ލާމަރުކަޒީ އުސޫލުން އިދާރީ ދާއިރާތައް ހިންގުމުގެ އުސޫލު ދިވެހިން ވަނީ އުފަލާއި އެކު ބަލައިގެން ފައެވެ. އެކަމަކު މި ނިޒާމްގައި ބޮޑެތި މައްސަލަތަކާއި، ގާނޫނީ ފުށުއެރުންތައް ހުރިކަން އެންމެވެސް ގަބޫލް ކުރެ އެވެ. ކައުންސިލްތަކުގެ ފުރަތަމަ ދައުރު ނިމިގެން ގޮސްފައިވަނީ އެނިޒާމަށް ބޮޑެތި ބަދަލުތައް ގެނެވިދާނެ ދާއިރާތައް ފާހަގަ ކުރުމަށް ފަހު އެވެ.
ރައްޔިތުންގެ މަޖިލިސް އާ ދައުރަކަށް އިންތިހާބް ކުރުމަށް ކެމްޕެއިން ފޯރިގަދަވެފައިވާ އިރު ގިނަ ކެންޑިޑޭޓުން ދަނީ މި ނިޒާމަށް މުހިއްމު އިސްލާހްތަކެއް އަންނަން ޖެހޭކަމަށް ބުނަމުންނެވެ.
ކައުންސިލަށް އިތުރަށް ބާރުވެރިކުރުވާ، ކައުންސިލް ގާނޫނާއި ފުށޫ އަރާ ގާނޫންތައް ބަދަލު ކުރާނެ ކަމަށް ބުނަމުންނެވެ. ލާމަރުކަޒީ ގާނޫނު އުވާލައި ކައުންސިލްތައް އުވާލާނެ ވާހަކަ ދައްކާ އަޑު އެއްވެސް ހިސާބަކުން ނީވެ އެވެ.
ނަމަވެސް ރޭ ހިތަދޫ މެދު ދާއިރާގައި ޕީޕީއެމްއިން ބޭއްވި ބައްދަލުވުމެއްގައި ކައުންސިލްތަކުގެ ބެލެނިވެރިފަރާތް ކަމަށްވާ ލޯކަލް ގަވަމެންޓް އޮތޯރިޓީ (އެލްޖީއޭ) ގެ ރައީސް މުހައްމަދު ނާޒިމް ވަނީ އައްޑޫ ސިޓީ ކައުންސިލް އުވާލަން ޖެހިދާނެކަމަށް ބުނެ އިންޒާރު ދެއްވާފަ އެވެ.
ތަރައްޤީގެ ކަންކަމަށް ހުރަސް އަޅައި، ސަރުކާރަށް ޖެއްސުން ކުރާނަމަ އައްޑޫ ސިޓީ ކައުންސިލް އުވާލަން ޖެހިދާނެކަމަށް ނާޒިމް ވިދާޅުވި ވިދާޅުވުމަކީ މުޅި ނިޒާމު ފުޑުފުޑުކޮށްލުމަށް ދިން އިންޒާރެއްކަމަށް ބެލެވޭނެ ޖާގައެބަ އޮތެވެ.
އައްޑޫ މޭޔަރު އަބްދުﷲ ސޯދިގް (ސޯބެ) ވިދާޅުވީ ނާޒިމް ދެއްވި އިންޒާރަކީ މުޅި ލާމަރުކަޒީ ނިޒާމު ފުނޑުފުނޑުކޮށްލުމަށް ދިން ހަމަލާއެއް ކަމަށެވެ.
އައްޑޫ ސިޓީ ކައުންސިލް ހުވާ ކުރުމަށް ބޭއްވި ރަސްމިއްޔާތުގައި ހުރިހާ ކައުންސިލަރުން ވަނީ މި ސަރުކާރަށް ފުރިހަމައަށް އެއްބާރުލުންދީ ރައްޔިތުންނަށް ބޭނުންވާ ކަންކަން ފަހިކޮށް ދިނުމަށް މަަސައްކަތް ކުރާނެކަމަށް ބުނެފަ އެވެ.
ފާއިތުވި މަދު ދުވަސްކޮޅު ތެރޭ ކައުންސިލްވަނީ ރައްޔިތުންނާއި ވަކި ވަކީން ބައްދަލުކޮށްފައެވެ. އާއްމުކޮށް ހުޅުވާލައިގެން ބޭއްވި ބައްދަލުވުން ތަކަށް ރައްޔިތުން ހާޒިރުވެ ކައުންސިލާއި ވަނީ މަޝްވަރާކޮށް ހިޔާލު ބަދަލުކޮށްފަ އެވެ. ނިމިގެން ދިޔަ ހަފްތާ އާއި މިހަފްތާގައި ރައްޔިތުންނަށް ހިދްމަތްދޭ ތަފާތު މުވައްސަސާތަކާ ކައުންސިލުން ދަނީ ބައްދަލު ކުރަމުންނެވެ.
ރައްޔިތުންގެ ކަންބޮޑުވުންތައް އިންތިހާއަށް އޮތް ކަރަންޓްގެ ހާލަތު ބެލުމަށް މި ހަފްތާގައި ފެނަކަ ކޯޕަރޭޝަނާ ވަނީ ބައްދަލުކޮށްފައެވެ. މަގުހަދަމުން އަންނަ ރޯޑް ކޯޕަރޭޝަންއާއި ކައުންސިލުން ބައްދަލުކޮށްފިއެވެ. ހޮސްޕިޓަލްގެ ހާލަތު ބަލައިފިއެވެ. ޖުމްލަކޮށް އައްޑޫގެ ހުރިހާ މުވައްސަސާތަކާއި ކައުންސިލްގެ އާ ދައުރުގެ މިވީ ދުވަސްކޮޅު ވަނީ ބައްދަލުކޮށްފައެވެ.
ލާމަރުކަޒީ ގާނޫނުން ކައުންސިލަށް ލާޒިމް ކުރާ ކަންކަން ކުރާ ގޮތް ކައުންސިލުން ބަލަންޖެހެއެވެ. އެކަން ހަމަ މަގުން ނުދާނަމަ އެކަމަށް ބަސްބުނުމުގެ ހައްްގު ކައުންސިލަށް ލިބިގެންވެއެވެ.
ލާމަރުކަޒީ ގާނޫނުގެ 42 ވަނަ މާއްދާގައި ބަޔާންކޮށްފައިވާ ކަންކަން ކުރާނަމަ އެކަންކަން ކުރެވިގެންދާން ޖެހޭނީ ކައުންސިލާއި މަޝްވަރާ ކުރެވިގެން ކައުންސިލްގެ ލަފާގެ މަތިންނެވެ.
އައްޑޫގެ މަގު ހަދާނަމަ އެކަން ކައުންސިލުން ބަލަންޖެހެއެވެ. ކޮންމެ ފަރާތަކުން މަގު ހެދިޔަސް މަގުގެ ކުރެހުމާއި މަގުހަދަމުންދާ ގޮތުގެ މަޝްވަރާ ކައުންސިލާއި ކުރަންޖެހެއެވެ. އެވާހަކަ ދައްކާއިގެން ކައުންސިލް އުވާލާނަމަ އުވާލަންވީއެވެ.
ކައުންސިލުން ސަރުކާރަށް އެއްބާރުލުން ނުދޭނަމަ އުވާލާނެކަމަށް ބުނާއިރު ސަރުކާރުން ކައުންސިލަށް އެއްބާރުލުން ދޭތޯއެވެ. ސަރުކާރުން ނިންމާ ނިންމުމެއް ކައުންސިލާއި ހިއްސާ ކުރޭތޯއެވެ. އެކަމުގައި ކައުންސިލްގެ ހިޔާލަކަށް އެދިފައިވޭ ހެއްޔެވެ؟
އައްޑޫ ސިޓީ ކައުންސިލަށް އާމްދަނީ ހޯދުމުގެ ފުރުސަތު ލާމަރުކަޒީ ގާނޫނުން ވަނީ ލިބިފައެވެ. އެކަމަކު ގެސްޓް ހައުސް އާއި ސިޓީ ހޮޓާ އަޅަން އައްޑޫން ބިން ދޫކުރުމުގެ ހުއްދަ ސަރުކާރުން ނުދެއެވެ. ކައުންސިލަށް އާމްދަނީ ލިބޭނެ ހުރިހާ މަގެއް ސަރުކާރުން ވަނީ ބަންދުކޮށްފައެވެ. އެވާހަކަ އެލްޖީއޭއަކުން ނުދައްކައެވެ. ކައުންސިލް ބާރުވެރިކުރުމަށް އެލްޖީއޭއަކުން މަސައްކަތެއް ނުކުރެވެ. މިދިޔަ ދައުރުގައިވެސް އަދި މިދައުރުގެ މިވީހާތަނަށް ވެސްމއެވެ.
ލާމަރުކަޒީ ގާނޫނުގެ 42 ވަނަ މާއްދާގެ (ޅ)ގައި ވާ ޕްރީ ސްކުލް ހިންގުމަށް ބޭނުންވާ ފައިސާ އަދިވެސް ސަރުކާރުން ވަނީ ހިފަހައްޓާފައެވެ. އެސަބަބާއި ހެދި އައްޑޫ ސިޓީ ކައުންސިލުން ޕްރީ ސްކޫލްތަކަށް އެހީތެރިކަން ދެވޭކަށް ނެތެވެ.
ކޮންމެ ގޮތެއް ވިޔަސް ޕްރީ ސްކޫލްގެ ކަންކަން ބަލަހައްޓަން ޖެހެނީ ކައުންސިލުންނެވެ. މިނިސްޓްރީ އޮފް އެޑިއުކޭޝަނުންގެ ތެރޭ ޕްރީ ސްކޫލް ތައުލީމު ނުހިމެނެއެވެ. މިފަދަ އެތައް ކަމެއް ހުރި އިރު "ޖަޒްބާތުގައި" ޖެހިވަޑައިގެން އެލްޖީއޭގެ ރައީސް ކައުންސިލް އުވާލާނެ ކަމަށް ވިދާޅުވުމަކީ ޒިއްމާދާރުކަން ކުޑަ ކަމެކެވެ.
ލާމަރުކަޒީ ގާނޫނާ އެއްގޮތަށް ކަން ކުރަން ބުނުމުން އައްޑޫ ސިޓީ ކައުންސިލް އުވާލަންވީ އެވެ. އެކަމަކު އެއްވެސް ހައިސިއްޔަތެއް ނެތް ސިޔާސީ ބަޔަކު ދައުލަތުގެ ފައިސާ ތަޅައި ހުސް ކުރިއަސް މައްސަލައަކަށް ނުވެ އެވެ. އެހެން ކަމަށްވާ ނަމަ ލަސްނުކޮށް އަވަހަކަށް ކައުންސިލް އުވައިލާށެވެ.