(މާޗް 5، 2014 ވަނަ ދުވަހުގެ ބަޔާ ގުޅޭ)
މައްޔިތާގެ މުޅަ ހަށިގަނޑު ގިނަ ދުވަހު ބާއްވާނޭ މޯޗަރީއެއްގެ އިތުރަށް ޑެންޓަލް ކުލިނިކަކާއި އެމްބިއުލަންސް ވެސް ހުއްޓެވެ. އަދި ފެށުނީއްސުރެ މި ހޮސްޕިޓަލުން ބޭސް ފަރުވާ ހޯދި އެންމެންގެ ޑޮކިއުމަންޓް ފައިލްތައް ވަރަށް ފަރުވާތެރިކަމާ އެކު ރައްކާ ކުރެވިފައިވެ އެވެ.
މި ހުރިހާ ވަސީލަތަކާ އެކު އައްޑޫގެ ވަރަށް ގިނަ މީހުންގެ އުފަން ދުވަހުގެ ސެޓްފިކެޓްގައި މި ތަނުގެ ވާހަކަ ލިޔެވިފައިވާ މި ހޮސްޓަލް، ދިވެހިންނާ ހަވާލު ކުރެއްވީ އިނގިރޭސީ ސަރުކާރުން ފޮނުއްވި ހާއްސަ ދެ ޑޮކްޓަރުންނާއި ތަޖުރިބާކާރު މިޑްވައިފްރީ ނާސްއަކާ އެކުގަ އެވެ.
މި ހިސާބުން މި ހޮސްޕިޓަލުގެ މެނޭޖްމަންޓް ބެލެހެއްޓުމާއި ހަވާލު ކުރެއްވީ މާލޭން ފޮނުއްވާފައި ތިއްބެވި ހެލްތު އެސިސްޓެންޓުންނާ އެވެ.
ނަމަވެސް މާ ގިނަ ދުވަސްތަކެއް ނުވެ އެވެ. ނޮވެމްބަރު 23، 1976 ގައި ސުމުއްވުލް އަމީރު އިބްރާހީމް ނާސިރުގެ ސަރުކާރުން ގަމުގެ ހޮސްޕިޓަލް ބަންދު ކުރެއްވީ އެވެ. ކީއްވެގެން ކަމެއް ނޭނގެ އެވެ.
ރައްޔިތުންނަށް މިހާ މުހިއްމު އިންސާނީ ހިދުމަތެއް އެހާ ފުރިހަމަ އަަށް ލިބިދިން މި ހޮސްޕިޓަލް ބަންދުކޮށްލެއްވީ ކީއްވެގެން ކަމާ މެދު އަލްފާޟިލް މޫމިނާ ހަލީމްގެ ހެލްތު މިނިސްޓްރީން ވިޔަސް ވެސް އެއްވެސް ބަޔާނެއް ނުދެއްވަ އެވެ.
ހޮސްޕިޓަލް ބަންދު ކުރެއްވުމަށް ފަހު، ހުރިހާ ސާމާނާއި ތަކެތި ގެންދެވުނީ މާލެއަށެވެ. މި ތަކެތިން މާލޭ ގަވަރަމަންޓް ހޮސްޕިޓަލް ތަރައްގީ ކުރެވުނެވެ. ހޮސްޕިޓަލްގައި ތިބި އިނގިރޭސި ދެ ޑޮކްޓަރުންނާއި މިޑްވައިފްރީ ނާސް އިނގިރޭސވިލާތަށް ފޮނުވާލެވުނެވެ.
ވަރަށް އިތުބާރާ އެކު ހިލޭ އެހީގެ ގޮތުގައި ޔޫރަލްގެ ކުރިއަރާފައިވާ ބޭސް ފަރުވާގެ ހިދުމަތް ލިބި ދިން މި ހޮސްޕިޓަލް ބަންދުކޮށްލެއްވުުމުން 20 އަހަރު ވަންދެން މި ހޮސްޕިޓަލްގެ ފަރުވާ އިން ދުޅަހެޔޮ ސިއްހަތު ހޯދި އައްޑޫ މީހުންނާއި އައްޑޫގެ އަވަށްޓެރިންނަށް ދެންވީ ކީއް ހެއްޔެވެ؟
މި ހޮސްޕިޓަލް ބަންދު ކުރެއްވުމަށް ފަހު، ބައެއް އެހެން އަތޮޅުތަކުގައި ވެސް ހުންނަ ފަދަ ހެލްތު ސެންޓަރެއް ހިތަދޫގައި ހުޅުވައި ދެއްވި އެވެ. ގަމުގެ ހޮސްޕިޓަލް ބަންދު ކުރެއްވިތާ 38 ދުވަސް ފަހުންނެވެ. އެއީ ޖެނުއަރީ 1، 1977 ގަ އެވެ.
މި ދެންނެވީ ރައްޔިތުންނަށް ލިބެމުން އައި ބޭސް ފަރުވާގެ ހިދުމަތް އަވަދިވެ ދިޔަ ގޮތުގެ ވާހަކަ އެވެ.
ގަމުގެ ހޮސްޕިޓަލް ބަންދު ކުރެއްވުމުން އެ ހޮސްޕިޓަލުން ބޭސް ފަރުވާ ހޯދި އައްޑޫ މީހުންނަށް ގޮތް ހުސްވި އެވެ. އެ ދުވަސްވަރު ފަސްޓް އެއިޑްގެ ފެންވަރުގައި ހިތަދޫގައި ހުޅުވާ ދެއްވި ހެލްތު ސެންޓަރުގެ ވާހަކަ ވެސް ތިޔަ އެއްސެވީ އެވެ. ދެރައީ އައްޑޫ މީހުންގެ ބޭސް ފަރުވާގެ ކަންތައް މިހާ ދެރަ ގޮތަކަށް އިހުމާލުވެފައި ވަނިކޮށް، ޔުނިސެފުން މި ހަދިޔާ ކުރި ފުރަތަމަ ހޮސްޕިޓަލް ވެސް އައްޑު އަށް ދެއްވަން ރުހިވަޑައިނުގަތް ކަމެވެ.
އޭގެ ދެވަނަ ހޮސްޕިޓަލް ހުޅުވުމަށް ފަހު، އައްޑޫ މީހުންނާ ހަމައަށް މި އައީ ތިން ވަނަ ފުރުސަތެވެ. ގަމުގެ ހޮސްޕިޓަލް ބަންދު ކުރެއްވިތާ ހަތް އަހަރު ފަހުން މި ހުޅުވުނު ހޮސްޕިޓަލްގެ ފެންވަރާ މެދު އައްޑޫ މީހުން ތިބީ ހިތްހަމަޖެހިގެނެއް ނޫނެވެ.
އެކަށީގެންވާ ބޭދް ފަރުވާގެ ހިދުމަތް ނުލިބި މި ވޭތުވެ ދިޔަ ދިގު މުއްދަތުގައި ރައްޔިތުން ބޭސް ސިޓީ އަށް ސަލާން ޖަހަމުން ބިކަ ހިނގީ އެވެ. އެ ދުވަސްވަރު ވެލްފެއާގެ ކުރިމަތީގައި ދަމާލެވިފައި އޮންނަ ކިއޫގައި އެންމެ ގިނައީ އައްޑޫ މީހުންނޭ ބުންޏަސް ދޮގަކަށް ނުވާނެ އެވެ.
ވޭތުވެ ދިޔަ އަހަރުތަކުގެ ތެރޭގައި މަޑުމަޑުން ނަމަވެސް އައްޑޫގެ ހޮސްޕިޓަލް އައީ ތަރައްގީވަމުންނެވެ. އެ ހޮސްޕިޓަލް ހުޅުވުނުތާ އަށް އަހަރު ފަހުން ކަމުގައި ވިޔަސް ލެބޯރެޓަރީގެ ހިދުމަތް ލިބެން ފެށުމާ އެކު، 1992 ވަނަ އަހަރު މި ހޮސްޕިޓަލުގައި އޮޕަރޭޝަން ތިއޭޓަރެއް ވެސް ހުޅުވުނެވެ.
ނަމަވެސް ހޮސްޕިޓަލް ހުރި ބިމުގެ ޖާގަ ހުސްވުމާއި އަދި މިތަން އިމާރާތްކޮށްފައި ވަނީ މިފަދަ ކަމަކަށް އެކަށޭނެ ބިމެއްގައި ނޫން ކަމަށް ސަރުކާރަށް ވެސް ފަނިވަޑައިގަތެވެ. ވުމާ އެކު ހިތަދޫގެ ރަނގަޅު ހިސާބެއްގައި އެކަށީގެންވާ ރަނގަޅު ފެންވަރުގެ ހޮސްޕިޓަލެއް އެޅުމަށް ނިންމެވި އެވެ.
ނަމަވެސް އެކަމަށް ބިމެއް ހުސްކޮށްފައި އޮންނަތާ 10 ވަރަކަށް އަހަރު ފަހުން މައުމޫނުގެ ވެރިކަން 30 އަހަރު ފަހުން ނިމިގެން ދިޔައީ ވެސް އައްޑޫ މީހުން މި ހޮސްޕިޓަލްގެ ހުވަފެން ދެކެނިކޮށެވެ.
އިސްލާމިކް ޑިވެލޮޕްމަންޓް ބޭންކް (އޭޑީބީ) ގެ ލޯނު އެހީގެ ދަށުން ހިތަދޫގައި އެޅުމަށް ހަމަޖެހިފައިވާ 2.6 މިިލިއަން ޑޮލަރުގެ 100 އެނދުގެ ހޮސްޕިޓަލްގެ މަޝްރޫއު އޮތީ ޓެންޑާ މަރުހަލާގައި ކަމަށް ހެލްތު މިނިސްޓްރީން ބަޔާން ކުރެއްވީ 2008 ގެ ޖޫން މަހުގެ ތެރޭގަ އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސްކުރަމެވެ.