އައްޑޫ ސިޓީ ކައުންސިލްގެ ޑެޕިއުޓީ މޭޔަރ މުހައްމަދު ޝުއާއު އާއި މަރަދޫ ދާއިރާގެ ކައުންސިލަރު އަހުމަދު ނާދިރު ކުޅޭގޮތަށް ކައުންސިލުން ފުޓްބޯޅަ ޓީމެއް ހަދައި 16،000 ހަރަދު ކުރުމަށް އައްޑޫ ކައުންސިލުން މިއަދު ފާސްކޮށްފިއެވެ.
އިތުރު ހަރަދުތަކެއް ކޮށް މިއަދު ހިތަދޫ ނޭޗަރ ޕާކުގައި ބޭއްވި ކައުންސިލްގެ ބައްދަލުވުމުގައި ކައުންސިލުން ފުޓްބޯޅަ ޓީމެއް ނެރުމަށް ނިންމާފައިވަނީ ދި ފޭދޫ ސްޕޯޓްސް ކުލަބުން ފޭދޫގައި އިންތިޒާމު ކުރާ ފުޓްބޯޅަ މުބާރާތުގައި ބައިވެރިވުމަށެވެ. މިއަދުގެ ބައްދަލުވުމަށް ޓީމު ބައިވެރިވުމުގެ މައްސަލަ ހުށަހެޅީ ކައުންސިލްގެ ސްޕޯޓްސް ކޮމެޓީގެ މުގައްރިރު މަރަދޫ ދާއިރާގެ ކައުންސިލަރު އަހުމަދު ނާދިރުއެވެ.
ނާދިރު މައްސަލަ ހުށަހަޅަމުން ވިދާޅުވީ ދި ފޭދޫ ސްޕޯޓްސް ކްލަބުއިން އިންތިޒާމު ކުރާ ދިފޭދޫ ސްޕޯޓްސް ކަޕް 2022 ގައި ޓީމުތައް ބައިވެރިވުމުގެ ފުރުސަތު ހުޅުވާލުމާއި ގުޅިގެން ކައުންސިލުން ޓީމެއް ހެދުމަށް މުވައްޒަފުން ބޭނުންވާތީ އެކަމަށް ގޮތެއް ނިންމައި ޓީމުގެ ހަރަދު ކައުންސިލުން ހަމަޖައްސައި ދިނުމަށެވެ.
ނާދިރު ވިދާޅުވީ މިކަމަށް 16850 ރުފިޔާ ހަރަދު ހިނގާނެކަމަށެވެ. މިމައްސަލައަށް ތާއިދު ކުރެއްވީ ހިތަދޫ މޫލެކެޑެ ދާއިރާގެ މެމްބަރު އަހުމަދު ސައީދުއެވެ. މައްސަލައަށް ތާއިދުކޮށް ވާހަކަ ދައްކަވަމުން އަހުމަދު ސައީދު ވިދާޅުވީ މިކަމަކީ ކައުންސިލްގެ މުވައްޒަފުންގެ މެދުގައި އެކުވެރިކަން އާލާ ކުރުމަށް މުހިއްމު ކަމެއް ކަމަށާާއި، ކައުންސިލްގައިވެސް އަދި ކައުންސިލް އިދާރާގައިވެސް ރަނގަޅު ކުޅުންތެރިން ތިބި ކަމަށެވެ.
މި މައްސަލައަށް ބަހުސް ކުރަމުން ޑެޕިއުޓީ މޭޔަރ މުހައްމަދު ޝުއާއު ވިދާޅުވީ ކައުންސިލްގެ ޓީމު ވަރުގަދަ ކުރުމަށް ކުރީގެ ގައުމީ ޓީމުގެ މިޑްފީލްޑަރ ޝަމްވީލް ގާސިމް ބޮންޑާ އާއި ހިތަދޫ ބޭރުމަތި ޓީމުގެ ޑިފެންޑަރ މުހައްމަދު ސާޖިދު ސައްޖު) ޓީމަށް ގެނެސްފައިވާ ކަމަށެވެ.
އައްޑޫ ކައުންސިލަކީ ފައިސާ ނެތްކަމަށް ބުނެ އަބަދުވެސް ވާހަކަ ދައްކާ ކައުންސިލެކެވެ. ފަހަކަށް އައިސް ރައްޔިތުންނާއި ގުޅުން ހުރި ކަންކަން ނުކުރެވޭ ކައުންސިލަށް ރައްޔިތުންގެ ބޮޑު ފާޑު ކިޔުންތައް ދަނީ އަމާޒުވަމުންނެވެ.