ކަންގަނާ ރަނާވަތު އާދަޔާހިލާފު ރޯލަކުން ފެނިގެންދާ "ރިވޯލްވާ ރާނީ" ގެ ފުރަތަމަ ޓްރެއިލާ މިއަދު ލޯންޗްކޮށްފި އެވެ.
މި ފިލްމުން ކަންގަނާގެ އިތުރުން ވީރް ދާސް، ޒާކިރު ހުސައިންގެ އަދި ޕިޔޫޝް މިޝްރާ ފަދަ ތަރިން މުހިއްމު ރޯލްތަކުން ފެނިގެން ދާނެ އެވެ.
ކާމިޔާބް ފިލްމްތަކުގެ ތެރޭގައި ހިމެނޭ "ސާހިބު ބީވީ އޯރް ގުލާމް" އަދި "ޕާން ސިންގް ތޯމަރު" ފަދަ ފިލްމްތައް ބެލުންތެރިންނާ ހަމައަށް ގެނެސް ދީފައިވާ ޓިގްމާންޝޫ ދޫލިއާ ޕްރޮޑިއުސްކޮށްފައިވާ، "ރިވޯލްވާ ރާނީ" ޑައިރެކްޓްކޮށްފައި ވަނީ ސައި ކަބީރެވެ.
މި ފިލްމުގައި ދައްކުވައި ދޭނީ އަންހެން ގޭންގްސްޓާރެއްގެ ދިރިއުޅުމެވެ. އެގޮތުން "ރިވޯލްވާ ރާނީ" ގެ ގޮތުގައި ކަންގަނާ ފެނިގެން ދާނީ މީގެ ކުރިން ސްކްރީނުން އޭނާ ފެނިގެން ގޮސްފައިވާ ނުވާ ވަރުގެ "ޑިގްލަމް" ރޯލަކުންނެވެ. އަދި އޭނާ ފެނިގެން ދާނީ ވެސް ވަރަށް ތަފާތު ކޮސްޓިއުމްތަކާ އެކުގަ އެވެ.
"ރިވޯލްވާ ރާނީ" ސިނަމާތަަކަށް އަންނާނީ އަންނަ އެޕްރީލް މަހުގެ ތެރޭގަ އެވެ. އެހެން ނަމަވެސް ފިލްމް ރިލީޒް ކުރާނެ ދުވަހެއް އަދި ރަސްމީކޮށް ނުނިންމަ އެވެ.
މި ފިލްމުގެ ޓްރެއިލާ މިއަދު ލޯންޗް ކުރި އިރު، ކަންގަނާގެ މޮޅު އެކްޓިންއެއް ގެނިގެން ދާ "ކުއީން" މާދަމާ ސިނަމާތަކަށް އަންނާނެ އެވެ.
މި ފިލްމު ބެލި ކްރިޓިކުން ވަނީ ކަންގަނާގެ އެކްޓިންއަށާއި ފިލްމަށް ވަރަށް ބޮޑަށް ތައުރީފުކޮށްފަ އެވެ.