ހުޅުދޫގެ އިތުރު މަގެއްގައި ގާ އަތުރައިގެން ހެދުމުގެ މަސައްކަތް މިއަދު ފަށަައިފި އެވެ.
މިކަމަށްޓަކައި މިއަދު ހަވީރު އެ ރަށުގައި ބޭއްވި ރަސްމިއްޔާތުގައި މަގު ހެދުން ފައްޓަވައި ދެއްވީ މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރްޑީސީ) ގެ ޗެއާމަން ހާލިދު އަބްދުﷲ އެވެ.
މިއަދު ހަދަން ފެށި ހުޅުދޫ ބޮޑު މަގުގައި ހުންނަ ސްކޫލް ގޯޅިތެރެ މަގެވެ.
އެމްއާރްޑީސީގެ މެނެޖިން ޑިރެކްޓަރު އިބްރާހީމް ނަޒީހު ވިދާޅުވީ ކުރިއާ ހިލާފަށް މި ފަހަރު މަގުތަކުގައި ގާ އަތުރަކީ ކާނުތައް ވެސް ބަހައްޓައިގެން ކަމަށެެވެ. އަދި އެގޮތަށް މަގު ހަދަން ނިންމީ ހައުސިން މިނިސްޓްރީ އާ ވެސް މަޝްވަރާކޮށް، މަގު ހަދަން އެންމެ ރަނގަޅީ، ފެން ހިއްދޭ ގޮތަށް ކާނުތައް ބަހައްޓައިގެން ކަމަށްވާތީ ކަމަށް އޭނާ ވިދާޅުވި އެވެ.
ނަޒީހު ވިދާޅުވީ ކުރިއަށް އޮތް ތަނުގައި ހުޅުމީދޫގެ އިތުރުން ހިތަދޫގެ މަގުތައް ވެސް ނުހުއްޓި ކުރިއަށް ދާނެ ކަމަށެވެ.
މަގު ހަދަން ފެށުމުގެ ރަސްމިއްޔާތުގައި އައްޑޫ ސިޓީ ކައުންސިލްގައި ހުޅުމީދޫ ދާއިރާ ތަމްސީލް ކުރައްވާ އަލީ މުހައްމަދު (އައްދު) ވިދާޅުވީ މިއަދަކީ ހުޅުދު އަށް ވަރަށް އުފާވެރި ދުވަހެއް ކަމަށެވެ. އަދި ސަރުކާރުން ކުރިއަށް ގެންދާ މިފަދަ މަޝްރޫއުތަަކަށް، ކައުންސިލުން އަބަދު ވެސް އެހީތެރިކަން ދެއްވާނެ ކަމަށް ވިދާޅުވި އެވެ.