އެމްޑީޕީގެ ވިޕްލައިނާ ހިލާފުވާ މެމްބަރުންނަށް ފިޔަވަޅު އަޅަން ފެށުމާ ގުޅިގެން އެ ޕާޓީގެ ޕާލިމަންޓްރީ ގްރޫޕް (ޕީޖީ) ގެ ލީޑަރު މުހައްމަދު އަސްލަމް އެނިމޭޓެޑް ފިލްމު "ލަޔަން ކިންގް" ގެ ކެރެކްޓާއެއްގެ ގޮތުގައި ސިފަކޮށް ފާޑުވިދާވެއްޖެ އެވެ.
މަޖިލިސް މެމްބަރުން ތިއްބަވާ ވަޓްސްއެޕް ގްރޫޕަކަށް މާފަންނު މެދު ދާއިރާގެ އެމްޑީޕީގެ މެމްބަރު އިބްރާހިމް ރަޝީދު (ބޮންޑެ) ވަނީ ޑިޒްނީގެ އެނިމޭޓެޑް ކެރެކްޓާއެއްގެ ފޮޓޯއެއް ޕޯސްޓްކޮށް، އެއީ "ޕީޖީ ލީޑަރު" ގެ ގޮތުގައި ސިފަކުރައްވައިފަ އެވެ. އެ ކެރެކްޓާ އަކީ ޑިޒްނީގެ "ލަޔަން ކިންގް" ގައި އުޅޭ "ސްކާ" ގެ ކެރެކްޓާގެ ފޮޓޯއެކެވެ.
ހިތަދޫ އުތުރު ދާއިރާގެ މެމްބަރަށް އަމާޒުކޮށް މިހާރު އެމްޑީޕީގެ ތެރެއިން ވަރަށް ބޮޑެތި ފާޑުކިޔުންތަކެއް އަމާޒުވެފައިވެ އެވެ. ޕާޓީގެ ވިޕްލައިނާ ހިލާފު މެމްބަރުންތަކަކަށް ފިޔަވަޅެ އެޅުމާއި އަދި މޫނަކަށް ކަނދުރާއަކަށް ބެލުމެއް ނެތި ފިޔަވަޅު އަޅުއްވާނެ ކަމަށް އަަސްލަމް ވިދާޅުވެފައިވާތީ އެކަމާ ގުޅިގެން ވެސް އަސްލަމަށް މިހާރު ފާޑުކިޔުންތަކެއް އަމާޒުވެފައިވެ އެވެ.
މިކަމާ ގުޅިގެން ރައީސް ނަޝީދަށް ތާއީދުކުރައްވާ މަޖިލިސް މެމްބަރުން ގެންދަވަނީ ޕީޖީ ގްޕޫރުން ހަދާނެ އެއްޗެއް ހެދިޔަސް ފަރުވާލެއް ނެތް ކަމަށް ވިދާޅުވަމުންނެވެ.