ބޮލީވުޑްގެ ޒުވާން ބަތަލާ އިން އުމުރުން ދުވަސްވީ އެކްޓަރުންނާ އެކު ފިލްމުތަކުން ފެނުމަކީ އާ ކަމެއް ނޫނެވެ. އެއީ ހަމަ ވަރަށް އާދައިގެ އަދި ބާވެފައި އޮތް ކަމެކެވެ.
އެކަމަކު ޒުވާން އެެކްޓަރުން ދުވަސްވީ ބަތަލާއިންނާ އެކު ފެނުމަކީ އެހާ އާންމު ކަމެއް ނޫނެވެ. އަދި އެފަދަ ޖޯޑުތަކެއް ފެނުމަކީ ގިނަ ފަހަރަށް ބެލުންތެރިންނަށް ހައިރާކަން ގެނެސްދޭ ކަމެކެވެ.
މި ލިސްޓަށް މި ފަހަރު އިތުރުވި އެކްޓަރަކީ އުމުރުން 33 އަހަރުގެ ޝާހިދު ކަޕޫރެވެ. އޭނާ އާއި އުމުރުން މިހާރު 42 އަހަރުގެ ތައްބޫގެ ޖޯޑް ބެލުންތެރިންނާ ހަމައަށް އަންނަން ދެން މާ ގިނަ ދުވަހެއް ނެތެވެ.
އެ ފިލްމަކީ "ރިޓާން ގިފްޓް" އެވެ. ޑައިރެލްޓަރަކީ އިންޑިއާގެ ބޮކްސް އޮފީހުގައި މިހާރު އެއް ވަނާގައި އޮތް "ކްއީން" ގެ ކުޅަދާން ޑައިރެކްޓަރު ވިކާސް ބާލް އެވެ.
ރިޕޯޓްތައް ބުނާ ގޮތުން "ރިޓާން ގިފްޓް" އަށް ޝާހިދާއި ތައްބޫ މިހާރު ވަނީ ފެހި ސިގްނަލް ވެސް ދީފަ އެވެ. އެހެންްވެ އެ ދެ ތަރިން ސްކްރީނުގައި "ރޮމާންސް" ކުރާ ތަން ބެލުންތެރިންނަށް ފެނިގެން ދާނެ އެވެ.
ތައްބޫއަކީ މީގެ ކުރިން ޝާހިދުގެ ބައްޕަ ޕަންކަޖް ކަޕޫރާ އެކު ވެސް މަސައްކަތްކޮށްފައިވާ ބަތަލާއެކެވެ. އެއީ ވިޝާލް ބަރަދްވާޖްގެ "މަގްބޫލް" ގަ އެވެ.
އަދި ވިޝާލް ޝާހިދު ހިމަނައިގެން މިހާރު އުފައްދަމުން އަންނަ "ހައިދަރު" ގައި ވެސް ތައްބޫ މުހިއްމު ރޯލަކުން ފެނިގެން ދާނެ އެވެ. މި ފިލްމުގައި ޝާހިދުގެ ބަތަލާއަކީ ޝްރަދާ ކަޕޫރެވެ.
ތައްބޫ އާ އެކު ލޯބީގެ ފިލްމަކުން ޝާހިދު ފެނުމުގެ ފުރުސަތު ބޮޑުވެފައިވާ އިރު، އޭނާ މީގެ ކުރިން ވެސް ވަނީ އުމުރުން ދޮށީ ބަތަލާއަކާ އެކު މަސައްކަތްކޮށްފަ އެވެ. އެއީ ވިދިޔާ ބާލަން އާ އެކު "ކިސްމަތު ކަނެކްޝަން" އެވެ.
މީގެ ކުރިން އުމުރުން ދުވަސްވީ ބަތަލާއިންނާ އެކު ފެނިގެން ދިޔަ އެކްޓަރުންގެ ތެރޭގައި "ވޭކަޕް ސިދް" ގައި ކޮންކަނާ ސެން ޝަރްމާ އާ އެކު ރަންބީރު ކަޕޫރު، ރޭކާ އާ އެކު މަނޯޖް ބަޖްޕާއީ ކުޅުނު "ޒުބައިދާ" އަދި "ކިލާޅީޔޯންކާ ކިލާޅީ" ގައި ރޭކާ އާ އެކު އަކްޝޭ ކުމާރު، "ދިލް ޗާހަތޭ ހޭ" ގައި ޑިމްޕަލް ކަޕާޑިއާ އެކު އަކްޝަޔޭ ކަންނާ ފަދަ ތަރިން ހިމެނެ އެވެ.