ސްޕަސްޓާ ރަޖްނީކާންތާއި ބޮލީވުޑްގެ ޒުވާން ބަތަލާ ދީޕިކާ ޕަދްކީން ފުރަަތަމަ ފަހަރަށް ސްކްރީނަށް އަންނަން ތައްޔާރުވެއްޖެ އެވެ.
މި ދެ ތަރިން އެކުގައި ފެނިގެންދާ ފިލްމަކީ އެޕްރީލް މަހުގެ 11 ވަނަ ދުވަހު ޕްރީމިއާ ކުރަން ހަމަޖެހިފައިވާ "ކޮޗަދައްޔާން: ދަ ލެޖެންޑް" އެވެ.
މިއީ ރަޖްނީކާންތުގެ އަންހެން ދަރިފުޅު ސައުންދަރިއާ ރަޖްނީކާންތު އަޝްވިން ޑައިރެކްޓްކޮށްފައިވާ އިންޑިއާގެ ފުރަތަމަ ޕާފޯމަންސް ކެޕްޗަ ރިއަލިސްޓިކް 3ޑީ ފިލްމެވެ.
އެހެންވެ ފިލްމުގެ ކެރެކްޓާތައް ފެނިގެން ދާނީ އެނިމޭޓެޑް ކެރެކްޓާތަކުގެ ގޮތުގަ އެވެ. އެހެން ނަމަވެސް އަަސްލު ކެރެކްޓާތަކާ ވައްތަރުކޮށެވެ.
ފިލްމުގެ ފުރަޔަމަ ޓްރެއިލާ ވެސް މިހާރު ވަނީ އާންމުކޮށްފަ އެވެ. އަދި އާދީއްތަ ދުވަހު ފިލްމުގެ މިއުޒިކް އަލްބަމް ވެސް ވަނީ ލޯންޗްކޮށްފަ އެވެ.
"ކޮޗަދައްޔާން" ގެ މިއުޒިކް ތައްޔާރުކޮށް ދީފައި ވަނީ އޮސްކާ ހާސިލްކޮށްފައިވާ، އިންޑިއާގެ ކުޅަދާނަ މިއުޒިކް ޑައިރެކްޓަރު އޭއާރް. ރަހުމާނެވެ.
ރަޖްނީކާންތާއި ދީޕިކާގެ އިތުރުން "ކޮޗަދައްޔާން" ގެ މުހިއްމު ރޯލްތަކުން ޖެކީ ޝްރޮފާއި ސައުތު އިންޑިއާގެ މަޝްހޫރު ބައެއް ތަރިން ވެސް ފެނިގެން ދާނެ އެވެ.
މި ފިލްމުގެ ވާހަކަ އާއި ސްކްރީންޕްލޭ ތައްޔާރުކޮށްފައި ވަނީ ކޭއެސް. ރަވީކުމާރެވެ.
"ކޮޗަދައްޔާން" އަކީ 2010 ވަނަ އަހަރު ރިލީޒްވި "ރޮބޮޓް" އަށް ފަހު ބެލުންތެރިންނާ ހަމައަށް އަންނަ ރަޖްނީކާންތުގެ ފުރަތަމަ ފިލްމެވެ.