ތަފާތު މާސްކަކީ އަންހެން ކުދިންގެ ތެރޭގައި ވަރަށް މަގުބޫލު އެއްޗެކެވެ. ގިނަ އަންހެން ކުދިން ފޭޝަލް މާސްކު ބޭނުން ކުރަނީ މޫނު ރީތިކޮށް ސާފުކޮށް ބެހެއްޓުމަށެވެ.
ހަގީގަތުގައި ފޭޝަލް މާސްކެއް ހިޔާރުކުރުމުގައި ތިމާގެ ހަމާ ގުޅޭ މާސްކެއް ހިޔާރުކުރުމުން ނޫނީ އޭގެ ފުރިހަމަ ފައިދާއެއް ނުލިބޭނެ އެވެ. އެހެންވެ އެންމެ އުދަނގޫ ކަމަކަށްވެފައި އޮންނަނީ ވެސް ގުޅޭ ފޭޝަލް މާސްކެއް ހޯދުމަށެވެ.
ހަގީގަތުގައި ފޭޝަލް މާސްކުން ލިބެނީ ކޮންކަހަލަ ފައިދާތަކެއްތޯ އާއި އޭގެ ހަގީގީ ސަބަބަށް ބަލާލަމާ ހެއްޔެވެ؟ ފޭޝަލް މާސްކު އެޅުމުން ހަނގަނޑު މުޅިން ސާފުވެ އެވެ.
ހަންގަނޑުގައި ހުންނަ ބޭކާރު ކުދި ހަންކޮޅުތައް ދެ އެވެ. ހަންގަނޑުގައި ހުންނަ ލޯވަޅުތަކުގެ ތެރޭގައި ހުންނަ ކިލާތަކާއި ތެޔޮތައް މުޅިން ސާފުވެ އެވެ. ކޮންމެ ފޭޝަލް މާސްކެއް ވެސް އަޅާފައި 15 މިނެޓް ބަހައްޓާތީ އޭގެ އަސަރު ހަންގަނޑުގެ އެންމެ އެތެރެއަށް ފޯރަ އެވެ.
އެކަމުގެ ސަބަބުން އޭގެ އަސަރު ގިނަ އިރު ހުރުމަށް މަގުފަހިވެ އެވެ. ފޭޝަލް މާސްކަކީ ހަމާ ގުޅޭ އެއްޗަކަށްވުން މުހިއްމު ވަނީ ވެސް އެހެންވެ އެވެ. އަދި ފޭޝަލް މާސްކުން މޫނުގައި ހުންނަ ކުދި ބިހިތަކަށް ވެސް ފަރުވާ ލިބެ އެވެ.
މޫނު ރަނގަޅަށް މަސާޖް ކޮށްލުމަށް ފަހު ފޭޝަލް މާސްކް މޫނުގައި އުނގުޅުމުން ލިބޭ އަނެއް ފައިދާއަކީ ހަންގަނޑުގައި ހުންނަ ނާރުތަކުން ލޭ ދައުރުވުމުގައި އެހީތެރިވުމެވެ. އެކަމުގެ ސަބަބުން މޫނުގެ މަސްތަކަށް އިތުރު ދިރުން ލިބި ހަންގަނޑު ތާޒާވެ އެވެ.
ބައެއް މީހުން ސެލޫންތަކަށް ގޮސްގެން ފޭޝަލް މާސްކު އެޅި ނަމަވެސް ގޭގައި އަމިއްލައަށް ތައްޔާރުކޮށްގެން އެފަދަ މާސްކު ބޭނުންކުރުން ގިނަ ފަހަރަށް ވަނީ ބޮޑު މަޖާގަނޑަކަށެވެ. އަމިއްލަ އަށް އެ އެއްޗެހި ތައްޔާރުކުރުން މާ ރަނގަޅު ވެސް މެ އެވެ. އެއީ ވަގުތުން ތައްޔާރުކުރުމުން ތާޒާވާނެތީ އެވެ.
ތަފާތު ވައްތަރުގެ މާސްކު ބޭނުންކުރި ނަމަ ވެސް ފޭޝަލް މާސްކެއް ތައްޔާރު ކުރުމަށް އެންމެ ރަނގަޅީ މާމުޔެވެ. އެއީ ހުރިހާ ބާވަތެއްގެ ހަމަކާ ގުޅޭ އެއްޗަކަށް މާމުއި ކަމަށްވާތީ އެވެ.
މާމުއި ބޭނުންކުރުމުން ހަންގަނޑު މަޑުވުމުގެ އިތުރުން އޮމާންވެ އެވެ.