(މާޗް 15، 2014 ވަނަ ދުވަހުގެ ބަޔާ ގުޅޭ)
ހަޖަރަ
އައްޑޫގެ ހަޖަރަ އޭ ކިޔާ ރަށުގައި 200 އެނދުގެ ރިސޯޓެެއް ހެދުމަށް ޑިސެމްބަރު 29، 2005 ގައި ބީލަމަށް ލައްވާފައިވެ އެވެ
ދޮންރަހާހެރަ
މި ރަށް ވެސް ރިސޯޓެއްގެ ގޮތުގައި ތަރައްގީ ކުރަން ބީލަމަށް ލައްވާ ގޮތަށް ހަމަޖެހިފައި އޮތެވެ. އެއީ ޖެނުއަރީ 5، 2006 ގަ އެވެ.
ގެރަދޫ
ގެރަދޫ ވެސް ބީލަމަށް ލައްވާ ގޮތަށް ހަމަޖެހިގެން ދިޔަ އެވެ. ރިސޯޓެއް ހެދުމަށެވެ. މި ރަށް ބީލަމަށް ލާން ހަމަޖެއްސެވީ ޖެނުއަރީ 16، 2006 ގަ އެވެ.
މުލިކެޑަ
ކުރިން ވެސް ރިސޯޓެއް ހަދަން ނިންމާފައިވާ މުލިކެޑަ ވެސް 2006 ފެބްރުއަރީގައި ބީލަމަށް ލެއްވުމަށް ހަމަޖެެއްސެވި އެވެ.
އެއީ ދެހާސް ފަސް ވަނަ އަހަރުގެ ޑިސެމްބަރު މަހުގެ ތެރޭގައި ނޫސްވެރިންނަށް މައުލޫމާތު ދެއްވަމުން ޓޫރިޒަމް އެންޑް ސިވިލް އޭވިއޭޝަން މިނިސްޓަރެވެ. އެކަމަކު އޭގެ ފަހުން މިއިން އެއްވެސް ރަށެއްގެ ހަބަރެއް ހިލަމެެއް ވެސް ނުވެ އެވެ. އެއްވެސް ބަޔަކު މިހާރު މި ހަނދާނެއް ހުރި ކަމެއް ވެސް ނޭނގެ އެވެ.
ހިތަދޫ ކޯއްޓެ ސަރަހައްދާއި އީދިގަލި ކިޅި
ހިތަދޫ ކޯއްޓޭ ސަރަހައްދާއި އީދިގަލި ކިޅިއަކީ އިކޯ ޓޫރިޒަމަށް ހުޅުވާލައިގެން ވިޔަފާރި އުސޫލުން ކާމިޔާބް ވިޔަފާރިއެއް ހިންގިދާނެ ސަރަހައްދެއް ކަމަށް ގަބޫލް ކުރެވޭތީ މި ސަރަހައްދު ފަތުރުވެރިންނަށް މާކެޓް ކުރެވިދާނެ ގޮތަކަށް ތަރައްގީ ކުރަން ހިތަދޫ އޮފީހުގެ ފަރާތުން ވަނީ ޓޫރިޒަމް މިނިސްޓްރީ އަށް ހުށަހަޅައިފަ އެވެ.
މިނިސްޓަރު ޑރ. މަހުމޫދު ޝައުގީ ވިދާޅުވެފައި ވަނީ އެ ސަރަހައްދުގައި ފަތުރުވެރިކަމުގެ ވިޔަފާރި ފެށުމަށް ބޭނުންފުޅުވެގެން ހިތަދޫގެ ވެރިން ސަރުކާރަށް ހުށަހަޅާފައިވާ ކަމަށެވެ. ވުމާ އެކު އެ މައްސަލަ ތިމާވެށްޓާ ބެހޭ މިނިސްޓްރީ އަށް ހުށަހަޅުއްވާފައިވާ ކަމަށެވެ. ކޯއްޓޭ ހިމެނޭ ސަރަހައްދާއި އީދިގަލި ކިޅީގައި ތިމާވެށްޓާ ގުޅުން ހުރި ޓޫރިސްޓް ކޮންސެޕްޓެއް އެކުލަވާލެއްވުމަށެވެ.
ކޯއްޓެ އާއި އީދިގަލި ކިޅި ވަނީ 2004 ވަނަ އަހަރުގެ ތެރޭގައި ހިމާޔަތްކޮށްފަ އެވެ. ދިވެހި ސަރުކާރާއި އޮސްޓްރޭލިއާ ސަރުކާރު ގުޅިގެން ހިންގި "ދިވެހި ރާއްޖޭގެ ހިމާޔަތް ކުރެވޭ ސަރަހައްދު ގާއިމުކޮށް ބެލެހެއްޓުމާ ބެހޭ މަޝްރޫއު" ގެ ނަމުގަ އެވެ.
މި މަޝްރޫއުގެ ދަށުން މި ސަރަހައްދު ބެލެހެއްޓުމާ ބެހޭ ގޮތުން މަސައްކަތްތަކެއް ކުރެވިފައިވެ އެވެ. ގާތްގަޑަކަށް 75,000 އަކަފޫޓްގެ މި ސަރަހައްދަކީ މިހާރު ވެސް އައްޑު އަށް ޒިޔާރަތް ކުރާ ފަތުރުވެރިންގެ ޝައުގުވެރިކަން ހުއްޓިފައިވާ ހިސާބެކެވެ.
ނަމަވެސް އޭގެ ފަހުން މި ސަރަހައްދާ ބެހޭ އެއްވެސް ވާހަކައެއްގެ އަޑެއް ނީވެ އެވެ. ހިމާޔަތް ކުރެވިފައިވާ ސަރަހައްދެކެވެ. އެކަމަކު ބެލެހެއްޓޭނެ ގޮތެއް ނެތި، އަޅާނުލެވި ދޫކޮށްލެވިފައި އޮތުމުގެ ސަބަބުން މި ސަރަހައްދުން ވެސް ވެއްޔާއި އަކިރި ނަގާ މީހުން އެކަން ކުރެ އެވެ. ކުނި އަޅާ މީހުން ހުއްޓުމެއް ނެތި އެކަން ވެސް ކުރެ އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.