތަލާއަކަށް އޭނާގެ އަންހެން ދަރިފުޅު އަދި ބަތަލާ ސޯނަމް ކަޕޫރު ހަމަޖެހިފައިވާ އަނިލް ބުނެފި އެވެ.
މި ފިލްމަކީ އިންޑިއާގެ މަޝްހޫރު އަންހެން ލިއުންތެރިޔާ އަނޫޖާ ޗޯހަންގެ "ބެޓްލް ފޮ ބިޓޯރާ" ގެ މައްޗަށް ބިނާކޮށް ހަދާ ފިލްމެކެވެ.
އެ ވާހަކައިގެ ރައިޓްސް އަނިލް ވނީ ދާދި ފަހުން ގަނެފަ އެވެ. އަދި ފިލްމުގެ މުހިއްމު ރޯލަކަށް ދަރިފުޅު ސޯނަމް ހަމަޖެހިފައިވާކަން ވެސް އަނިލް ވަނީ މީޑިއާތަކަށް ކަށަވަރުކޮށް ދީފަ އެވެ.
އެކަމަކު އަދި މި ފިލްމާ ބެހޭ ގޮތުން އިތުރު ތަފުސީލަކަށް ދާން އަނިލް ބޭނުމެއް ނޫނެވެ.
"ބެޓްލް ފޮ ބިޓޯރާ" ގައި ކިޔައި ދެނީ އެއް އިންތިހާބެއްގައި އެކަކު އަނެކަކާ ވާދަ ކުރަން ނިކުންނަ ދެ ލޯބިވެރިންގެ ވާހަކަ އެވެ. އަދި ދެ މީހުންނަކީ ވެސް ނުފޫޒު ގަދަ ސިޔާސީ ދެ މީހުންނެވެ.
"މިއީ ފިލްމަށް ހަދާލަން ވަރަށް ފައްކާ ވާހަކައެއް. އަހަންނަށް ހަމަ ޔަގީން މި ވާހަކަ އަށް ފިލްމެއް ހަދައިފި ނަމަ އާންމުންނަށް ވަރަށް ބޮޑަށް ކަމުދާނެ ކަމަށް،" އަނިލް، 57، ބުންޏެވެ.
އަނިލް މީގެ ކުރިން ވެސް ވަނީ ސޯނަމް ހިމަނައިގެން ފިލްމެއް ޕްރޮޑިއުސްކޮށްފަ އެވެ. އެއީ 2011 ގައި ނިކުތް "އައިޝާ" އެވެ.