ބަތަލާ ދިއާ މިރްޒާ އާއި ޕްރޮޑިއުސް ކުރާ ފިލްމް "ބޮބީ ޖާސޫސް" ގެ ޝޫޓިން ނިންމާލައިފި އެެވެ.
އަންހެން ޖާސޫސެއްގެ މައްޗަށް ބިނާކޮށް ހަދާ މި ފިލްމުގެ ލީޑް ރޯލުން ފެނިގެން ދާނީ ވިދިޔާ ބާލަން އެވެ. އަދި މި ފިލްމުގެ މުހިއްމު ރޯލަކުން ވިދިއާ އާ އެކު ޒުވާން އެކްޓަރު އަލީ ފަޒަލް ވެސް ފެނިގެން ދާނެ އެވެ.
އޭނާއަކީ "3 އިޑިއަޓްސް" އާއި "ފުކްރޭ" ފަދަ ފިލްމުތަކުން ފެނިފައިވާ އުންމީދީ އެކްޓަރެކެވެ.
ވިދިއާ އާއި އަލީގެ އިތުރުން ސްޕްރިޔާ ޕަތަކާއި އަރްޖުން ބަޖްވާ ވެސް "ބޮބީ ޖާސޫސް" އިން ފެނިގެން ދާނެ އެވެ.
"ބޮބީ ޖާސޫސް" ޕްރޮޑިއުސް ކުރަނީ ދިއާ އާއި އޭނާގެ ލޯބިވެރިޔާ ސާހިލް ސަންގާގެ ޕްރޮޑަކްޝަން ހައުސް ބޯން ފްރީ އެންޓަޓެއިންމަންޓުންނެވެ. މި ދެ މީހުންގެ ކައިވެނި ވެސް ވަނީ ފިލްމުގެ މަސައްކަތް ނިމެންދެން ފަސްކޮށްފަ އެވެ.
އެހެން ނަމަވެސް ސަމަރު ޝެއިހް ޑައިރެކްޓް ކުރާ "ބޮބީ ޖާސޫސް" ސިނަމާތަކަށް އަންނާނެ ދުވަހެއް އަދި އިއުލާނެއް ނުކުރެ އެވެ. އެކަމަކު ބެލެވޭ ގޮތުގައި މި ފިލްމު މި އަހަރު ބެލުންތެރިންނަށް ފެނުން އެކަށީގެންވެ އެވެ.
ބެލެވޭ ގޮތުގައި "ބޮބީ ޖާސޫސް" ވެގެން ދާނީ "ދި ޑާޓީ ޕިކްޗާ" އާއި "ކަހާނީ" ފަދަ ފިލްމުތަކުން ފެނުނު ފަދަ ވަރުގަދަ ރޯލަކުން ވިދިޔާ ފެނިގެން ދާނެ ފިލްމަކަށެވެ.