(މާޗް 21، 2014 ވަނަ ދުވަހުގެ ބަޔާ ގުޅޭ)
މި މޭރުމުން އެހެނަސް ހިތި ހަނދާންތަކާ އެކުގައި ކަމަށް ވިޔަސް ވެސް ފާހަގަ ކުރަން ޖެހެނީ އަނބިދަރިން އެކަނިކޮށްލާފައި ވަޒީފާ ހޯދަން ފުރައިގެން ދިޔަ އެތަކެެއް ބައްޕައިންގެ އެކަނިވެރި އާއިލާތަކުން ޖީލެއްގެ ދަރިން ބޭކާރުވެގެން ދިޔަ ކަމެވެ.
ފުރިހަމަ ސިއްހީ ފަރުވާ އާއި އެކަށޭނެ ތައުލީމުން އެއްކިބާވެގެންނެވެ. ތަރުބިއްޔަތާއި މާތް އަހުލާގުން މަހުރޫމްކޮށްލައިފަ އެވެ.
ރައީސް މައުމޫންގެ ވެރިކަމުގެ މުޅި 30 އަހަރު ރިސޯޓްތަކުގެ ވަޒީފާތަކުގައި ހޭދަ ކުރި އެތައް ބަޔަކު މުސްކުޅިކޮށް، މއިަދު ވަނީ ރަށަށް ފޮނުވާލައިފަ އެވެ.
ސާވިސް ދާއިރާގެ މަސައްކަތް ކުރާ ވަރަށް ވުރެ އުމުރުން ދުވަސްވުމުންނެވެ. ބައެއް މީހުން ދުވަސްކޮޅަކު ސަރުދާރުންނަށާއި ވޮޗަރުންނަށް އަދި މިސްކިތު މުދިމުންނަށް ވެސް ގެންގުޅެފައިވެ އެވެ. ނަމަވެސް ވަޒީފާ އިން ވަކިކޮށް ރަށަށް ފޮނުވާލީ ހުސް އަތާ އެވެ. ހަދިޔާއެއް ނުދެއްވާ ވާހަކައެއް ނޫނެވެ. އަމިއްލަ މަސައްކަތު މީހުންގެ ދާއިރާއަކަށް ޕެންޝަނެއް، ޕެންޝަން ސްކީމެއް ނެތެވެ. މަސައްކަތު މީހުންނާ ބެހޭ ގާނޫނެއް ނެތެވެ.
މި ދާއިރާގައި ބުރަ މަސައްކަތްކޮށް، ފަތުރުވެރިކަމުގެ ސިނާއަތު ދުނިޔޭގެ ފެންވަރަށް އުފުލާލަ ދިން މީހުންގެ ހައްގެއް ނެތެވެ. ނަމަވެސް އެއީ ބައިނަލްއަގްވާމީ އެވޯޑްތަކަށް ވާދަ ކުރަމުންދާ ރިސޯޓްތައް އެ ފެންވަރަށް އުފުލާލަ ދިނުމަށްޓަކައި ކުޑަކުޑަ މުސާރަކޮޅަކަށް ހިނިތުންވެގެން ތިބެގެން މެހުމާންދާރީވީ މީހުންނެވެ.
މިއަދު އެ މީހުން މުސްކުޅިކަންމަތީ އެނބުރި އައިސް ރަށުގައި ދިރިއުޅެމުން ދަނީ ކިހިނެއްކަން ދެނަހުރި މީހަކު ނެތެވެ. އެ މީހުންނަށް ވެސް އުމުރުން ދުވަސްވީ މީހުންނަށް ދިނުމަށް ހަމަޖެހިފައިވާ އިނާޔަތުގެ ފައިސާ އާއި ހިލޭ ބޭސް ފަރުވާ ދެއްވަން މި ޖެހުނީ މި ދިވެހި ސަރުކާރަށެވެ.
ނަމަވެސް 1980 ގެ އަހަރުތައް ފެށިގެން އައި އިރު ވެސް ފަތުރުވެރިކަމުގެ ސިނާއަތު އޮތް ދެރަ ހާލަތާއި 2000 ގެ އަހަރުތަކުގައި އެ ރިސޯޓްޓަކަށް ލިބިފައިވާ ކުރިއެރުން އެންމެ ފުރިހަމައަށް ތަސައްވަރުކޮށް ދެވޭނީ މި ދެންނެވި ހިދުމަތްތެރިންނަށްކަން ގައިމެވެ. އެއީ އިއްޒަތެއް، ލައްޒަތެއް ނެތަސް ފަތުރުވެރިކަމުގެ ޕެންޝަނަރުންނެވެ.
އިސްލާމިއްޔާ ސްކޫލް
އިސްލާމިއްޔާއަކީ ޝެއިހް އިދްރީސް ހުސައިންގެ އިސް ނެގުމެކެވެ. އޭނާ ޝެއިހް ހުސައިން ރަޝީދާ މަޝްވަރާ ކުރެއްވުމަށް ފަހު، އެކުލަވާލި ކޮމިޓީއަކުން ނިންމެވީ ވަޖުހުފުޅަށްޓަކައި ކިޔަވައިދޭ އިސްލާމިއްޔާ ފެއްޓެވުމަށެވެ.
އެ ދެ ބޭކަލުންގެގެ އިތުރަށް މި ކޮމިޓީގައި ދެން ތިއްބެވީ ޝެއިހް އިބްރާހީމް ރުޝްދީ އާއި އަބްދުއްލަތީފު (ކަޅުބެ) އަދި ހިތަދޫ ޕްލާޒާ މުހައްމަދުދީދީ އެވެ.
"މި ފެންވަރުގެ ސްކޫލެއް ހިންގޭނީ ސަރުކާރުގެ އެހީތެރިކަމާއި ރުހުން ވަރަށް ބޮޑަށް ލިބިގެން ކަމަށްވާތީ އަޅުގަނޑުމެން މަޝްވަރާ ކުރީ އެވަގުތު އެޑިއުކޭޝަން މިނިސްޓަރަކަށް ހުންނެވި ޑރ. މުހައްމަދު ޒާހިރު ހުސައިން އާ. އަދި މައުހަދު (މައުހަދުލް އަރަބިއްޔަތުލް އިސްލާމިއްޔާ) ގެ މުދީރު އަލްއުސްތާޒް އިބްރާހީމް ރަޝީދު މޫސާ އާ. މި ބޭފުޅުންގެ އެއްބާރުލެއްވުމާ އެކު ކަރިކިއުލަމް އެކުލަވާލައި، އަދި ކިޔަަވައި ދިނުމުގެ ހުރިހާ ކަމެއް ވެސް ހަމަޖެއްސީ އެ ބޭފުޅުން ރުހިވަޑައިގަންނަވާ ގޮތަށް."
މި މަދަރުސާގައި ކިޔަވައި ދޭން ހަމަޖެއްސީ އަރަބި/އިންގްލިޝް މީޑިއަމަށެވެ. ނަމަވެސް ގްރޭޑް 6 އިން މަައްޗަށް އެޑިއުކޭޝަންގެ ސިލަބަހާ އެއްގޮތަށް ކިޔަވައި ދިނުމަށެވެ.
އަދި ކަރިކިއުލަމް ހެދީ މިސްރާއި ރާއްޖޭގެ ސިލަބަހަށް ބޭސްކޮށްގެންނެވެ. އަރަބި ސާނަވީ އަށް ކިޔަވަން ބޭނުންވާ ފޮތްތައް ކުދިންނަށް ހިލޭ ދެވުނެވެ.
މަދަރުސާގެ ކަންކަމަށް ހަރަދު ކުރުމަށާއި އިމާރާތް ކުރުމަށް ފަންޑް ހޯދަން ވިޔަފާވެރިންނާ މަޝްވަރާ ބައްދަލުވުންތައް ބޭއްވުނެވެ. ސީދާ އެހީ ދެއްވުމަށް ވަރަށް ބޮޑަށް ޝައުގުވެރިވީ 70 ވިޔަފާރިވެރިއެކެވެ.
އޭގެ ތެރެއިން ގޮވައިލާ ކޮންމެ ވަގުތަކު އަޑު އިވޭ ހިސާބުގައި ތިބި ބޭކަލުންގެ ތެރެއިން ރައީސަކަށް މ. ފޭދޫ، ތްރީ އޭ އަބްދުﷲ އަލީ އާއި ނައިބް ރައީސަކަށް ސ. ފޭދޫ އަޅިވިލާގެ އިބްރާހީމް ލަތީފް އާއި ސެކްރެޓަރީ ޝެއިހް ހުސައިން ރަޝީދު އަދި ހަޒާންދާރަކަށް މުހައްމަދު އަހުމަދުދީދީ ހިތަދޫ، ޕްލާޒާ، ވިޔަފާވެރިންގެ މަޝްވަރާ މަޖިލީހުގެ ގޮތުގައި ހަމަޖެއްސީ އެވެ.
މީގެ އިތުރަށް ވެސް ހެޑް މާސްޓަރުން، ޕްރިންސިޕަލުން ބައިވެރިކޮށްގެން އައްޑޫން، މި ސްކޫލަށް އެހީތެރިކަން ދެއްވާނެ މަޖިލީހެއް ވެސް ހެދި އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.