ސ. މީދުއަކީ މީގެ ކުރިން މާ ބޮޑު ތަރައްގީއެއް އައިސްފައިވާ ރަށެއް ނޫން ކަމަށާއި އެކަން ކުރެއްވީ އޭނާގެ ކަތީބު ކަމުގެ ދުވަސްވަރު، އޭނާގެ މަސައްކަތުން ކަމަށް މި މަހުގެ 22 ގައި ބާއްވާ ރައްޔިތުންގެ މަޖިލީހުގެ އިންތިހާބުގައި ޖުމްހޫރީ ޕާޓީގެ ފަރާތުން މީދޫ ދާއިރާ އަށް ވާދަ ކުރައްވާ އަބްދުﷲ ހާނީ ވިދާޅުވެއްޖެ އެވެ.
ވީޓީވީގެ "ފަސްމަންޒަރު" ޕްރޮގްރާމުގަި ހާނީ މިރޭ ވިދާޅުވީ، މީދޫގެ ރަށު އޮފީސް އިމާރާތާއި އެ ރަށުގައި އެންމެ ފުރަތަމަ ބިނާ ކުރި ސިއްހީ މަރުކަޒަކީ ވެސް އޭނާގެ މޭސްތިރި ކަމުގައި ކުރެއްވި ކަންކަން ކަމަށެވެ.
އޭނާ ވިދާޅުވީ ސިއްހީ މަރުކަޒު އިމާރާތް ކުރަން ޕްލޭންކޮށް އުޅުނު އިރު، ސިއްހީ މަރުކަޒު ޑިޒައިން ކުރާނެ މީހަކު ވެސް ނެތިގެން އިންޖިނޭރެއްގެ ހައިސިއްޔަތުން އެ މަސައްކަތް ވެސް ކުރެއްވީ އޭނާ އަމިއްލަ އަށް ކަމަށެވެ. އަދި މީދޫ އަވަށު އޮފީސް މިހާރު ހިންގާ އިމާރާތް، ކުރީގެ ރަށު އޮފީހަކީ ވެސް އޭނާގެ އިސް ނެންގެވުމުގެ މަތިން ކުރެވުނު މަސައްކަތެއް ކަމަށް ހާނީ ވީދާޅުވި އެވެ.
މީގެ އިތުރުން ރަށުގެ ޒުވާނުންގެ މަރުކަޒާއި ކުޑަކުދިންގެ ޕާކު ފަދަ ތަންތަން ތަރައްގީ ކުރެވުނީ ވެސް އޭނާ ކުރެއްވި އިހުލާސްތެރި ބުރަ މަސައްކަތުން ކަމަށަ ހާނީ ވިދާޅުވި އެވެ.
އަދި ރަށުގެ ޒުވާނުން މިހާރު ކުޅޭ ބޯޅަނޑާއި އެ ރަށުގެ އާސާރީ ބިނާއެއް ކަމަށްވާ ކޯގަންނު ގަބުރުސްތާން އާސާރީ ތަނެއްގެ ގޮތުގައި ކަނޑައެޅި އެ މަސައްކަތް ވެސް ބެލެެހެއްޓެން ފެށީ އޭނާ ކުރެއްވި މަސައްކަތުން ކަމަށް ފަހުރުވެރިކަމާ އެކު މިހާރު ވެސް ވިދާޅުވެވެން އޮތް ކަމަށް ހާނީ ވިދާޅުވި އެވެ.
ހަމަ މިއާ އެކު ރަށުގައި ދަނޑުވެރިކަން ތަރައްގީކޮށް އާލާ ކުރުމާއި ކީރިތި ޤުރުއާން ހިތުދަސްކޮށްދޭ ކުލާސްތަކެއް ހިންގައި، އެ މަސައްކަތްތަކުން ފޮނި ނަތީޖާތަކެއް ނެރެދެއްވާފައިވާ ކަމަށް ހާނީ ވިދާޅުވި އެވެ.
އަދި އައްޑޫގައި އެންމެ ގިނަ ދުވަސް ވަންދެން ނެރުނު ނޫހަކީ ވެސް އޭނާގެ މަސްއޫލުވެރިކަމުގައި ނެރުނު "އައްސޭރި" ނޫސް ކަމަށް ވިދާޅުވި އެވެ.
އެހެންވެ އޭނާއަކީ މަޖިލީހުގެ މީދޫ ދާއިރާ އަށް ވާދަ ކުރައްވާ އެހެން ކެންޑިޑޭޓުންނާ އަޅާ ބަލާ އިރު ރަށަށް ގިނަގުނަ ހިދުމަތްތަކެއްކޮށް ދީފައިވާ މީހެއް ކަމަށާއި އެކަން ރައްޔިތުން ވެސް ގަބޫލް ކުރާނެ ކަމަށް ހާނީ ވިދާޅުވި އެވެ.
ހާނީ އާ ވާދަ ކުރައްވަނީ މަރަދޫފޭދޫގެ ކުރީގެ ކަތީބް އަލީ ނިޒާރާއި ތުލުސްދޫ ދާއިރާގެ މިހާރުގެ މެމްބަރު ރޮޒައިނާ އާދަމް އާއި މިނިވަން ކެންޑިޑޭޓެއްގެ ގޮތުގައި މުހައްމަދު ފަރުހާދު އާއި އަދާލަތު ޕާޓީން އަހުމަދު ހިޝާމްއެވެ.