(މާޗް 6، 2014 ވަނަ ދުވަހުގެ ބަޔާ ގުޅޭ)
މިފަދަ ހޮސްޕިޓަލެއްގެ ބޭނުން ޖެހިފައިވާ ބޮޑުކަމުންނާއި އައްޑޫގެ ވަރަށް ގިނަ ބައެއްގެ އެދިލެއްވުމާ އެކު ވެސް ހިތަދޫގައި މިހާރު ވަނީ އަމިއްލަ ފަރާތަކުން ހޮސްޕިޓަލެއް ހުޅުވައިފަ އެވެ. ރީޖަނަލް ހޮސްޕިޓަލަށް ވުރެ ފެންވަރުގަ އެވެ.
އިންޓަނެޝަނަލް މެޑިކަލް އެންޑް ޑައިގްނޯސް ސެންޓަރު (އައިއެމްޑީސީ) އަކީ ރާއްޖޭގެ މަޝްހޫރު ވިޔަފާރި ކުންފުންޏެއް ކަމަށްވާ ސިމްޑީގެ މެނޭޖްމަންޓުން ހުޅުވި ހޮސްޕިޓަލެކެވެ.
މި ހޮސްޕިޓަލް ހުޅުވުމުގެ ސަބަބުނ ރީޖަނަލް ހޮސްޕިޓަލަށް ވެސް ދަތުގެ ކްލިނިކް ހުޅުވުން ފަދަ ކުރިއެރުންތައް އަންނަން ފެށިކަން ފާހަގަ ކުރެވިގެން ދިޔަ އެވެ. ސިއްހީ ދާއިރާ މަޑުމަޑުން ނަމަވެސް އެއް ދުވަހުން އަނެއް ދުވަހަށް އައީ ކުރިއަރަމުންނެވެ.
ޑަބްލިއުއެޗްއޯ އާއި ޔުނިސެފް ފަދަ ޖަމާއަތްތަކުން ދިވެހި ރާއްޖެ ފަދަ ތިން ވަނަ ދުނިޔޭގެ ފަގީރު ގައުމުތަކުގެ ސިއްހީ ފަރުވާގެ ހާލަތު ރަނގަޅު ކުރަން ވެދިން އެހީގެ ޕްރޮގްރާމްތަކުގެ ތެރެއިންނެވެ.
މި މުއްދަތުގެ ތެރޭގައި ބޭސް ފަރުވާ އަށް ނުކުޅެދިފައިވާ ނިކަމެތިންނަށް އެހީތެރިކަން ދެއްވުމަށް ފުޅާ ކުރެއްވި ވެލްފެއާގެ ބަޖެޓާއި ތީމުގެ ދީލަތި އެހީގެ މިންވަރު އެތައް މިލިއަން ރުފިޔާ އަށް އަރައިގެން ދިޔަ އެވެ. މި ހުރިހާ ފައިސާއެއްގެ ބޮޑު ބައި ގައުމުން ބޭރުވެ ދިޔައީ އެވެ. އިންޑިއާ އާއި ލަންކާ ފަދަ ގައުމުތަކުން ބޭސް ފަރުވާ ހޯދުމަށެވެ.
މި ދުވަސްތަކުގެ ތެރޭގައި އިންޑިއާ ސަރުކާރާ އެކު ވެވުނު އެއްބަސްވުމެއްގެ ދަށުން އިންޑިއާގެ އެހީ އާ އެކު އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ހުޅުވި، އެ ހޮސްޕިޓަލުން އެތަކެއް ހިދުމަތްތަކެއް ކުރެވެން ފެށި އެވެ. އަދި މާލޭ ގަވަރަމަންޓް ހޮސްޕިޓަލް ކުއްޔަށް ދިނެވެ.
ނަމަވެސް ބޭސް ފަރުވާ އަށް ބޭރު ގައުމުތަކަށް ދާން ޖެހޭތީ ރައީސް މައުމޫންގެ ސަރުކާރަށް ފާޑު ކިޔާ މީހުން އެންމެ ބާރަށް ދެއްކި އެއް ވާހަކައަކީ އާންމު ރައްޔިތުންނަށް ބޭސް ސިޓީ އަށް ސަލާން ޖެހުން އާންމު ވާހަކަ އެވެ. ވުމާ އެކު އެ މަނިކުފާނުގެ އެންމެ ފަހު ދައުރު މިކަމަކަށް ހައްލެއް ހޯއްދެވުމުގެ މަސައްކަތް ފެއްޓެވި އެވެ.
ހެލްތު އިންޝޫރަންސްގެ ނިޒާމެއް ތައާރަފް ކުރައްވައިގެންނެވެ. ހިލޭ ބޭސް ދެއްވުމާ އެކުގަ އެވެ. އަށެއްކަ އަހަރު ވަންދެން މި ނިޒާމް ތައާރަފް ކުރެއްވުމުގެ މަސައްކަތް ކުރެއްވި އެވެ. ދެހާސް ހަ ވަނަ އަހަރު ފެއްޓެވުމަށެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސްކުރަމެވެ.