ސ. ފޭދޫ ފިހާރައަކުން މީހަކު ގަތް ޕާނެެއްގެ ތެރެއިން މެއްސެއް ފެނިގެން، އެކަން ފޭދޫގެ ޕަބްލިކް ހެލްތު ޔުނިޓަށް ރިޕޯޓް ކުރުމާ ގުޅިގެން އެ ތަނުން ޕާން ފިހާ ބޭކަރީ އިންސްޕެކްޓްކޮށްފި އެވެ.
މިއަދު ހެނދުނު 15ރ. ދީފައި ގަތް ޕާނުގެ ތެރެއިން، މެއްސެއް ފެނުމުން އެ ޕާން މިހާރު ވަނީ ފިހާރައިގައި ބާއްވައި، ޕާން ގަތް ފަރާތަށް ބަދަލު ދީފަ އެވެ.
މެހި ފެނިފައި ވަނީ ޕާން ޕެކްކޮށްފައިވާ ކޮތަޅުތެރެއިންނެވެ. ބެލެވޭ ގޮތުގައި މެހި ކޮތަޅުގެ ތެރެއަށް ގޮސްފައި ވަނީ ޕާން ޕެކް ކުރި އިރި، ބަލަންވާ ވަރަށް ނުބެލުމުގެ ސަބަބުންނެވެ.
އެހެން ނަމަވެސް މިފަދަ ކަންކަމަކީ އާންމު ރައްޔިތުންގެ ސިއްހަތާ ވަރަށް ބޮޑަށް ގުޅިފައިވާ ކަމަަކަށްވާތީ، ކާބޯތަކެތި ތައްޔާރު ކުރާ ފަރާތްތަކުން އެފަދަ ސާފުތާހިރު ކަމަށް ވީހާ ވެސް ބޮޑަށް ސަމާލުކަން ދިނުމަށް ޕަބްލިކް ހެލްތު ޔުނިޓުން ވަނީ އިލްތިމާސްކޮށްފަ އެވެ.
މިއަދު މި ދިމާވީ ކަންތަކާ ގުޅިގެން ބޭކަރީގެ ސާފުތާހިރުކަން ހުރި ނެތް ގޮތް ބެލުމަށް ފަހު، ޕަބްލިކް ހެލްތު ޔުނިޓްގެ އޮފިޝަލް ވިދާޅުވީ ބޭކަރީގެ ސާފުތާހިރުކަން ހުރީ މިންގަނޑުތަކަށް ފެތޭ ގޮތަށް ކަމަށެވެ.
އެހެން ނަމަވެސް އިތުރަށް ބަލަން ޖެހޭ ކަންކަން ބަލައި ފިޔަވަޅެއް އަޅަން ޖެހޭ ނަމަ، ފިޔަވަޅު އަޅާނެ ކަމަށް ވިދާޅުވި އެވެ.
ފޭދޫގެ ފިހާރަތަކުގައި އާންމުކޮށް ވިއްކަން ހުންނަ ޕާނަކީ ފޭދު އާއި ހިތަދޫގެ ބޭކަރީތަކުން ގެނެސްގެން ވިއްކާ ޕާނެވެ.
މީގެ ކުރިން ވެސް ޕާނުން ބައެއް ބާވަތްތަކުގެ ސޫފާސޫފި ފެނިގެން އާންމުން ޝަކުވާކޮށްފައިވެ އެވެ.