(މާޗް 11، 2014 ވަނަ ދުވަހުގެ ބަޔާ ގުޅޭ)
ނަމަވެސް މި މަޝްރޫއުތައް ހިމެނުނީ މައުމޫނުގެ ވެރިކަމުގެ ދިގު 30 އަހަރު ނިމިގެން ދިޔަ އިރު، އެކަންތައްތަކަށް ވަރަށް އަހައްމިއްޔަތުކަން ދެއްވައި އެހެނަސް ނަތީޖާއެއް ނުފެނުނު ކަންތައްތަކުގެ ލިސްޓްގެ އެންމެ ކުރީގަ އެވެ.
ބައެއް ބޭފުޅުންގެ ނަޒަރުގައި މި ވާހަކަ މިގޮތަށް ދެއްކުމަކީ ރައީސް މައުމޫންގެ ވެރިކަމަށް ކުޑައިމީސް ކުރުމެވެ. ރައީސް މަައުމޫންގެ ވެރިކަން ނިމިގެން ދިޔައީ މަޝްހޫރު ހޮޓެލް ޗެއިނެއް ކަމަށްވާ ޝަންގްރިއްލާ އާ ވިލިގިލި ހަވާލުކޮށްފަ އެވެ.
ހެރަތެރައިގައި ވެސް 273 އެނދުގެ ރިސޯޓެއް ހަދަމުން ދަނިކޮށެވެ. އަދި ނުނިމެނީސް ވެސް ހުޅުވަން ބޮޑު ރަސްމިއްޔާތެއް ބާއްވައި، މީޑިއާ އަށް ހުޅުވާލާފަ އެވެ. ގަމުގެ އެއާޕޯޓްގެ މޫނުމަތިގައި އިންޓަނެޝަނަލް އެއާޕޯޓްގެ ޝަރަފުވެރި ނަން ބޯޑް އަޅުވައިފަ އެވެ.
ވިލިގިލި ފަދަ ބޮޑު ރަށެއް ޓޫރިސްޓް ރިސޯޓަކަށް ހެދިޔަސް އެ ރިސޯޓަށް ފަތުރުވެރިން ގެނައުމަށްޓަކައި ބޭނުންވާ ގަމުގެ އެއާޕޯޓް ބޮޑެތި ފްލައިޓްތައް ޖެއްސޭ ވަރަށް ތަރައްގީ ކުރުމަކީ އައްޑު އަށް ފަތުރުވެރިކަން ގެނައުމުގެ ފުރަތަމަ ފިޔަވައްސެވެ. އެއީ ބައެއް މީހުން ދެކޭ ގޮތެވެ.
އަނެއް ބަޔަކު ކިޔަ އެވެ. ގަމުގެ އެއާޕޯޓް ބޭރުގެ އުދުހުންތަކަށް ހުޅުވާލެވޭ ވަރަށް ތަރައްގީ ކުރުމަށްޓަކައި ފުރަތަމަ ބޭނުމީ އަންނަ ފަތުރުވެރިން ތިބޭނެ ރިސޯޓް ހެދުމެވެ. ބޮޑެތި ފްލައިޓްތަކަށް ދަތުރު ކުރެވޭނީ ފަސެންޖަރުން ލިބިގެން ކަމަށްވާތީ އެވެ.
ވިލިގިލި
އެކި ގޮތްގޮތަށް ވާހަކަ ދެކެވެމުން ގޮސް ވިލިގިލި ރިސޯޓެއްގެ ގޮތުގައި ތަރައްގީ ކުރުމަށްޓަކައި އިންވެސްޓަރުން ހޯއްދެވުމަށް އިއުލާން ކުރެއްވީ 1997 ވަނަ އަހަރުގެ މެދު ތެރޭގަ އެވެ.
ނަމަވެސް ސަރުކާރުގެ ހުށަހެޅުންތަކާ އެއްގޮތަށް އަދި ސަރުކާރުން ވެސް ހިއްސާވާ ގޮތަށް ހުށަހެޅުމުން ވެސް މި ރަށް ބޭނުންވެގެން ހުށަހެޅީ ހަމައެކަނި އެމެރިކާގެ ކުންފުންޏެއް ކަމަށްވާ އެބޮންމާޝް އިންވެސްޓްމަންޓްސް ގްރޫޕުންނެވެ.
ޓޫރިޒަމް މިނިސްޓްރީން ނިންމެވީ މި ކުންފުންޏާ ވާހަކަ ދައްކައިގެން ދެ ފަރާތް އެއްބަސްވާ ރަނގަޅު ގޮތަކަށް މި ރަށް އެ ފަރާތާ ހަވާލު ކުރުމަށެވެ. ނަމަވެސް ވީ ގޮތެއް ނޭނގި އެކަން ވެސް ނިމިގެން ދިޔައީ އެވެ.
ތިރީސް ޕަސެންޓް ހިއްސާ ސަރުކާރަށް އޮންނަ ގޮތަށް ވިލިގިލި އިންވެސްޓްމަންޓް ޕްރައިވެޓް ލިމިޓެޑް ކުންފުނިން 2000 ވަނަ އަހަރު ވިލިގިލި ކުއްޔަށް ނެންގެވީ ހުޅުވާލެވިފައިވާ މިފަދަ ބަހުސެެއްގެ ތެރޭގައި މި މައްސަލަ ވަނިކޮށެވެ.
ނަމަވެސް ވިލިގިލި އިންވެސްޓްމަންޓުން 500 އެނދުގެ ރިސޯޓެއް ތަރައްގީ ކުރަން 35 އަހަރުގެ މުއްދަތަށް މި ރަށް ކުއްޔަށް ހިފީ ހަމައެކަނި ކުރެވޭ ފޮނި އުންމީދުތަކެއްގެ މައްޗަކަށް ނޫނެވެ. ސަރުކާރުން ގަމުގެ އެއާޕޯޓް، ބޮޑެތި ބޯޓްފަހަރަަށް ޖެއްސޭ ވަރަށް ތަރައްގީކޮށް ދެއްވާނެ ކަމުގެ ޔަގީންކަން ދެއްވާފައިވާތީ އެވެ.
ނަމަވެސް މިއީ އައްޑޫގެ މަޝްހޫރު ވިޔަފާވެެރިއެއް ކަމަށްވާ މުހައްމަދު ސައީދަށް ގަމުގެ ހޮލިޑޭ ވިލެޖް ކުއްޔަށް ދެއްވި އިރު، އެ ފަރާތަށް ވެސް ދެއްވި ޔަގީން ކަމެވެ. މި ޔަގީންކަމުގެ މައްޗަށް އިތުބާރުކޮށްގެން ހޮލިޑޭ ވިލެޖަށް އިންވެސްޓްކޮށް، އޭނާގެ އަތް ވެސް ހުސްވީ އެވެ. ބޭންކަށް ދަރައި، ދަރަނިވެރިވީ އެވެ.
އެހެން ނަމަވެސް މި ފަހަރު ވިލިގިލި އިންވެސްޓްމަންޓް ހިއްސާއަކާ އެކު ބައިވެރިވި އެނާޖީ ޓުއާސް އާ މެދު ވަރަށް ގިނަ ބަޔަކު އިތުބާރު ކުރި އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.