އެކްޓަރު އަނޫޕަމް ކޭރުގެ އަންހެނުން އަދި ބަތަލާ ކިރަން ކޭރު އިންޑިއާގެ ގާނޫނު ހަދާ މަޖިލިސް "ލޯކް ސަބާ" އަށް އިދިކޮޅު ޕާޓީ ބާރަތިއާ ޖަނަތާ ޕާޓީ (ބީޖޭޕީ) ގެ ޓިކެޓްގައި ވާދަ ކުރަން ނިންމައިފި އެވެ.
ސިޔާސީ މަގާމެއް ފުރަން ނިންމައޮ ކިރަން، 58، ވާދަ ކުރަނީ ޗަންދީގަރްގެ ގޮނޑިއަކަށެވެ. އަދި އޭނާ ވަނީ ކެމްޕޭން ވެސް ފަށައިފަ އެވެ. ކާމިޔާބް ގިނަ ފިލްމުތަކެއް ކުޅެފައިވާ ކިރަންއަކީ 2009 ވަނަ އަހަރުން ފެށިގެން ބީޖޭޕީގެ މެމްބަރެކެވެ.
ކިރަން މިއަދު ޗަންދީގަރްގައި ކުރިއަށް ގެންދިޔަ ކެމްޕޭން ހަރަކާތަކަށް އިދިކޮޅު ބީޖޭޕީގެ އެކްޓިވިސްޓުން ވަނީ ހުރަސް ވެސް އަޅައިފަ އެވެ.
އެ މީހުން ބުނެފައި ވަނީ އޭނާއަކީ ޗަންދީގަރަށް ނިސްބަތްވާ މީހެއް ނޫން ކަމަށާއި އެތަނުގެ ހާލަތު އެއްވެސް ވަރަކަށް ކިރަން އަށް ނޭނގޭނެ ކަމަށެވެ.
އެހެންވެ މުމްބާއީން ދިޔަ ބީރައްޓެއްސަކު، އެ މީހުންގެ ބަސް ކިޔަން ޖެހޭ މަގާމަކަށް ކުފޫ ހަމަނުވާ ކަމަށް އެކްޓިވިސްޓުން ބުނެފައިވެ އެވެ.
އަދި ބިސް އުކައި، ކަޅު ދިދަ ނަގައި މުޒާހަރާކޮށް، ކިރަން ޒިޔާރަތް ކުރަން ހަމަޖެހިފައި އޮތް ބީޖޭޕީގެ އޮފީހަށް ދިއުމަށް ވެސް ހުރަސް އެޅި އެވެ. ބިސް ޖެހި އިރު، ކާރުގައި އަނޫޕަމް އިން ނަމަވެސް ކިރަންއެއް ނެތެެވެ.
ކިރަން ޗަންދީގަރަށް ކުރި ޒިޔާރަތުގައި ޗަންދީގަރްގެ ކުރީގެ މެމްބަރު އަދި ބީޖޭޕީގެ ލީޑަރު ސަތިއަ ޕާލް ޖެއިން ވެސް ބައިވެރިވެވަޑައިގެންނެވި އެވެ.
މިއަދު ހިނގި ހާދިސާ އާ ގުޅިގެން ކިރަން އޭނާގެ ކެމްޕޭން ހަރަކާތްތައް ހުއްޓާލައިފައެއް ނުވެ އެވެ. އަދި މި ހާދިސާ އާ ބެހޭ ގޮތުން އޭނާ ވާހަކަ ވެސް ދެއްކި އެވެ.
"އަހަންނަކީ ޗަންދީގަރަށް އުފަން، މި ޝަހަރުގެ ދަރިއެެެއް. އަހަރެން އުޅެ ބޮޑުވީ މިތާގައި. އަހަންނާ ދެކޮޅަށް ހަރަކާތްތައް ހިންގި މީހުންގެ ތެރޭގައި ހިމެނެނީ ހަމަ އަހަރެން ނިސްބަތްވާ ބީޖޭޕީގެ އެކްޓިވިސްޓުން،" މީޑިއާ ވާހަކަ ދައްކަމުން ކިރަން ބުންޏެވެ. "އެ މީހުންނާ ވާހަކަ ދައްކައި ސުލްހަވެރި ހައްލެއް ހޯދަން މަސައްކަތް ކުރާނަން."
ކިރަންގެ ސިޔާސީ ކުރިމަގާ ބެހޭ ގޮތުން ފިރިމީހާ އަނޫޕަމް ވަނީ މިއަދު ޓްވީޓް ވެސްކޮށް، އެންމެންގެ ހެޔޮ ދުއާ ބޭނުންވާ ކަމަށް ބުނެފަ އެވެ.
"ކިރަން މި ވަނީ ސިޔާސީ ދަތުރެއް ފަށާފައި. އެއީ އޭނާގެ އުފަން ރަށާ ހިސާބުން. އެންމެންގެ ހެޔޮ އެދުމާއި ދުއާ ކިރަން އަށް ބޭނުން،" އަނޫޕަމްގެ ޓްވީޓްގައި ބުނެފައިވެ އެވެ.
މީޑިއާ ރިޕޯޓްތައް ބުނާ ގޮތުން ޗަންދީގަރްގެ ގޮނޑި އަށް ބަތަލާ ގުލް ޕަނަންގް، ވާދަ ކުރަން މަޝްހޫރު ސިޔާސީ ލީޑަރު އަރްވިން ކެޖްރިވާލްގެ އާމް އާދްމީ ޕާޓީ (އޭޕީޕީ) އިން ވަނީ ގުލް އަށް ހުށަހަޅައިފަ އެވެ.
އިންޑިއާގެ ގާނޫނު ހަދާ މަޖިލީހަށް މެމްބަރުން ހޮވަން ބާއްވާ އިންތިހާބު އޮންނާނީ މެއި މަހުގެ ތެރޭގަ އެވެ.