މިދިޔަ ހުކުރު ދުވަހު ރިލީޒްވި، ކަންގަނާ ރަނާވަތު ލީޑް ރޯލް ކުޅެފައިވާ "ކުއީން" އަށް ބޮލީވުޑްގެ މިސްޓަ ޕާފެކްޝަނިސްޓް އާމިރް ހާން ވަރަށް ބޮޑަށް ތައުރީފުކޮށްފި އެވެ.
ވިކާސް ބާލް ޑައިރެެކްޓްކޮށްފައިވާ އެ ފިލްމު ބެލުމަށް ފަހު، އާމިރް ވަނީ ފިލްމަށް ތައުރީފުކޮށް އެ ފިލްމު އެންމެން ވެސް ބެލުމަށް އެދިފަ އެވެ.
އާމިރް ބުނީ "ކުއީން" އަކީ ކޮންމެ ޒުވާން އަންހެން ކުއްޖަކާއި އަންހެނަކު ވެސް ބަލަން ޖެހޭނެ ފިލްމެއް ކަމަށެވެ. އަދި މިއީ ފިރިހެނުން ވެސް ނުބަލައި ދޫކޮށްލާ ވަރަށް ވުރެ މޮޅު ފިލްމެއް ކަމަށް އާމިރް ބުންޏެވެ.
"މި ވަރުގެ ފިލްމެއް ގެނެސް ދިނީތީ ވިކާސް އާއި އޭނާގެ ޓީމަށް ވަރަށް ބޮޑަށް ޝުކުރިއްޔާ. ކަންގަނާ ރޮކްސް،" އާމިރްގެ ޓްވީޓްގައިވެ އެވެ. "މި ފިލްމު ނުބަލާ މީހަކު ހުރި ނަމަ އަހަރެން އެދެން ފިލްމު ބަލާލަން ދާން. މިއީ ކޮންމެ އަންހެނަކު ވެސް އަދި ފިރިހެނަކު ވެސް ބަލާލަން ވަރަށް މުހިއްމު ފިލްމެއް."
ބޭރުގެ ގިނަ ލޮކޭޝަންތަކެއްގައި މަންޒަރުތައް ނަގާފަައިވާ "ކުއީން" ގައި ދައްކައި ދެނީ އެކަނިމާއެކަނި ހަނީމޫނަށްދާ، އިންޑިއާގެ މެދުފަންތީގެ އާއިލާއެއްގެ އަންހެން ކުއްޖަކަށް ދިމާވާ ހާދިސާތަކެކެވެ.
ކަންގަނާގެ އިތުރުން މި ފިލްމުގެ މުހިއްމު ރޯލްތަކުން ލީސާ ހޭޑްން އާއި ރާޖްކުމާރު ރާއޯ ވެސް ފެނިގެން ދެ އެވެ.
މި ފިލްމުގައި ކަންގަނާ ދައްކުވައި ދީފައިވާ އެކްޓިން އަށް ކްރިޓިކުން ވެސް ވަރަށް ބޮޑަށް ތައުރީފްކޮށްފައިވާ އިރު، ބޮކްސް އޮފީހުގައު ރަނިކަން ކުރަމުން އަންނަ ފިލްމަކީ ވެސް "ކުއީން" އެވެ.
އެއީ ޖޫހީ ޗަވްލާ އާއި މަދޫރީ ޑިކްޝިޓްގެ "ގުލާބް ގޭންގް" ވެސް ފަހަތަށް ޖައްސާލުމަށް ފަހު އެވެ.