މީގެ ކުޑަ އިރުކޮޅެއް ކުރިން ހިތަދޫ ބޮޑު މަގުގައި ނުރައްކާތެރި އެކްސިޑެންޓެއް ހިނގައި އަންހެނަކަށް އަނިޔާވެއްޖެ އެވެ.
މި އެކްސިޑެންޓް ހިނގާފައި ވަނީ ހިތަދޫ ބޮޑު މަގުގައި ހުންނަ ތަގްވާ މިސްކިތް (ހުސެއިން މޫސާ މިސްކިތް)ގެ ކުރިމަތިން ޖިޕަކާއި ކާރެއްގެ އިތުރުން ސައިކަލެއް ޖެހިގެންނެވެ.
އެ ސަރަހައްދުގައި ހުރި "އައްޑޫ ލައިވް" ގެ ރިޕޯޓަރު މަންޒަރު ދުށް ބައެއް މީހުންނާ ހަވާލާދީ ބުނީ އެކްސިޑެންޓް ހިނގީ ހިތަދޫގެ ދެކުނުން އުުތުރަށް ދަތުރު ކުރަމުން ދިޔަ ޖިޕެއް އޯވަޓޭކް ކުރަން އުޅުމުގެ ތެރޭގައި ކާރެއްގައި ޖެހި، އެ ކާރު ސައިކަލެއްގައި ޖެހިގެން ކަމަށެވެ.
މި ހާދިސާގައި އަނިޔާވީ ސައިކަލް ދުއްވަން އިން އަންހެން މީހާ އަށެވެ. މަންޒަރު ދުށް މީހުން ބުނާ ގޮތުގައި އަންހެން މީހާ އޮތީ ޖިޕްގެ ދަށުވެފަ އެވެ. އަދި އޭނާ އަށް އެކިވަރުގެ އަނިޔާތައް ލިބިފައިވެ އެވެ.
މި ހާދިސާގައި ޖިޕާއި ކާރުގެ ކުރީކޮޅަށް އެކި ވަރުގެ ގެއްލުން ލިބުނު ނަމަވެސް، ސައިކަލަށް މާ ބޮޑު ގެއްލުމެއް ލިބިފައެއް ނުވެ އެވެ.
އަނިޔާވި އަންހެން މީހާ ހޮސްޕިޓަލަށް ގެންގޮސް މިހާރު އަންނަނީ ފަރުވާ ދެމުންނެެވެ. ނަމަވެސް އޭނާ އަށް ލިބުނު ގެެއްލުމުގެ ތަފުސީލެއް އަދި ލިބޭ ގޮތެއް ނުވެ އެވެ. އެކަމަކު އޭނާގެ އެއްފައި ބިނދިފައިވާ ކަމަށް އެނގިފައިވެ އެވެ.
އެ މީހަކީ ހިތަދޫ ސަބްދެލިގޭ ހައްވާ އަހުމަދެވެ.