ރައީސުލް ޖުމްހުރިއްޔާ އަބްދުﷲ ޔާމީން އަބްދުލް ގައްޔޫމް މިއަދު ހަވީރު އައްޑޫއަށް ވަޑައިގަންނަވަން ހަމަޖެހިފައިވާ ކަމަށް ރައީސް އޮފީހުން ބުނެފި އެވެ.
ރައީސް ތަރުޖަމާން އިބްރާހިމް މުއާޒު ވިދާޅުވީ ރައީސް އައްޑޫއަށް މިއަދު ކުރައްވާ ދަތުރުފުޅަކީ ގއ. ވިލިގިލި އަށާއި އައްޑު އަށް ކުރައްވާ ދަތުރުފުޅެއް ކަމަށެވެ.
މުއާޒު ވިދާޅުވީ ރައީސްގެ އައްޑޫގެ ދަތުރުފުޅަކީ ރައްޔިތުންގެ ހާލު ބެއްލެވުމަށް އެމަނިކުފާން ކުރައްވާ ޒިޔާރަތެއް ކަމަށެވެ. އަދި މިރޭ ރަސްމީ ޖަލްސާއެއް ހިތަދޫ ޝަރަފުއްދީން ސްކޫލްގައި ބޭއްވުމަށް ވަނީ ހަމަޖެހިފަ އެވެ.
ރައީސް ޔާމީން މިއަދު ހަވީރު އައްޑޫއަށް ކުރައްވާ ޒިޔާރަތުގައި މިރޭ 8:30 ހިތަދޫ މެދު ދާއިރާއަށް ޕީޕީއެމްގެ ފަރާތުން ކުރިމަތި ލައްވާ ހިޔަލީ މުހައްމަދު ރަޝީދުގެ ކެމްޕެއިން ހަރަކާތުގައި ބައިވެރިވެވަޑައިގަތުމަށް ހަމަޖެހިފައިވާކަމަށް ހިޔަލީގެ ފަރާތުން ވަނީ ބުނެފައެވެ.
ނިމިގެން ދިޔަ ލޯކަލް ކައުންސިލް އިންތިހާބްގެ އެންމެ ފަހު ވަގުތު ކޮޅާއި ދިމާވާ ގޮތަށް ކުއްލި ދަތުރުފުޅެއް ރައީސް ވަނީ އައްޑޫއަށް ކުރައްވާފައެވެ.