މި މަހުގެ 22 ގައި ބާއްވާ ރައްޔިތުންގެ މަޖިލީހުގެ ފެދޫ ދާއިރާގެ ގޮނޑި އަށް އަމިއްލަ ގޮތުން ވާދަ ކުރައްވާ އަލްހާން ފަހުމީގެ ކެމްޕޭނުގައި އެމްޑީޕީގެ ލޯގޯ ބޭނުން ކުރައްވާ ކަމަށް ބުނެ އެ ޕާޓީގެ ބައެއް އާންމު މެމްބަރުން ކަންބޮޑުވުން ފާޅު ކުރި ނަމަވެެސް އެއީ ހަގީގަތެއް ނޫން ކަމަށް އަލްހާންގެ ކެމްޕޭން ޓީމުން ބުނެފި އެވެ.
ފެދޫގައި ހަރަކާތްތެރިވާ އަލްހާންގެ ކެމްޕޭން ޓީމުގެ ފަރާތުން ވާހަކަ ދެއްކި މީހަކު ބުނީ އަލްހާން އަމިއްލަ ގޮތުން އިންތިހާބަށް ވާދަ ކުރައްވަން ނިންމެވި ހިސާބުން، އެމްޑީޕީގެ ލޯގޯ ކެމްޕޭނުގައި ބޭނުން ނުކުރައްވާ ކަމަށެވެ.
"އޭނާ ލޯގޯ ބޭނުން ކުރެއްވީ އެމްޑީޕީގެ ޕްރައިމެރީގައި ވާދަ ކުރެއްވި އިރު. އެހެން ނަމަވެސް ޕްރައިމަރީ އަށް ފަހު، މިހާރު އަމިއްލަ ގޮތުން ވާދަ ކުރައްވާ އިރު އެމްޑީޕީގެ ލޯގޯއެއް ކެމްޕޭނުގެ އެއްވެސް މެޓީރިއަލެއްގައި ބޭނުންކޮށްފައެއް ނުވާނެ. އަދި ބޭނުމެއް ވެސް ނުކުރާނެ،" އޭނާ ބުންޏެވެ. "އެކަން އެނގޭނެ މިހާރު އޭނާގެ ޕޯސްޓަރުތަކާއި ބެނާތަކަށް ބަލާލިޔަސް. އެހެން ނަމަވެސް ފޭދޫ ބަނދަރުމަތި ފަދަ ތަންތަނުގައި އަދިވެސް އެބަހުރި އެމްޑީޕީގެ ލޯގޯ އާ އެކު ޖަހާފައި ހުރި ޕޯސްޓަރުތައް. އެއީ ޕްރައިމަރީ ތެރޭގައި ބެހެއްޓި އެއްޗެހި."
އަލްހާންގެ ކެމްޕޭން ޓީމުން ބުނީ އޭނާ އަންނަ ހަފުތާގެ ތެެރޭގައި، ސަޕޯޓަރުންނާ ބައްދަލު ކުރެއްވުމަށް ފޭދު އަށް ވެސް ވަޑައިގަންނަވާ ގޮތަަށް ހަމަޖެހިފައިވާ ކަމަށެވެ.
އެމްޑީޕީ ލޯގޯ އަލްހާން ބޭނުން ކުރައްވާ ކަމަށް ބުނެ އެ ޕާޓީގެ ފޭދޫގެ ސަޕޯޓަރުން ކުރީގެ ރައީސް މުހައްމަދު ނަޝީދު އަރިހުގައި ކަންބޮޑުވުން ފާޅު ކުރުމުން ނަޝީދު ވިދާޅުވީ "އަލްހާން އެ ހައްދަވަނީ ގޯހެއް" ކަމަށާއި "އަލްހާން އެހެން ހައްދަަވައިގެން ނުވާނެ" ކަމަށެވެ.