އަންހެނުންނާ މެދު ހިންގާ އަނިޔާވެރިކަމާ ދެކޮޅަށް ހަރަކާތްތެރިވާ އެކްޓިވިސްޓް ގްރޫޕެއްގެ މަސައްކަތްތަކެއް ދައްކުވައިދޭ ފިލްމް "ގުލާބް ގޭންގް" ރިލީޒް ކުރަން ދެ ދުވަހަށް ވެފައި ވަނިކޮށް ހަގީގީ "ގުލާބީ ގޭންގް" ގެ ލީޑަރު ސަމްޕަތު ލާލު އެ ފިލްމުގެ މައްސަލަ ކޯޓަށް ވައްދައިފި އެވެ.
މިއީ ފަހަކަށް އައިސް ބޮލީވުޑްގެ ފިލްމުތަކަށް ވަރަށް އާންމުކޮށް ދިމާވާ މައްސަލައެކެެވެ. ބައެއް ފަރާތްތަކުން ބުނާ ގޮތުގައި މިފަދަ މައްސަލަތައް ކޯޓަށް ވައްދަނީ އާންމުންގެ ސަމާލުކަން އަތުލައި ގަތުމުގެ ބޭނުމުގަ އެވެ.
އަސުރުމާ ކުލައިގެ ސާޅީ އެޅި އަންހެން ގްރޫޕްގެ ލީޑަރު ބުނީ މަދޫރީ ޑިކްޝިޓާއި ޖޫހީ ޗަވްލާ ލީޑް ރޯލް ކުޅެފައިވާ "ގުލާބީ ގޭންގް" ގެ މައްސަލަ ކޯޓަށް ވައްދަން ނިންމީ އޭނާގެ ހުއްދަ ނެތި، އޭނާ ހިންގާ ހަރަކާތުގެ މައްޗަށް ބިނާކޮށް ފިލްމެއް ހެދުމުން ކަމަށެވެ.
މިފަދަ ތުހުމަތުތަކެއް ސަމްޕަތު ކުރި ނަމަވެސް "ގުލާބް ގޭންގް" ގެ ޕްރޮޑިއުސަރު އަނުބަވް ސިންހާ އާއި ޑައިރެކްޓަރު ސޯމިކް ސެން ވަނީ އެ މީހުންގެ ފިލްމަކީ ސަމްޕަތުގެ "ގުލާބީ ގޭންގް" އަކީ ސަމްޕަތާއި އޭނާގެ ގްރޫޕުގެ ވާހަކަ ދައްކުވައިދޭ ފިލްމެއް ނޫން ކަމަށް ބުނެފަ އެވެ.
އެެހެން ނަމަވެސް "ގުލާބީ ގޭންގް" އާއި "ގުލާބް ގޭންގް" އާ އެއް ކަހަލަ ސިފަތަކެއް އެބަ ހުއްޓެވެ. ފުރަތަމަ ކަމަކީ "ގުލާބް ގޭންގް" ގައި ވެސް އަސުރުމާ ކުލައިގެ ސާޅީ އެޅި ގްރޫޕެއްގެ މަސައްކަތް ދައްކުވައި ދިނުމެވެ.
އަނެއް ކަމަކީ މި ފިލްމަކީ ސަމްޕަތުގެ ހަރަކާތް ފަދައިން އަންހެނުންނަށް ކުރާ އަނިޔާތަކާ ދެކޮޅަށް އަންހެނުންތަކެއް ކުރާ މަަަސައްކަތް ދައްކުވައިދޭ ފިލްމަކަށްވުމެވެ.
މިކަމާ ބެހޭ ގޮތުން އިތުރަށް "ގްލާބް ގޭންގް" ޓީމުގެ އޮފިޝަލަކު ބުނީ ފާއިތުވި ތިން މަހެއްހާ ދުވަހުގެ ތެރޭގައި އެ ފިލްމަކީ "ގުލާބީ ގޭންގް" ގެ ވާހަކަ ކިޔައިދޭ ފިލްމެއް ނޫންކަން ބުނަމުން ގޮސްފައިވާ ކަމަށެވެ.
"އެހެން ނަމަވެސް ފިލްމް ރިލީޒް ކުރަން ދެ ދުވަހަށް ވެފައި ވަނިކޮށް، ފިލްމާ ގުޅޭ މައްސަލައެއް ކޯޓަށް ވެއްދުމަކީ ލިބުނު ވަރަށް ބޮޑު ހައިރާން ކަމެއް. މިކަމާ ދެން އަހަރެމެންނަށް ކުރެވޭނެ ކަމަކީ ކޮބައިތޯ ބަލަމުން މި އަންނަނީ،" އޭނާ ބުންޏެވެ.
ސޯމިކް ލިޔެ، ޑައިރެކްޓްކޮށް މިއުޒިކް ވެސް ތައްޔާރުކޮށްފައިވާ "ގުލާބް ގޭންގް" ސިނަމާތަކަށް އަންނާނީ އަންނަ ހުކުރު ދުވަހު އެވެ.
ސަމްޕަތުގެ ވާހަކަ އަަށް ބިނާކޮށް ދާފި ފަހުން ވަނީ "ގުލާބީ ގޭންގް" ގެ ނަމުގައި ޑޮކިއުމަންޓްރީއެއް ވެސް ނެރެފަ އެވެ.