ތިން ވަޒީރެއްގެ ކާރުގައި "އިންޑިއާ އައުޓް" ޖެހި މައްސަލާގައި މީހަކު ހައްޔަރުކޮށްފި އެވެ.
މައުލޫމާތު ލިބިފައިވާ ގޮތުގައި ވެލާނާގެ ޕާކިންގައި އޮތް ތިން ކާރުގައި "އިންޑިއާ އައުޓް" ސްޕްރޭ ކުރި މައްސަލާގައި މީހަކު ހައްޔަރުކޮށްފައި ވަނީ ރޭގެ ވަގުތެއްގަ އެވެ. ނަމަވެސް މިކަމާ ގުޅޭ ގޮތުން އިތުރު ތަފްސީލެއް ފުލުހުން އަދި ހާމައެއްނުކުރެ އެވެ.
ފުލުހުން މިހާތަނަށް ބުނީ އިކޮނޮމިކް މިނިސްޓަރު ފައްޔާޒް އިސްމާއިލާއި އެޑިއުކޭޝަން މިނިސްޓަރު ޑރ. އައިޝަތު އަލީގެ އިތުރުން ފިޝަރީޒް މިނިސްޓަރު ޑރ. ހުސެއިން ރަޝީދު ހަސަންގެ ކާރުކޮޅަށް ގެއްލުން ދީފައިވާ ކަމަށާއި އެކަމުގެ މައުލޫމާތު ލިބިފައި ވަނީ އިއްޔެ ހެނދުނު 7:30 ހާއިރު ކަމަށެވެ.
މީގެ އިތުރުން ރައްޔިތުންގެ މަޖިލީހުގެ ކުރިމަތީ އޮންނަ ޕާކިން ޒޯންގައި އޮތް ކާރަކަށް ގެއްލުން ދީފައިވާ ކަމަށްވެސް ފުލުހުން ބުނެއެވެ.
"އިންޑިއާ އައުޓް" ކެމްޕޭނަކީ ރާއްޖޭގައި ތިބި އިންޑިއާ ސިފައިން ބޭރުކުރުމަށް ގޮވާލާ ކުރީގެ ރައީސް އަބްދުﷲ ޔާމީން އިސްވެ ހުންނަވައި ފަށާފައިވާ ހަރަކާތެކެވެ. ނަމަވެސް މި ކެމްޕޭނަކީ ގައުމީ ސަލާމަތަށް ނުރައްކަލެއް ކަމަށް ކަނޑައަޅައި ރައީސް އިބްރާހިމް މުހައްމަދު ސޯލިހް ވަނީ ގަރާރެއް ނެރުއްވައިފަ އެވެ.