އަންނަ ބުރާސްފަތި ދުވަހުގެ ރޭ ހިތަދޫ މެދު ދާއިރާގެ ރައްޔިތުންނާއި ބައްދަލު ކުރުމަށް އާއްމު ބައްދަލުވުމެއް ބާއްވަން ނިންމާފައިވާ ކަމަށް އެދާއިރާ ތަމްސީލް ކުރައްވާ ހުސެއިން ހިލްމީ ވިދާޅުވެއްޖެ އެވެ.
ހުސެއިން ހިލްމީ ވިދާޅުވީ ބުރާސްފަތި ދުވަހުގެ ރޭ 8:30 ގައި މެދު ދާއިރާގެ ރައްޔިތުންނާއި ބައްދަލުކުރުމަށް ނިންމާފައި ވަނީ ނޫރާނީ ސްކޫލްގައި ކަމަށެވެ.
ހުސެއިން މިއަދު ވިދާޅުވީ މި ބައްދަލުވުމަށް ދާއިރާގެ ވިހާވެސް ގިނަ ރައްޔިތުން ވަޑައިގަތުމަށް އެދިވަޑައިގަންނަވާކަމަށެވެ. އަދި ރައްޔިތުންގެ ކަންބޮޑުވުންތަކާއި، ހިޔާލާއި މަޝްވަރާ މި ބައްދަލުވުމުގައި ކައުންސިލްއާއި ހިއްސާކޮށްދެއްވުމަށެވެ.
"ނިމިގެން ދިޔަ ކައުންސިލްގައި އެއްގޮތަކަށްވެސް އަޅުގަނޑުމެންނަށް ރައްޔިތުންނާއި ބައްދަލު ނުކުރެވުނު، އެހެންވެ ރައްޔިތުންގެ އަޑު އަޅުގަނޑުމެންނަކަށް ނީވޭ، އެކަމަކު އިރާދަކުރެއްވިއްޔާ މިކައުންސިލުން ރައްޔިތުންގެ އަޑު އަހައިގެން ރައްޔިތުންގެ ބައިވެރިވުމާއި އެކު ކުރިއަށްދާނީ." ހުސެއިން ވިދާޅުވިއެވެ.
ނިމިގެންދިޔަ ކައުންސިލްގެ އިންފްރާސްޓަރަކްޗަރ ހިންގެވުމާއި ހަވާލުވެ ހުންނެވި ހުސެއިން ހިލްމީ ވިދާޅުވީ މިހާރުގެ ސަރުކާރަށް ފުރިހަމައަށް އެއްބާރުލުންދީ އައްޑޫގެ ތަރައްޤީއަށް ހުރި ކަންކަން ކުރުމުގައި ކައުންސިލުން ދެވެން އޮތް އެންމެ ފުރިހަމަ އެއްބާރުލުމެއް ދޭނެ ކަމަށެވެ.
ކައުންސިލްގެ ހުވާ ފެބްރުއަރީ 26 ވަނަ ދުވަހު ކުރެއްވުމަށް ފަހު ކައުންސިލް އާއްމުކޮށް ރައްޔިތުންނާ ބައްދަލު ކުރުމަށް ނިކުންނަ މީ ފުރަތަމަ ފަހަރެވެ.