އައްޑޫ ދާއިރާތަކުގެ ބަހުސް ފެށުން މިރޭ

ޓީވީއެމުން ކުރިއަށް ގެންދާ ރައްޔިތުންގެ މަޖިލީހުގެ އިންތިހާބުގައި ވާދަ ކުރައްވާ ކެންޑިޑޭޓުންގެ ބަހުސްގައި މިރޭ އައްޑޫގެ ދާއިރާތަކުގެ ބަހުސް ފަށާ ގޮތަށް ހަމަޖައްސައިފި އެވެ.

އެގޮތުން އެންމެ ފުރަތަމަ އޮންނާނީ ހުޅުދޫ ދާއިރާގެ ބަހުސް އެވެ. އެ ބަހުސް އޮންނާނީ މިރޭ 9:30 ގަ އެވެ.

އެ ދާއިރާ އަަށް ވާދަ ކުރައްވާ ކެންޑިޑޭޓުންނަކީ އެމްޑީޕީން އިލްޔާސް ލަބީބް އާއި ޕީޕީއެމްގެ ފަރާތުން މުހައްމަދު ޝާހިދު އަދި އަމިއްލަ ގޮތުން ޑރ. އިބްރާހީމްދީދީ (ޑރ. ޑީޑީ) އާއި އިބްރާހީމް ޝުކުރީ އެވެ.

މާދަމާ ހެނދުނު 10:30 ގައި ފޭދޫ ދާއިރާގެ ބަހުސް ގެނެސްދޭ ގޮތަށް ހަމަޖެހިފައިވާ އިރު، އެ ދާއިރާގެ ކެންޑިޑޭޓުންނަކީ އެމްޑީޕީގެ މުހައްމަދު ނިހާދާއި ޕީޕީއެމްގެ އިބްރާހީމްދީދީ (އައިބީ) އާއި އަމިއްލަ ގޮތުން ވާދަ ކުރައްވާ އަލްހާން ފަހުމީ އާއި އިމާދު ސޯލިހެވެ.

މާދަމާ މެންދުރު ފަހު 2:30 ގައި މަރަދޫ ދާއިރާގެ ބަހުސް ބާއްވާ އިރު، އެ ދާއިރާގެ ކެންޑިޑޭޓުންނަކީ ޖޭޕީގެ ފަރާތުން ހަސަން އާދިލް، އެމްޑީޕީގެ ފަރާތުން އިބްރާހީމް ޝަރީފް (މަވޯޓާ) އަދި އަމިއްލަ ގޮތުން އައިމިނަތު ޝެރީނާ އެވެ.

ހިތަދޫ އުތުރު ދާއިރާގެ ބަހުސް މާދަމާ ހަވީރު 4:00 އަށް ތާވަލުކޮށްފައިވާ އިރު، އެ ދާއިރާގެ ކެންޑިޑޭޓުންނަކީ އެމްޑީޕީގެ މުހައްމަދު އަސްލަމާއި ޕީޕީއެމްގެ ފަރާތުން އަލީ އިބްރާހީމެވެ.

ހިތަދޫ މެދު ދާއިރާގެ ބަހުސް ބޭއްވުމަށް ހަމަޖެހިފައި ވަނީ މާދަމާ ރޭ ރޭ 9:30 ގަ އެވެ. އެ ދާއިރާގެ ކެންޑިޑޭޓުންނަކީ އެމްޑީޕީގެ ފަރާތުން ކުރީގެ ބްރިގޭޑިއާ އިބްރާހީމްދީދީ އާއި ޕީޕީއެމްގެ ފަރާތުން ހިޔަލީ މުހައްމަދު ރަޝީދެވެ.

އަދި ހިތަދޫ ދެކުނު ދާއިރާގެ ބަހުސް ފަށާނީ ހޯމަ ދުވަހު އެވެ. އެ ދުވަހު 10:30 ގައި ބަހުސް ބާއްވާ އިރު އެ ދާއިރާގެ ކެންޑިޑޭޓުންނަކީ އެމްޑީޕީގެ ފަރާތުން އަލީ ނިޒާރާއި ޖޭޕީގެ ފަރާތުން ހަސަން ލަތީފެވެ.

މީދޫ ދާއިރާގެ ބަހުސް އޮންނާނީ ހޯމަ ދުވަހު މެންދުރު 2:30 ގަ އެވެ. އެ ދާއިރާގެ ކެންޑިޑޭޓުންނަކީ އެމްޑީޕީގެ ފަރާތުން ރޮޒައިނާ އާދަމާއި ޕީޕީއެމްގެ ފަރާތުން އަލީ ނިޒާރާއި ޖޭޕީގެ ފަރާތުން އަބްދުﷲ ހާނީ އެވެ.