ސ. ފޭދޫން ފުރައިގެން މާލެ ދިއުމަށް ދަތުރު ކުރި "ފަޒާ 2" ހިތަދޫ ނެރުމައްޗަށް އެރުމާ ގުޅިގެން އެމްއެންޑީއެފް ސަދަން އޭރިއާ ކޯސްޓްގާޑް ސްކޮޑްރަންއިން އެހީތެރިކަން ފޯރުކޮށް ދީފި އެވެ.
ފަސް މީހުންނާ އެކު ދަތުރު ކުރި "ފަޒާ 2" ހިތަދޫ ނެރުމައްޗަށް އަރާފައި ވަނީ އިއްޔެ ރޭ ފަތިހު 4:30 ހާއިރު އެވެ.
މި ހާދިސާގެ މަޢުލޫމާތު އެމްއެންޑީއެފް ސަދަން އޭރިއާ ކޯސްޓްގާޑް ސްކޮޑްރަން އަށް ލިބުމާ އެކު އިއްޔެ ހެނދުނު 6:00 ހާއިރު ޑައިވަރުންގެ ޓީމަކާ އެކު ހާބަ ކްރާފްޓް ލޯންޗް އެ ސަރަހައްދަށް ގޮސް ދޯންޏަށް އެހީތެރިކަން ފޯރުކޮށް ދިނުމުގެ މަސައްކަތް ވަނީ ކޮށްފަ އެވެ.
ސަތޭކަ ފޫޓުގެ މުދާ އުފުލާ މިދޯނި ފުންކުރުމުގެ މަސައްކަތް ދޯނީގެ ވެރިފަރާތާ ގުޅިގެން ސަދަންް އޭރިއާ ކޯސްޓްގާޑް ސްކޮޑްރަން އަދި ހިތަދޫ ޕޯޓްސް ލިމިޓެޑުން ވަނީ ކޮށްފަ އެވެ. އެގޮތުން ހިތަދޫ ޕޯޓްސް ލިމިޓެޑްގެ ޓަގެއް ބޭނުންކޮށްގެން ދޯނި ވަނީ އިއްޔެ މެންދުރު 3:00 ގައި ފުންކޮށްފަ އެވެ.
"ފަޒާ 2" ފަރަށް އެރުމުގެ ސަބަބުން ދޯންޏަށް ވަނީ އެކި ވަރުގެ ގެއްލުން ލިބިފައެވެ. ނަމަވެސް މި ހާދިސާގައި ދޯނިން ދަތުރުކުރި އެއްވެސް މީހަކަށް ގެއްލުމެއް ލިބިފައެއް ނުވެ އެވެ.