ލާމަރުކަޒި ގާނޫނުގައި ކައުންސިލަރުންނަށް ލާޒިމް ކުރަނީ ދާއިރާގެ ރައްޔިތުންނާއި ބައްދަލުކޮށް، އެ ބޭފުޅުންގެ މަޝްވަރާ އާއި އެކު ދާއިރާގެ ތަރައްޤީގެ ޕްލޭން އެކުލަވާލައި ބަޖެޓް ހަދައި ދާއިރާ ތަރައްޤީ ކުރުމަށެވެ.
ފާއިތުވި ކައުންސިލްގެ 3 އަހަރުގެ ދައުރު ނިމިގެން ގޮސްފައިވަނީ މިފަދަ އެއްވެސް ބައްދަލުވުމެއް ރައްޔިތުންނާއި ނުކުރެވިއެވެ. ނަމަވެސް އައްޑޫ ސިޓީ ކައުންސިލްގެ 2 ވަނަ ދައުރުގެ ހުވާކުރުމުގެ ރަސްމިއްޔާތަށް ފަހު ބޭއްވި ނޫސްވެރިންގެ ބައްދަލުވުމުގައި ރައްޔިތުންނާއި ބައްދަލުކޮށް މަޝްވަރާ ކުރާނެކަމަށް ހުރިހާ ކައުންސިލަރުންވެސް ވަނީ ވައުދުވެފައެވެ.
އޭގެ ފުރަތަމަ ބައްދަލުވުން ރޭ ނޫރާނީ ސްކޫލްގައި ބޭއްވީ މެދު ދާއިރާގެ ރައްޔިތުންނަށެވެ. ކައުންސިލް އިދާރާގެ މުވައްޒަފުން ބައްދަލުވުމުގެ ވާހަކަ އާއްމުކޮށް އަޑުގަދަ ކުރާ ބޭނުންކޮށްގެން ދައުވަތު އެރުވި އިރު ސޯޝަލް މީޑީއާގައި ބައްދަލުވުން އޮތް ތަނާއި ގަޑި ދިޔައީ އިއްލާން ކުރެވެމުންނެވެ. ނަމަވެސް ހިތާމައަކީ ރޭގެ ބައްދަލުވުމަށް ހާޒިރުވެފައިވަނީ ވަރަށް މަދު ބައެއް ކަމެވެ.
ރޭގެ ބައްދަލުވުމުގައި އެޖެންޑާ ކުރެވިފައިވަނީ އިދާރީ ގޮތުން ކައުންސިލް ހިންގަމުން އަންނަ އިރު އިދާރީ މުވައްޒަފުންގެ ދައުރާއި އެމުވައްްޒަފުން ކައުންސިލްގައި އަދާކުރާ ރޯލާއި، ކައުންސިލްގެ ބަޖެޓާއި، ބަޖެޓް އެކުލަވާލުމުގައި އިދާރީ މުވައްޒަފުންނާއި ކައުންސިލަރުން ކުރާ މަސައްކަތް ބަޔާންކޮށްދޭ ޕްރެސެންޓޭޝަނަކާއި، ދާއިރާގެ ކައުންސިލަރު ހުސެއިން ހިލްމީގެ ވާހަކަ ފުޅަކާއި، ފުލުހުންގެ ދެކުނު ޑިވިޝަން ކޮމާންޑާރ ޗީފް އިންސްޕެކްޓަރ އޮފް ޕޮލިސް އަހުމަދު ޝިފާންގެ ވާހަކަ ކޮޅަކާއި، ރައްޔިތުންނަށް ސުވާލު ކުރުމުގެ ފުރުސަތު ހުޅުވާލާ ގޮތަށެވެ.
އެގޮތުން ކައުންސިލްގެ ޒިއްމާދާރުވެރިއާ މުހައްމަދު ސައުދީ ހަސަން ފާއިތުވި ކައުންސިލުން ކުރެވުމުނު މަސައްކަތާއި، ކުރިމަތިވި ގޮންޖެހުންތަކުގެ ވާހަކަ ފުރިހަމަ ގޮތެއްގައި ރައްޔިތުންނާއި ހިއްސާކުރެއްވިއެވެ. އެގޮތުން ސައުދީ ފާހަނަގަކުރެއްވި އެންމެ ބޮޑު މައްސަލައަކީ ކައުންސިލަށް ބޭނުންވާ އިދާރީ މުވައްޒަފުންގެ ތެރެއިން ދެބައިކުޅަ އެއްބައި މުވައްޒަފުން ނުލިބި ހިދްމަތް ދޭން ޖެހޭ މައްސަލައެވެ. އަނެއް މައްސަލައަކަށް ފާހަނގަ ކުރެއްވީ ކަައުންސިލުން ބަޖެޓް ކުރާ ފައިސާ ކައުންސިލަށް ނުލިބޭ މައްސަލައެވެ.
ކައުންސިލަރު ހުސެއިން ހިލްމީ ފާއިތުވި ދައުރުގައި ރައްޔިތުންނާއި ބައްދަލު ނުކުރެވޭ ކަމަށް އިއްތިރާފްވެ މި ދައުރުގައި މިފަދަ އެތައް ބައްދަލުވުމެއް ދާއިރާ ރައްޔިތުންނާއި ކުރާނެކަމަށް އަނެއްކާވެސް ވައުދުވިއެވެ. ހުސެެއިން މައިގަނޑު ގޮތެއްގައި ފާހަނގަ ކުރީ މި ދައުރުގައި އައްޑޫގައި ރައްޔިތުންނަށް ހިދްމަތް ދިނުމަށް އުފައްދާފައިވާ މުވައްސަސާތަކާއި ގާތް ގުޅުމެއް ބާއްވައި ރައްޔިތުންނަށް ފޯރުކޮށްދޭން ޖެހޭ އަސާސީ ހިދްމަތް ދިނުމަށް ބާރު އަޅާނެކަމަށެވެ.
ރައްޔިތުންގެ ސުވާލުތަކަށް ހުޅުވާލުމާއި ގުޅިގެން ވާހަކަ ދެއްކެވި ހުރިހާ ބޭފުޅުންވެސް ވަނީ މިފަދަ ގޮތަކަށް ރައްޔިތުންނާއި ބައްދަލު ކުރީތީ އުފާ ކުރާ ކަމަށް ބުނެފައެވެ. އަދި މަގުގެ ދެފަރާތުގަިއ ވިނަ ހެދި މަގު ހަޑިވާ މައްސަލަ އާއި ކުލިވަރު ކުޅޭ ބިންތައް ނުބެލެއްޓޭ މައްސަލައާއި، މަގުބައްތި ނުދިއްލޭ މައްސަލަ އާއި، ކޮންވެންޝަން ސެންޓަރު ފަނާވާން ދޫކޮށްލާފައިވާ މައްސަލަ އާއި، ހިތަދޫ ކޮމްޕްރަހެންސިވް ސްކޫލް ފަޅަށް ހުންނަ މައްސަލަ އާއި ކުޑަކުދިންގެ ޕާކުން ރަނގަޅު ހިދްމަތެއް ނުލިބޭ ކަމުގެ ޝަކުވާ ވަނީ ކައުންސިލަށް އަމާޒުކޮށްފައެވެ.
އަދި ފަސް އަހަރަށް ވުރެ ގިނަ ދުވަސްވެފައިވާ ބިން ބިން ވަކިކޮށް ނުދެވޭ މައްސަލަވެސް ވަނީ ކައުންސިލަށް އަމާޒުކުރެވިފައެވެ.
ކޮމްޕްރަހެންސިވް ސްކޫލާއި ބެހޭގޮތުން ބައްދަލުވުމުގައި އައްޑޫގެ މޭޔަރ އަބްދުﷲ ސޯދިގް (ސޯބެ) ވިދާޅުވީ އޭނާއަކީ ކޮމްޕްރަހެންސިވް ސްކޫލްގެ ބޯޑު މެމްބަރެއް ކަމަށާއި، ބޯޑުގެ ވިސްނުން އަބަދުވެސް އޮތީ އެތަނުން އައްޑޫއަށް ހިދްމަތް ކޮށް ދިނުމަށް ކަމަށެވެ. އަދި އޭރު ސްކޫލް އުފެއްދި މަގްސަދު މިހާރު ހާސިލް ކުރެވެން ނެތްކަމަށް ވިދާޅުވިއެވެ.
ސޯބެ ވިދާޅުވީ ކޮމްޕްރަހެންސިވް ސްކޫލް އުފެއްދީ އޭރު ސެކަންޑަރީ ތައުލީމް ހާސިލް ކުރުމަށް ފުރުސަތު ނެތް ކުދިންނަށް ފުރުސަތު ދިނުމަށް ކަމަށެވެ. އަދި މިހާރު ސަަރުކާރުގެ ތައުލީމީ ސިޔާސަތުގެ ދަށުން އެއްވެސް ކުއްޖަކު ބާކީ ނުވެ އޯލެވެލް ނިންމޭ ގޮތަށް އޮތުމުން ކޮމްޕްރަހެންސިވް އަކަށް ދެން ފުރުސަތެއް ނެތް ކަމަށެވެ.
ނަމަވެސް ކޮމްޕްރަހެންސިވް އެގޮތަށް ފަޅަށް ނުބާއްވާނެކަމަށް ސޯބެ ވިދާޅުވިއެވެ.
ރޭގެ 11 ޖަހަންދެން ކުރިއަށް ގެންދިޔަ މި ބައްދަލުވުމުގައި ރައްޔިތުންގެ ސުވާލުތަކަށް ފުރުސަތު ދިން ނަމަވެސް ދާއިރާގެ މަދު ބަޔަކު ތިބުމުން އެކަން ވަރަށް ބޮޑަށް ފާހަނގަވެގެން ގޮސްފައިވެއެވެ.
ދެކުނު ދާއިރާގެ މިފަދަ ބައްދަލުވުމެއް މި މަހުގެ 9 ވަނަ ދުވަހުގެ ރޭ ޝަރަފުއްދީން ސްކޫލް ހޯލްގައި ބޭއްވުމަށް ކައުންސިލުން ވަނީ ނިންމާފައެވެ.