ކަރީނާ ކަޕޫރުގެ އަޑެެއްބަޑެއް ނީވޭތާ މިހާރު ލައްކަ ދުވަސްވެއްޖެ އެވެ.
ހާއްސަކޮށް އޭނާގެ އެއްވެސް ފިލްމެއް ސްކްރީނަަށް އަންނަން ނެތުމާ އެކު، ކަރީނާގެ މަތިން ގިނަ ބަޔަކު މިހާރު ހަނދާން ވެސް ހުރި ކަމެއް ނޭނގެ އެވެ. އެހެންވެ ވެދާނެ އެވެ.
މިދިޔަ އަހަރު ރިލީޒްވި ކަރީނާގެ ހަމައެކަނި ފިލްމަކީ އިމްރާން ހާނާ އެކު ކުޅުނު "ގޯރީ ތެރޭ ޕިޔާރު މޭ" އެވެ. އެކަމަކު އެ ފިލްމް ބަލަން ސިނަމާއަށް އަންނާނެ މީހަކު ނުވެގެން، އެއީ އުންމީދު ކުރި ވަރާ ގާތަށް ވެސް ހިނގި ފިލްމެއް ނޫނެވެެ.
އޭގެ ކުރިއަށް ޖެހިލާ އިރު، ކަރީނާގެ ފަހުގެ ރިލީޒްތަކަށް ބޮކްސް އޮފީހުގައި ލިބިފައި ވަނީ ވަަރަށް ފިހި ތަރުހީބެކެވެ.
އޭގެ ތެރެއިން ވެސް އެންމެ ފާހަގަކޮށްލެވުނު އެއް ފިލްމަކީ މަދޫރު ބަންދާކަރުގެ "ހިރޮއިން" އެވެ. މުޅި ފިލްމުގައި ކަރީނާ އޮތަސް އެ ފިލްމްވީ ބޮޑު ފްލޮޕަަކަށެވެ.
މީގެ އިތުރުން ބޮޑު ކާސްޓަކާ އެކު ނެރުނު ޕްރަކާޝް ޖާގެ "ސަތިއަގްރަހާ" ވެސް ޖެހުނީ އެ ހާލެވެ. ކަރީނާ އާއި އަމީތާބް ބައްޗަން އަދި އަޖޭ ދޭވްގަން އާއި އަރުޖުން ރާމްޕާލް ފަދަ ތަރިންނާ އެކު އެ ފިލްމަށް ވެސް ލިބުނު ކާމިޔާބީއެއް ނެތެެވެ.
ދެން އޮތީ ކަރީނާގެ ކުރިއަށް ހުރި ފިލްމުތަކުގެ ވާހަކަ އެވެ. އޭގެ ތެރެއިން އެއް ފިލްމަކީ "ޝުއްދީ" އެވެ. ރިތިކް ރޯޝަން އާ އެކު ކަރީނާ ލީޑް ރޯލް ކުޅެން ހަމަޖެހުނު އެ ފިލްމުން ވަނީ ކަރީނާ ވަނީ ވަކިވެފަ އެވެ. ސަބަބަކަށްވީ ފިލްމުގެ މަސައްކަތް ނުފެށި ދިގުލައިގެން ދިއުމެވެ.
އެ ފިލްމުގެ ޕްރޮޑިއުސަރަކީ ކަރީނާގެ އެންމެ ގާތް އެކުވެރިންގެ ތެރޭގައި ހިމެނޭ ކަރަން ޖޯހަރެވެ.
ދެން އޮތް އަނެއް ފިލްމަކީ "ބޮމްބޭ ސަމުރާއީ" އެވެ. ފަރްހާން އަހްތަރާ އެކު ކަރީނާ ފުރަތަމަ ފަހަަރަށް ސްކްރީނަށް އަންނަ ފިލްމުގެ މަސައްކަތް ވެސް ވަނީ ފަސްކޮށްލައިފަ އެވެ.
ފަރްހާންގެ އެކްސެލް އެންޓައިންމަންޓުން އެ ފިލްމުގެ މަސައްކަތް ފަސްކޮށްލީ ޝާހްރުކް ހާން ލީޑް ރޯލް ކުޅޭ "ރައީސް" އަށް ވަގުތު ހުސް ކުރުމުގެ ގޮތުންނެވެ. އެއީ އެކްސެލްގެ ފިލްމެކެވެ.
ދެން އޮތީ "ސިންގަމް 2" ގެ ވާހަކަ އެވެ. މިއީ އަޖޭ ދޭވްގަން ލީޑް ރޯލް ކުޅެ، ރޯހިތު ޝެޓީ ޑައިރެކްޓް ކުރާ 2011 ގެ "ސިންގަމް" ގެ ސީކްއެލްއެކެވެ. ފިލްމުގެ ބަތަލާއަކަށް ކަރީނާ ވަނީ ސޮއިކޮށްފަ އެވެ.
ކަރީނާ ބުނީ އެ ފިލްމުގެ ޝޫޓިން މި މަހުގެ 25 ގައި ފަށަން ހަމަޖެހިފައިވާ ކަމަށެވެ.
"އޭގެ ފަހުން ބޮމްބޭ ސަމުރާއީގެ މަސައްކަތް ފަށާނީ. ބެލެވޭ ގޮތުން. އެ ފިލްމުގެ މަސައްކަތް ފެށޭނީ ސެޕްޓެމްބަރު މަހުގެ ތެރޭގައި. ފިލްމުގެ ކުރޫގައި އިންޑިއާންގެ ބޭރުގެ ކްރޫންތަކެއް ވެސް ހިމެނޭ ފިލްމެެއް އެއީ،" ސައިފް އަލީ ހާނާ ކައިވެނިކޮށްގެން އުޅޭ ކަރީނާ ބުންޏެވެ.
ކަރީނާގެ އެއްވެސް ފިލްމެއް އަވަސް މުސްތަގުބަލެއްގެ ތެެރޭގައި ބެލުންތެރިންނާ ހަމައަށް އަންނަން ނެތް އިރު، އޭނާ ވަނީ މީގެ ކުރިން ބޮޑެތި އޮފާތަކެއް ދޫކޮށްލައިފަ އެވެ.
އެގޮތުން އެންމެ ފާހަގަކޮށްލެވެނީ މިދިޔަ އަހަރުގެ އެންމެ ކާމިޔާބް ފިލްމުތަކުގެ ތެރޭގައި ހިމެނޭ ސަންޖޭ ލީލާ ބަންސާލީގެ "ރާމް-ލީލާ" އެވެ. އެ ފިލްމުގައި ދީކިޕާ ޕަދްކޯން ކުޅުނު ރޯލް އެންމެ ފުރަތަމަ ލިބުނީ ކަރީނާއަށެވެ.
މީގެ އިތުރުން ޒޯޔާ އަހްތަރު ދެބޭންގެ މައްޗަށް ބިނާކޮށް ހަދަން އުޅުނު ފިލްމް ވެސް ވަނީ ކުރިއަށް ގެންދެވޭ ގޮތް ނުވެފަ އެވެ. އެ ފިލްމު ޒޯޔާ ބޭނުންވީ ކަރީނާ އާއި އޭނާގެ ކަޒިން ރަންބީރު ކަޕޫރު ހިމަނައިގެން ހަދާށެވެ.
އެކަމަކު އެކަން ކާމިޔާބުވާ ގޮތް ނުވުމުން ޒޯޔާ ވަނީ "ދިލް ދަޅަކް ނޭ ދޯ" ގެ ނަމުގައި ފިލްމެއްގެ މަސައްކަތް ފަށަން ތައްޔާރުވެފަ އެވެ.
އެ ފިލްމުގެ ތަރިންނަކީ ޕްރިޔަންކާ ޗޯޕްޅާ، ރަންވީރު ސިންގް، އަނިލް ކަޕޫރު، އަނުޝްކާ ޝަރްމާ އެެވެ.