(މާޗް 19، 2014 ވަނަ ދުވަހުގެ ބަޔާ ގުޅޭ)
މިފްކޯ އިން އައްޑޫގައި ހަދަން ނިންމި މަސް ފެކްޓްރީ
ދެހާސް ހަ ވަނަ އަހަރުގެ އޮގަސްޓް މަހުގެ ތެރޭގައި މިފްކޯ އިން ގެންދިޔައީ އައްޑޫގައި މަސް ފެކްޓްރީ (ދަޅުގައި މަސް ބަންދު ކުރާ) އެއް ހެދުމަށް ވާން ޖެހޭ ތައްޔާރީތައް ވަމުން ކަމަށް އެ ކުންފުނިން އިއުލާން ކުރި އެވެ.
ތިން ފިޔަވައްސަކަށް ބަހާލައިގެން ކުރިއަށް ގެންދަން ހަމަޖައްސާފައިވާ މި ފެކްޓްރީގެ މަސައްކަތް ނިމޭ އިރު 390 މީހުންނަށް ވަޒީފާ ހޯދައި ދެވޭނެ ކަމަށް ބުންޏެވެ. އެ މަގުސަދުގައި ވެސް މެ އެވެ.
ފުރަތަމަ ފިޔަވަހީގައި ބޮޑެތި ބޯޓްފަހަރު ކައިރި ކުރެވޭ ވަރުގެ ބަނދަރަކާއި 24 ގަޑި އިރު ތެރޭގައި 160 ޓަނުގެ މަސް ފިނިކޮށް ގަނޑު ކުރެވޭ ވަރުގެ ބެރެއިން ޓޭންކާއި 2,000 ޓަނުގެ ކޯލްޑް ސްޓޯރޭޖަކާއި ކަޓްސުބިޝީ ޕްލާންޓަކާއި އަދި ލެބޯރެޓަރީއެއް ހެދުމަށް ހަމަޖެހިފައި އޮތެވެ.
ދެވަނަ ފިޔަވަހީގައި ވަނީ ބަނދަރު ބޮޑު ކުރުމާއި ކޯލްޑް ސްޓޯރޭޖަށް 1,000 ޓަނު އިތުރު ކުރުމެވެ. އަދި ކަޓްސުބިޝީ ޕްލާންޓް ވެސް ބޮޑު ކުރުމެވެ. ތިން ވަނަ ފިޔަވަހީގައި ފިޝްމީލް ޕްލާންޓެއްގެ އިތުރުން ޓޫނާ ލޮއިންސް ޕްލާންޓެއް ބެހެއްޓުމެވެ.
މިފްކޯގެ މި މަސް ޕްރޮޖެކްޓް ހިންގުމަށް ބޭނުންވާ ބިން ހިއްކުމުގެ މަސައްކަތް ވަނީ ނިންމައިފަ އެވެ. އެއީ ހިތަދޫ އާރްއޭއެފް ކުރިމަތިން ސަރަހައްދީ ބަނދަރުގެ ހުޅަނގުންނެވެ.
ޖޫން 2007 ގައި މި ޕްރޮޖެކްޓްގެ ދަށުން ހަދާ ކޯލްޑް ސްޓޯރޭޖްގެ މަސައްކަތް ކުރާނެ ކޮންޓްރަކްޓަރެއް ހޯދަން އިއުލާން ކުރެވޭނެ ކަމަށް މިފްކޯ އިން ބުނެފައިވެ އެވެ.
މި ދުވަސްވަރަކީ މަސްވެރިކަން ވަރަށް ދަށް ދުވަސްވަރެކެވެ. އަށްސަތޭކަ ޓަނުގެ މަސް ގަތުމުގެ ގާބިލްކަން ލިބިފައިވާ މިފްކޯ އަށް އާންމު ގޮތެއްގައި ލިބެނީ އެންމެ 80 ޓަނުގެ މަހެވެ.
"މަސްވެރިންނަށް ވެސް އަދި އަޅުގަނޑުމެންނަށް ވެސް މިއީ ފޫބައްދަން ދަތި ގެއްލުމެއް" ވަމުންދާ ދުވަސްވަރެކޭ މިފްކޯގެ މެނެޖިން ޑިރެކްޓަރު އާދިލް ސަލީމް ވިދާޅުވި އެވެ. ހަގީގަތުގައި ނުލިބޭ މަހަކަށް އިންވެސްޓް ކުރުމުގެ ބޭނުމެއް ނެތް ކަމަށާއި އެކަމަކު މިފްކޯގެ ބޯޑުން ނިންމާފައިވާ ގޮތަށް އައްޑޫގައި މަސް ޕްރޮސެސް ކުރާނެ ފެސިލިޓީސް ގާއިމު ކުރުމުގެ މަސައްކަތް މި ދަނީ ކުރަމުން ކަމަށް އޭނާ ވިދާޅުވި އެވެ.
ހަމަ މި ދުވަސްކޮޅުގެ ތެރޭގައި، ޖޫން 16، 2007 ގައި 3,000 ޓަނުގެ ބޯޓްފަހަރު ކައިރި ކުރެވޭ ގޮތަށް ހަދާފައިވާ ސަރަހައްދީ ބަނދަރުން ކޮންޓޭނަރުގައި މަސް އެކްސްޕޯޓް ކުރަން މި މަހުގެ 14 ވަނަ ދުވަހު ކުރި މަސައްކަތް ނާކާމިޔާބުވި އެވެ. ބަނދަރުގައި ބާނި ބޮޑުވެގެން ނުރައްކާތެރި ހާދިސާއެއް ހިނގައިފާނެތީ މަސައްކަތް ކުރިއަށް ނުގެންދެވިގެންނެވެ.
މިފްކޯގެ ބޯޓްފަހަރަށް އައްޑޫން ގަންނަ މަސް ސީދާ އައްޑޫން ރާއްޖޭން ބޭރަށް ގެންދިއުމުގެ ވިޔަފާރި ވެސް ވަނީ 2006 ގެ ފެބްރުއަރީ އައި އިރު ފެށިފަ އެވެ. މީގެ ކުރިން މަސް ބޭރު ކުރީ ކޫއްޑޫ ބަނދަރުންނެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.