އައްޑޫގައި އެޅުމަށް ނިންމާފައިވާ އިސްލާމިކް ސެންޓަރުގެ މަސައްކަތް އަންނަ ޖޫން މަހުގެ ތެރޭގައި ފައްޓަވާނެ ކަމަށް ރައީސް އަބްދުﷲ ޔާމީން ރޭ ވިދާޅުވެއްޖެ އެވެ.
ހިތަދޫގައި ރޭ ވާހަކަ ދައްކަވަމުން ރައީސް ވިދާޅުވީ އެކަމަށް ބޭނުންވާ ފައިސާ ވެސް އެބަހުރި ކަމަށެވެ.
"އެ މަސައްކަތަށް ބޭނުންވާ ފައިސާ އެބަހުރި. އިރާދަކުރެއްވިއްޔާ މި އަހަރުގެ ޖޫން މަހުގެ ތެރޭގައި ހިތަދޫގައި އިސްލާމިކް ސެންޓަރެއް އެޅުމުގެ މަސައްކަތް އަޅުގަނޑުމެން ފަށާނަން. އެ ފައިސާ އަކީ ބަޖެޓްގައި ހިމަނާފައި އޮތް ފައިސާއެއް. އެ މަޝްރޫއު ކުރިއަށް ދާނެ،" ރައީސް ޔާމީން ވިދާޅުވި އެވެ.
ސައުދީ ސަރުކާރުގެ އެހީގައި އައްޑޫގައި އިސްލާމިކް ސެންޓަރެއް ގާއިމު ކުރާނެ ކަމަށް އެންމެ ފުރަތަމަ އިއުލާން ކުރެއްްވީ ކުރީގެ ރައީސް މުހައްމަދު ނަޝީދުގެ ސަރުކާރުގަަ އެވެ. އެއީ އައްޑޫގައި މެއި 12، 2011 ގައި ބޭއްވި ކޮމިނިއުޓީ ކެބިނެޓްގަ އެވެ.
އޭރު ސަރުކާރުން ބުނެފައި ވަނީ ހިތަދޫގައި ހުރި ގައުމީ ޔުނިވަސިޓީ ކެމްޕަހުގެ ދަނާލުގެ އޮތް ބިމުގައި އިމާރާތް ކުރަން ނިންމާފައިވާ އިސްލާމިކް ސެންޓަރުގެ ޑިޒައިން ވެސް ނިމިފައިވާ ކަމަށެވެ.
އެހެން ނަމަވެސް ނަޝީދުގެ ސަރުކާރު ނިމުމަކަށް އައި ފަހުން، އެ މަޝްރޫއާ ގުޅޭ ވާހަކައެއް ސަރުކާރަކުން ނުދައްކަ އެވެ.