(މާޗް 20، 2014 ވަނަ ދުވަހުގެ ބަޔާ ގުޅޭ)
ވީމާ ވައިގެ މަގުން ޗުއްޓީ އަށް ރަށަށް ދާ މީހުންގެ ހަވާލުގައި ސިޓީބިޓީ ފޮނުވެން ފެށުމުން ރިސޯޓްތަކުގައި ތިބި އާއިލާ މީހުންނަށް އާއިލާ މީހުންގެ ހަބަރުދަބަރު އޮޅުން ފިލާން ފެށި އެވެ. ވައިގެ ދަތުރު ފެށުމުގެ ކުރިން ސިޓީ އާއި ހަދިޔާތައް ފޮނުވައި ހެދީ ކަނޑު ބޯޓްފަހަރުންނެވެ.
ފުރާ މީހަކާއި ދިމާ ނުވާ ފަހަރު އާއިލާގެ، ރަށުގެ ހަބަރެއް ނުވެ މަސް ދުވަސް ވެސް ހިނގައިދެ އެވެ. މިފަދައިން ކަންތައް އޮތް ދުވަސްވަރު އާއިލާތަކުގެ ފިރިހެންވާލެއް ނެތި، ނިކަމެތިވެ، ބިކަވެ ހާލެއް ނެތި ދިޔަ އެވެ.
އޭގެ ސަބަބުން އާއިލާތައް ރޫޅޭ ފަދަ އެތަކެެއް މައްސަލަތަކާއި ކަންތައްތަކެއް ކުރިމަތިވަމުން ދިޔަ އެވެ. ލޯބިވެތި އަނބިން އެކަނިވެރި މައިންނަށްވެ، ދެލޮލުގެ ނޫރު ފަދަ ދަރިން އަތުން ދޫވެ، ބީވެގެން މަގުމަތިވި އެވެ.
"އެ މީހުންނަށް ފުރުސަތު ނެތީ. އެ މީހުން ކުރާނެ މަސައްކަތެއް ނެތީ. އެހެންވީމާ އެ މީހުންނަށް ޖެހެނީ އެ މީހުންގެ އާއިލަތަކާއި ރަށް ދޫކޮށްލާފައި މާލެ އައިސް މަސައްކަތް ކުރަން ތިބެން. ލިބޭ އާމްދަނީގެ ބޮޑު ބައެއް ގޭގެ ކުއްޔަށާއި ކެއުމަށް ދީގެން ވެސް މާލޭގައި އުޅެން،" ނޮވެމްވަރު 16-21، 1991 އަށް މާލޭގައި ބޭއްވުނު އަތޮޅުވެރިންގެ ހަ ވަނަ ބައްދަލުވުން ހުޅުވުމުގެ ރަސްމިއްޔާތުގައި ތަގުރީރު ކުރައްވަމުން އެޓޮލްސް މިނިސްޓަރު އިލްޔާސް އިބްރާހީމް ވިދާޅުވި އެވެ.
"އާމްދަނީގެ ޔަގީންކަން އަދި ހަމައެކަނި އޮތް ދިމާއަށް އަންނަން ޖެހެނީ. އާދެ، އެ މީހުންގެ ލޯބިވާ ރަށް ދޫކޮށް މާލެ އަންނަން ޖެހެނީ. އެހެންވީމާ ދެން ވާނީ ކިހިނެއްތޯ. ރަށުގައި ތިބި އެ މީހުންގެ އާއިލާތައް އުޅެނީ އެކަނިވެރިކޮށް. ރަށުގައި ހުރި އެ މީހުންގެ ގޯތިގެދޮރު ވަނީ ވީރާނާވަމުން. އަދި މީގެ އިތުރަށް އިޖުތިމާއީ މައްސަލަތައް ދަނި އުފެދެމުން. އާއިލާތައް ދަނީ ރޫޅެމުން."
ވީމާ ސަރުކާރަށް ވެސް މިކަންކަން އޮތީ މިހާ ދެރަ ގޮތަކަށް ވަރަށް ރަނގަޅަށް އެނގިވަޑައިގަންނަވަ އެވެ.
އެ މަނިކުފާން މިފަދައިން ވިދާޅުވީ ގަމުގައި ފެކްޓްރީތައް ވެސް ހިނގަމުން ދިޔަ ދުވަސްވަރު އެވެ. އެކަމަކު އެ ދުވަސްވަރު ވެސް ހާލަތު އޮތީ މިފަދައިންނެވެ.
އަޅުގަނޑުގެ ކޮއްކޮ ސައީދު ބޯޓް ދަތުރު ކުރަން ދިޔައީ ވެސް މި ދުވަސްވަރު އެވެ. އޭނާގެ އުމުރުން އެންމެ 18 އަހަރުގައު ކިޔެވުން ދޫކޮށްލާފައި ދާން ޖެހުނީ އާއިލާގެ މީހުންނަށް ހަރަދު ކުރާނޭ ގޮތެއް ހޯދުމަށެވެ.
އެތަކެއް އަހަރުގެ ބުރަ މަސައްކަތާއި ހިތްވަރުން ކަނޑުމަތީގައި އޭނާގެ މުޅި ޒުވާން އުމުރު ހޭދަކޮށްގެން ހޯދި ޗީފް އިންޖިއަރުގެ މަގާމާއި ސެޓްފިކެޓާ އެކު އަދު އޭނާ ވަނީ ޕްރޮފެޝަނަލް ގިންތީގައި ހިމެނިފަ އެވެ.
މުސްކުޅި މައިންބަފައިން ދުނިޔެ އަޅައި ދިޔައީ މޫނު ވެސް ނުފެނި އެވެ. މިއީ އެ ދުވަސްވަރުގެ އައްޑޫ މީހުން ދިރިއުޅުމަށްޓަކައި ދިރިހުރުމާ ކުރި ހަނގުރާމަ އެވެ.
ލޮބުވެތި މައިންބަފައިންގެ ފާފަ ފުއްސަވައި ހެޔޮ ރަހުމަތް ލައްވާށި އެވެ. އޭނާ ފަދައިން މަޖުބޫރީ ހާލަތުގައި ކެތްތެރިކަމާ އެކު ބުރަ މަސައްކަތްކޮށްގެން ހިތްވަރު ލިބިގެން، އެތައް ބަޔަކު ވަނީ އަދު ކާމިޔާބް ވިޔަފާވެރިންނަށާއި ރިސޯޓް އޯނަރުންނަށްވެފަ އެވެ.
އެކި ރޮނގުރޮނގުން ކުރިއަރާފައިވާ ފަންނުވެރިންނަށާއި އިލްމުވެރިންނަށް ވެފަ އެވެ. ދައި މަތީފައި ފޮއެ ދަށުވެ، ޗިސްވެގެން ހީނާ ފަތަށް ކުލަ އަންނަ ބީދައިންނެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.