ކޮންމެ އިންސާނަކު ވެސް ދުޅަހެޔޮ ޞިއްޙަތަކަށްޓަކައި ކަސްރަތު ކުރުމަކީ ވަރަަށް މުހިންމު ކަމެކެވެ. އެހެން ނަމަވެސް އަޅުގަނޑުމެންގެ ތެރެއިން ގިނަ މީހުންނަކީ ކަސްރަތާ ވަރަށް ދުރުހެލި ބައެކެވެ.
ކަސްރަތާ ދުރު ހެލިވާ އެތައް ސަބަބުތަކެއްވެ އެވެ. އަނިޔާގެ ސަބަބުންނެވެ. ވަޒީފާގެ ބުރަކަމުންނެވެ. ކުރަން ހުންނަ އަމިއްލަ އެހެނިހެން ކަންތައްތައް ގިނަވީމަ އެވެ. ކުރާހިތް ނުވާތީ ވެސް މެ އެވެ. މި ގޮތަށް އެތަކެއް ސަބަބެކެވެ.
ދުނިޔޭގެ ކުރިއަރާފައިވާ، އަދި އަރަމުން އަންނަ ޤައުމުތަކުން ދުޅަހެޔޮ ސިއްޙަތަކަށް ކަސްރަތުގެ މުހިންމުކަން ދަނެއެވެ. އަދި ޙައްލު ނުކުރެވިއްޖެއްޔާ އެތަކެއް ދަތިތަކެއް ކުރިމަތިވާނެކަން ވެސް އެނގެ އެވެ.
ކަސްރަތާ ދުރުހެލިވާ ވަރަކަށް، ބަލިތައް އިތުރުވެ އެވެ. ގިނަ ބަލިތަކުގެ ޝިފާއަކީ، ޤަވާއިދުން ކަސްރަތުކުރުމެވެ. އެހެންކަމުން، ކަސްރަތުގެ މުހިންމުކަން މީސްތަކުންނަށް ވިސްނައި ދިނުމަށް އެތަކެއް ޕްރޮގްރާމުތަކެއް ރާވައި ހިންގަ އެވެ. މީޑިއާ ބޭނުން ކޮށްގެންނެވެ. ލެކްޗާސް އަދި ވާކްޝޮޕްތައް ރާވާ ހިންގައިގެންނެވެ. ކަސްރަތަށް އަހުލުވެރި ކުރުވުމުގެ ގޮތުން، އެކި ކުޅިވަރު މުބާރާތްތައް ރާވައިގެންނެވެ.
ދުޅަހެޔޮ ޞިއްޙަތެއްގައި ހުންނަން ބޭނުންނަމަ ޚާއްޞަކޮށް ކަސްރަތަށް ލޯބި ކުރަން ޖެހެ އެވެ. ހަށިގަނޑު ފިޓްނުވެ، ބުރަ މަސައްކަތް ކުރުމަށް އެތަކެއް ގޮތްގޮތުން ހުރަސް އެޅެ އެވެ. އަވަހަށް ވަރުބަލިވުމާއި، ރުޅިއައުން ހިމެނެ އެވެ. ވަރުބަލިވުމުން، ނިންމާ ނިންމުންތައް ގޯސްވާތަން އާދެ އެވެ.
ކަންމިހެން އޮތް އިރު އަޅުގަނޑުމެން ކަސްރަތާ މެދު ދެކޭގޮތް ބަދަލުކޮއްގެން މެނުވީ ދުޅަހެޔޮކޮށެއް ނުތިބެވޭނެ އެވެ. ބޭހެއް ނުވަތަ ފަންޑިތައަކުން ދުޅަހެޔޮކޮށް، ފިޓްކޮށް ނުތިބެވޭނެ އެވެ.
ހަމައެކަނި އޮތް ހައްލަކީ، ކަސްރަތާއި މެދުދެކޭ ގޮތް ބަދަލުކޮށް، ޤަވާއިދުން ކަސްރަތު ކުރުމެވެ. ކުރަން ފޫހިވިއަސް، ޞިއްޙަތަށް ފައިދާހުރި ކަމެއްކަން ދެކި ކޮންމެ ދުވަހަކު ތިރީހަކަށް މިނެޓް ހޭދަ ކުރުމުން ފުދޭނެ އެވެ. ޤަވާއިދުން ކަސްރަތު ކުރަނީ ނަމަ، މަދުވެގެން މީހެއްގެ އުމުރުން 10 ވަރަކަށް އަހަރު އިތުރު ކުރެވޭނެ އެވެ. ހަމައެހެންމެ، ދުނިޔޭގައި އުޅޭއިރު ހެލިފެލިވެ، ހިތްވަރު ގަދަކޮށް އުޅެވޭނެ ވެސް މެ އެވެ.
އަދި އަމުދުން ކުރީގައި ކަސްރަތު ޤަވާއިދުން ކުރަމުން އައިސް "ދެން ނުވާނޭ" ކިޔައިގެން އެކަން ދޫކޮށްލުމަކީ ހެޔޮވާވަރުގެ ކަމެއް ނޫނެވެ. އުމުރުން ދުވަސްވުމުން ނުކޮށް ހުއްޓާލާވަރުގެ ކަމެއް ވެސް ނޫނެވެ. ކުރަން ލަދުގަންނަ ވަރުގެ ކަމެއް ވެސް ނޫނެވެ. ވަކި މީހަކު ބުނީމަ ކުރަން މަޑު ކުރާވަރުގެ ކަމެއް ވެސް ނޫނެވެ.
ހެޔޮ ބަދަލުތައް ވެސް އެބަ ފެނެ އެވެ. ފަތިހު، ހަވީރު އަދި ރޭގަނޑު ކަސްރަތު ކުރާ މީހުން ދުވަހުން ދުވަހަކަށް ގިނަވާކަން ފާހަގަ ކުރެވެ އެވެ.
ކަސްރަތާ މެދު ދެކޭގޮތް ބަދަލުވާކަން ފާހަގަ ކުރެވެ އެވެ. އެހެނަސް އެކަން ކުރުވުމުގެ ޒިންމާ އޮންނަ ފަރާތްތަކަށް އެކަން އިތުރަށް ކުރުވަން މަސައްކަތް ކުރަން ޖެހެ އެވެ. އެހެންކަމުން، ކަސްރަތާ މެދު ދެކޭ ގޮތް، ހުރިހާ އެންމެން ވެސް ބަދަލު ކުރެވޭތޯ ބެލުމަކީ އޮތް ކަމެކެވެ.