އިލެކްޓްރޯނިކް ސާމާނު ވިއްކާ ފިހާރައެއް އައްޑޫގައި ހުޅުވަން ނިންމާފައިވާ ކަމަށް އައްޑު އަށް ކަރަންޓްގެ ހިދުމަތްދޭ ފެނަކަ ކޯޕަރޭޝަނުން ބުނެފި އެވެ.
ފެނައިން ބުނީ ހިތަދޫގައި ހުންނަ އެ ކުންފުނީގެ އޮފީސް ކައިރީގައި ގާއިމު ކުރާ ފިހާރައިގެ އިމާރާތް ވެސް ގާތްގަނޑަކަށް ނިމިފައިވާ ކަމަށެވެ. އަދި އަންނަ މަހުގެ ފަހުކޮޅު އެ ފިހާރަ ހުޅުވޭ ވަރު ވާނެ އެ ކުންފުނިން ބުންޏެވެ.
ފެނަކަގެ މެނެޖިން ޑިރެކްޓަރު މުހައްމަދު ނިމާލް ވިދާޅުވީ ފިހާރައިގައި މިހާރު ކުރަން ހުތީ އިންޓީރިއާ މަސައްކަތް ކަމަށެވެ. އަދި އެ މަސައްކަތް ނިމުނުހާ އަވަހަކަށް ފިހާރަ ހުޅުވާނެ ކަމަށް ވިދާޅުވި އެވެ.
"އަޅުގަނޑުމެން އަތުގައި މިހާރު ވެސް ސޯލް ޑިސްޓްރިބިއުޓްކުރުމަށް ޕްރޮޑަކްޓްތަކެއް ލިބިފައި އެބަހުރި. އިތުރު ބްރޭންޑްތަކުގެ ސޯލް ޑިސްޓްރިބިއުޓްކަން ހޯދުމަށް އަޅުގަނޑުމެން މަސައްކަތްކުރަމުން މި އަންނަނީ. އަޅުގަނޑުމެންގެ މަގުސަދަކީ ވީހާ ވެސް ހެޔޮ އަގެއްގައި ފަސޭހަ ގޮތެއްގައި ރަނގަޅު ޕްރޮޑަކްޓްސް ރަށްރަށުގައި ދިރިއުޅޭ މީހުންނަށް ފޯރުކޮށްދިނުން،" އޭނާ ވިދާޅުވި އެވެ.