ބޮލީވުޑްގެ ޒުވާން އެކްޓަރު އިމްރާން ހާނަށް ކުއްޖަކު ލިބެން އުޅޭތީ އޭނާ ހުރީ ވަރަށް އުފަލުންނެވެ.
އާމިރް ހާނަށް ބޮޑު ބޭނެ ކިޔާ އިމްރާނާއި އޭނާގެ ކުޑައިރުގެ ލޯބިވެރިޔާ އަވަންތިކާ ކައިވެނި ކުރީ 2011 ވަނަ އަހަރު އެވެ.
ބައްޕައަކަށް ވާން އުޅޭތީ، އިމްރާންގެ ހުރިހާ ވަގުތެއް ވެސް މިހާރު ވަނީ އަންހެނުންނާ ދިމާއަށް މިސްރާބު ޖަހައިފަ އެވެ. މި ދުވޮސްކޮޅު އޭނާ އެއްވެސް ފިލްމެއްގައި މަސައްކަތެއް ވެސް ނުކުރެ އެވެ. އަދި އާ ފިލްމަކަށް ސޮއެއް ވެސް ނުކުރެ އެވެ.
އިމްރާންގެ އެންމެ ފަހުން ރިލީޒްވި ފިލްމަކީ މިދިޔަ އަހަރުގެ ފަހުކޮޅު ރިލީޒްވި، ކަރީނާ ކަޕޫރާ އެކު ލީޑް ރޯލް ކުޅުނު "ގޯރީ ތެރޭ ޕިޔާރު މޭ" އެވެ. އެކަމަކު އެއީ ބޮޑު ފްލޮޕެކެވެ.
އިމްރާން ބުނީ އޭނާ މި ވަގުތު ހުރީ "ބޭބީމޫން" ޗުއްޓީއެއްގައި ކަމަަށެވެ.
"ވަރަަށް ވަރަށް ދިގު ޗުއްޓީއެއްގައި އަހަރެން މި އުޅެނީ. މި ޗުއްޓީ ދެމިގެން ދާނެ އަހަރުގެ ފަހުކޮޅާ ހަމައަށް. ބައްޕައަކަށް ވާން އުޅޭތީ ވަރަށް އުފަލުން މި ހިރީ. ދަރިއަކު ލިބެން އުޅޭތީ މި ލިބޭ އުފާވެރި ދުވަސްކޮޅު އަހަރެންނާއި އަންހެނުން ސިފަ ކުރަނީ ބޭބީމޫންއެއްގެ ގޮތުގައި. ކައިވެންޏަށް ފަހު އަހަރެން އުޅުނީ ހަނީމޫންއެއްގައި،" އިމްރާން، 31، ބުންޏެވެ.
އިމްރާންގެ އަންހެނުން އަވަންތިކާ ވިހާނެ ކަމަށް ލަފާކޮށްފައި ވަނީ އަންނަ ޖޫން މަހުގެ ތެރޭގަ އެވެ.