ރާއްޖޭގެ އެންމެ ދަށް މުސާރަ އަކީ 4،500ރ. ކަމަށް އެމްޑީޕީން ކަނޑައެޅި ނަމަވެސް، މިމަހުން ފެށިގެން އަސާސީ ޕެންޝަންގެ ގޮތުގައި 5000ރ ސަރުކާރުން ދޭން ފެށުމާ ގުޅިގެން ރާއްޖޭގެ އެންމެ ދަށް މުސާރައަކީ 10،000 ރުފިޔާ ކަމަށް ކަނޑައެޅުމަށް މަޖްލިސްގައި މަސައްކަތް ކުރައްވާނެކަމަށް ރައްޔިތުންގެ މަޖިލީހުގެ އިގްތިސާދީ ކޮމެޓީގެ މުގައްރިރް އަދި ހިތަދޫ ދެކުނު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެ އެވެ.
ހިތަދޫ މޫލެކެޑެ ސަރަހައްދުގައި މިރޭ ބޭއްވި ކަންމަތީ ބައްދަލުވުމުގައި ވާހަކަފުޅު ދައްކަވަމުން އަސްލަމް ވިދާޅުވީ އަސާސީ ޕެންޝަން 5000ރ އަށް މަތިވުމާއި ގުޅިގެން މުސާރަ މަތިވާން ޖެހޭ ކަމަށާއި ދުނިޔޭގެ އެންމެ މަތިން ޕެންޝަންދޭ ގައުމު ތަކުގައި ވެސް ޕެންޝަންގެ ގޮތުގައި ދެނީ މުސާރައިގެ ދެބައި ކުޅަ އެއްބައި ކަމަށެވެ. އެހެންވެ 5000ރ ދޭން ފެށުމުން މުސާރަ 10،000ރ އަށް ބޮޑު ކުރުމަށް ހުށަހަޅާނެކަމަށެވެ.
އަސްލަމް ވިދާޅުވީ މުސާރަ އާއި އުޖޫރައަކީ އަބަދުވެސް މަތިވަމުން އަންނަން ޖެހޭ އެއްޗަކަށް ވުމުން މުސާރަ ބޮޑުކުރަން ޖެހޭ ކަމަށެވެ.
އަސްލަމް ވިދާޅުވީ އެމްޑީޕީން އަބަދުވެސް ވަކާލާތު ކުރާނީ ތިލަފަތް ހަމަ އުސޫލުން ކަން ކަން ކުރުން ކަމަށާއި، އެމްޑީޕީން އަބަދުވެސް މަސައްކަތްކޮށްފައިވަނީ ދިވެހި ރައްޔިތުންނަށް އުފާ ފާގަތިކަން ހޯދައި ދިނުމަށް ކަމަށެވެ. އެގޮތިން ރާއްޖޭގައި އެއްވެ އުޅުމުގެ މިނިވަން ކަމާއި، ހިޔާލު ފާޅުކުރުމުގެ މިނިވަންކަން ހޯއްދަވައިދެއްވި ކަމަށް ވިދާޅުވިއެވެ.
މަސްވެރިންނަށް ސަބަސިޑީ ދިނުމަށް މަޖލިސްއަށް ބިލް ހުށަހެޅުއްވި އަސްލަމް ވިދާޅުވީ އޭނާ މަޖިލިސްގައި ކުރެއްވި މަސައްކަތް ބަލާ ބަޔަކަށް ފެނި ވަޑައިގަންނަވާނެކަމަށާއި އެކަން ބަލަން ނުވަތަ އަޑުއަހަން ބޭނުން ނޫން ބަޔަކަށް ނުފެންނާނެ ކަމަށާއި އަޑު ނީވޭނެ ކަމަށެވެ.
އަސްލަމް ވިދާޅުވީ ރައްޔިތުން އޭނާ ކުރީގެ އަތޮޅު ކޮމެޓީއަށް ފޮނުވުމުން ގިނަ ކަންތައްތަކެއް ކޮށްދެއްވާފައިވާ ކަމަށެވެ. އެގޮތުން ހިތަދޫގައި ޕަބްލިކް ލައިބްރަރީއެއް ނެތުމުން އޭނާ މަސައްކަތް ކުރައްވައިގެން އިމާރާތެއް ރަށްކުރިއަރުވާ ކޮމެޓީގެ ފައިސާއިން އެޅުމަށް އަޑުއުފުލިކަމަށެވެ. އެގޮތުން މިއަދު ފެންނަން ހުރި ޕަބްލިކް ލައިބްރަރީ އަކީ އޭ ކަމަށް ވިދާޅުވިއެވެ.
"އަޅުގަނޑު ކޮމެޓީގައި ހުރެ އަޑު އުފުލިން ޕަބްލިކް ލައިބްރަރީއެއް ހެދުމަށް، އަޅުގަނޑު ކޮމެޓީގައި ދެންނެވި ހިތަދޫގައި ޕާކެއް އޮންނަން ޖެހޭނެއޭ، އެއީ އަޅުގަނޑު ކުރި މަސައްކަތުން ބިން ކެޑުނު ޕާކެއް، އަޅުގަނޑު ތިބޭފުލޫންގެ މިއޮތް ކިޅި (އިދިގަލި ކިޅި) ކުނި ގޮޑަކަށް ހަދަން އުޅުމުން އެކަން ހުއްޓުވީ، ބަލަން އަޑުއަހަން ބޭނުން ބަޔަކަށް މިކަން އނގޭނެ، އޭނުން ބޭޔަކަށް ނޭގޭނެ، އެއިކީ މައްސަލައެއް ނޫން" 