(މާޗް 3، 2014 ވަނަ ދުވަހުގެ ބަޔާ ގުޅޭ)
"ނިއުޒިލެންޑަށް ގޮސް އަމިއްލަ އެއާލައިނެއް ހިންގާ ބަޔަކާ ގުޅައިގެން މި ދޭތެރޭގައި (ގަމާއި މާލެ އާ) ފްލައިޓް އޮޕަރޭޓް ކުރަން ހިޔާލުކޮށް، އެ މަސައްކަތް ވަރަށް ކުރިއަށް ގެންގޮސްފައި ވަނިކޮށް އެކަން ވެސް ހިނގާ ގޮތެއް ނުވި. މި މަސައްކަތް ފެށީ ވެސް ސަރުކާރުގެ ކަމާބެހޭ ފަރާތްތަކުން އެކަމަށް އާނ ބަސް ލިބިގެން. އަދި އަނެއްކާ މި ތަނަށް (ރާއްޖެ އަށް) މިކަމާ ބެހޭ ބޭރުގެ އެއާލައިނެއް ހިންގާ ބަޔަކު ގެނެސް ވާހަކަ ދެކެވި، އެބައި މީހުންނަށް ވެސް ސަރުކާރުގެ ރުހުން ލިބުމުން. އޮޕަރޭޝަނަށް ބޭނުންވާ ބޯޓާއި ތަކެތި ހޯދި. މިކަން ހަމަޖެއްސުމުގައި އެއްވެސް މައްސަލައެއް ނޯންނާނެ ކަމަށް ރަސްމީ ފަރާތްތަކުން ޖަވާބު ދެއްވާފައި އޮތީ. ސަރުކާރުގެ ވަރަށް މަތީ ތާއީދާ އެކު މިކަން ހިނގާ ކަހަލަ ގޮތަކަށް އޮތީ. އެހެން ނަމަވެސް ފުރަތަމަ ފްލައިޓް އައުމުހެ އެއް ހަފުތާ ކުރިން ސިވިލް އޭވިއޭޝަނުން އަޅުގަނޑަށް އެންގެވީ މި ވަގުތު ހުއްދަ ދެވޭކަށް ނެތޭ. އެހެން ބަޔަކު މިކަން ކުރަން (އެތެރޭގެ އުދުހުންތަކަށް އެއާލައިނެއްގެ ދަތުރު ފަށަން) ހުށަހަޅާފައިވާތީއޭ. ދެން ކީއް ކުރާނީ؟ މި ހިސާބަށް އާދެވުނު އިރު 21 ލައްކަ ރުފިޔާ މިކަމަށް ހަރަދުވެފައި ވަނީ. މިކަންތައްތައް މިހާ ދެރަ ގޮތަކަށް ނިމިގެންދާތީ އަޅުގަނޑު ސަރުކާރުގެ ކަމާ ބެހޭ އެންމެ މަތީ ފަރާތްތަކުން އެޕޮއިންޓްމަންޓް ހޯދަން އެދުނިން. ނަމަވެސް ލިބޭ ގޮތެއް ނުވި. މިހެންވީ އެ ފަރާތްތަކުން ވެސް އަޅުގަނޑަށް ދެއްވާ ޖަވާބެއް ނެތީމާ ކަމަށް ވިސްނެނީ."
މުހައްމަދު ސައީދުގެ މި ވާހަކަތަކަށް އިޝާރާތް ކުރައްވަމުން މައިޒާން އާދަމް މަނިކު ވިދާޅުވީ "މުހައްމަދު ސައީދު އަމިއްލަ އަށް ބޭރު ބަޔަކާ އެކު ޕްރައިވެޓް އެއާލައިނެއްގެ ދަތުރު ހަމަޖެއްސުމަށް ވެސް ވަރަށް މަސައްކަތް ކުރެއްވި" ކަމަށެވެ.
"މި އެއާލައިންގެ ކަންތައް އޮޕަރޭޝަނާ ހަމައަށް ގެންދެވުނު. އެއީ ވެސް ރައީސް ދެއްވި ޔަގީންކަމެއްގެ މައްޗަށް ތިބެގެން ކުރެވުނު މަސައްކަތެއް. އެކަމަކު މިކަމެއް ވެސް ނުވި. އެކިއެކި ހުރަސްތައް މެދުވެރިވަމުން ދިޔައީ. ދުވަސްތައް ބޭކާރުވެ، ފައިސާ ހަރަދުވެ، މައްސަލައަކަށް ފަހު މައްސަލައެއް ކުރިމަތިވާން ފެށުމުން މިކަން ފޫބެއްދުމަށް ދެއްވީ ބޭންކް ލޯނެއް. އެކަމަކު ކިހިނެއްތޯ މި ލޯން ނަގައިގެން ދައްކާނީ؟ އެތަނުން (ހޮލިޑޭ ވިލެޖުން) ހިނގަނީ ހުސް ހަރަދު. އެންމެ ފަހުން މިކަންތަކާ ކަންބޮޑުވެގެން ގޮސް އޭނާ (ސައީދު) ބަލިވީ. އެ ބަލީގައި މުހައްމަދު ސައީދު ނިޔާވެ ދިޔައީ." އާދަމް މަނިކު ވިދާޅުވި އެވެ.
މި ހުރިހާ މައްސަލަތަކާ އެކު އެތަކެއް ދަރަނި ބޮލުގައި އެޅުނު މުހައްމަދު ސައީދު ހޮލިޑޭ ވިލެޖް ދޫކުރައްވައި ހުސް އަތާ ނިކުންނެވި ދޮރުން ދެން އެތެރެ އަށް ވެންނެވި ތަން ފެނުނީ ހިކިފިނިފެންމގޭ ބޭފުޅުންނެވެ.
ނަސީމު އާއި ސަލީމް އިސްވެ "އޯޝަން ރީފް ކުލަބް" ގެ ނަމުގައި މި ހޮޓާ ހިންގަވަން ފެށި ފަހުން މުހައްމަދު ސައީދާ ދިމާވި މައްސަލަތައް ތަކުރާރުވެެގެން ދާތީއެއް ނުފެނުނެވެ.
ނަމަވެސް މި ބޭފުޅުން މި ހޮޓާ ހިންގެވުމުގައި ދިވެހި ސަރުކާރާއި އަދި ގަމުގެ ކަންތައްތަކާ ހަވާލު ކުރެވިފައިވާ އޭޑީއޭ ގަން ބަލަހައްޓާ ޔުނިޓުގެ އެއްބާރުލުން ހޯއްދެވީ ކިހިނެއް ބާވަ އެވެ؟
ހިކިފިނިފެންމާގޭ އާއިލާގެ ބޭފުޅުންނަކީ ރައީސް މައުމޫނުގެ އެންމެ ފުރަތަމަ އަދި އެންމެ ބޮޑު ހަތުރުންނެވެ. ކޮންމެއަކަސް އެތަކެއް އަހަރެއް ވަންދެން މި ހޮޓާ ހިންގެވުމަށް އެ ބޭފުޅުން ކުރެއްވި ބޮޑު ހަރަދާއި މިންނެތް މަސައްކަތުން ވެސް ނަފާއެއް ނުވި އެވެ.
އެ ބޭފުޅުންގެ ދައުރުގައި އިނގިރޭސީން ގަމުގައި އުޅުނު ދުވަސްވަރު ގަމުގައި ހިންގި 18 ހޯލްގެ ގޮލްފް ކޯސް ތަރައްގީ ކުރެއްވުމަށް ވެސް ވަރަށް މަސައްކަތް ކުރެއްވި އެވެ. ނަމަވެސް ނަތީޖާއެއް ނުފެނި އެެންމެ ފަހުން އޯޝަން ރީފް ކުލަބް ވިއްކާލެއްވީ އެވެ.
އޭގެ ފަހުން 30 ވަރަކަށް އަހަރު ފަހެވެ. މުހައްމަދު ސައީދު ނިޔާވީ އެވެ. ނަސީމެއް ވެސް ނެތެވެ. އެހެން ނަމަވެސް އެ ބޭފުޅުން އައްޑޫގެ ފަތުރުވެރިކަމާ މެދު ދެކެލެއްވި ހުވަފެން މިއަދު ހަގީގަތަކަށްވީ އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސްކުރަމެވެ.