ބޮލީވުޑްގެ ކުޅަދާނަ ޑައިރެކްޓަރު ސަންޖޭ ލީލާ ބަންސާލީ "ބަޖިރާއޯ މަސްތާނީ" ގެ ނަމުގައި ފިލްމެއް ހަދަން އުޅޭ ވާހަކަ ދެކެވޭތާ މިހާރު ގާތްގަނޑަކަށް 20 އަހަރު ވެދާނެ އެވެ.
އެކަމަކު ބަންސާލީގެ މި ހުވެފެނީ ޕްރޮޖެކްޓްގެ މަސައްކަތް ފެށުމާ ހަމައަށް ދެވޭ ވަރެއް ނުވެ އެވެ. ސަބަބަކަށް ވަނީ ފިލްމުގެ ކާސްޓިން އަށް އަންނަމުންދާ ބޮޑެތި ބަދަލުތަކެވެ.
އެެންމެ ފުރަތަމަ މި ވާހަކަ ދެކެވެން ފެށި އިރު "ބަޖިރާއޯ މަސްތާނީ" ގެ ލީޑް ރޯލް ކުޅޭ ގޮތަށް އޮތީ ސަލްމާން ހާނާއި އައިޝްވާރިއާ ރާއީ އެވެ. އެއީ ބަންސާލޫ ގެނެސް ދިން ބްލޮކްބަސްޓާ "ހަމް ދިލް ދޭ ޗުކޭ ސަނަމް"ގެ ތަރިން ވެސް މެ އެވެ.
އެހެން ނަމަވެސް އެ ފިލްމު ޝޫޓް ކުރި ދުވަސްވަރަކީ ސަލްމާނާއި އޭޝް ރައްޓެހިވެގެން އުޅުނު ދުވަސްވަރަށްވި ނަމަވެސް، އޭގެ މާ ގިނަ ދުވަސްތަކެއް ނުވެ ދެ މީހުންގެ މެދުގައިި މައްސަލަ ޖެހި ގުޅުން ނިމުމަކަށް އައެވެ.
މި ސަބަބާ ހެދި ސަލްމާނާއި އޭޝްގެ ޖޯޑަކީ ދެން އަލުން އަނބުރާ އެކުގައި ސްްކްރީނަށް ގެނެވޭ ވަރުގެ ކަމަކަށް ނުވި އެވެ.
އޭގެ ފަހުން ދެން އަޑު އިވުނީ ކަރީނާ ކަޕޫރާއި ސަލްމާން ހިމަނައިގެން "ބަޖިރާއޯ މަސްތާނީ" ހަދަން އުުޅުނު ވާހަކަ އެވެ. އެކަމަކު އެ ވެސް ވީ ފްލޮޮޕް ވާހަކައަކަށެވެ.
ނަމަވެސް މި ފިލްމުގެ މަސައްކަތް ކޮންމެ ވެސް އެއް ދުވަހަކުން ކުރަން ބަންސާލީ އޮތީ ކަނޑަައަޅައިފަ އެވެ. އެހެންވެ ޓީވީ ސިލްސިލާތައް އުފެއްދުމަށް މަޝްހޫރު އެކްތާ ކަޕޫރު "ބަޖިރާއޯ މަސްތާނީ" ގެ ނަމުގައި ޓީވީ ސިލްސިލާއެއްް ގެންނަން ކުރި މަސައްކަތް ވެސް ބަންސާލީ އާ ހެދި ކާމިޔާބުވާ ގޮތެއް ނުވެ އެވެ.
މިދިޔަ އަހަރު ނިކުތް ބަންސާލީގެ ހިޓް ފިލްމް "ރާމް-ލީލާ" އަށް ފަހު، މިހާރު އަނެއްކާ ވެސް "ބަޖިރާއޯ މަސްތާނީ" ގެ ވާހަކަ ވަނީ ގަދަވެފަ އެވެ.
މީޑިއާ ރިޕޯޓްތައް ބުނާ ގޮތުން މި ފިލްމަށް އަޖޭ ދޭވްގަން ސޮއިކޮށްފި އެވެ. އެ ވާހަކަ ދެކެވޭތާ ދުވަސްކޮޅެއް ވެއްޖެ އެވެ. އަޖޭ ވަނީ "ހަމް ދިލް ދޭ ޗުކޭ ސަނަމް" ގައި ވެސް މުހިއްމު ރޯލެއް އަދާކޮށްފަ އެވެ.
"ބަޖިރާއޯ މަސްތާނީ" އަށް އަޖޭ އައި ވާހަކަތަކާ އެކު މިހާރު އަޑު އިވެނީ، ފިލްމުގެ ބަތަލާގެ ރޯލަށް ޕްރިޔަންކާ ޗޯޕްޅާ ސޮއި ކުރި ވާހަކަ އެވެ. ޕްރިޔަންކާ ވަނީ "ރާމް-ލީލާާ" ގެ އައިޓަމް ލަވައެއް ވެސް ކުޅެފަ އެވެ. އަދި އޭނާ މިހާރު އަންނަނީ ބަންސާލީ ޕްރޮޑިއުސް ކުރާ "މޭރީ ކޮމް" ގެ މަސައްކަތް ވެސް ކުރަމުންނެވެ.
މީޑިއާ ރިޕޯޓްތައް ބުނާ ގޮތުން އަޖޭ އާއި ޕްރިޔަންކާގެ ޖޯޑާ އެކު، ބަންސާލީ ދާދި އަވަހަށް "ބަޖިރާއޯ މަސްތާނީ" ގެ މަސައްކަތް ފަށާނެ އެވެ.
މި ފިލްމް ޕްރޮޑިއުސް ކުރަނީ އީރޯސް އިންޓަނެޝަނަލް އިންނެވެ.
ކޮންމެއަކަސް ބަންސާލީގެ ފޭނުން ތިބީ، އޭނާގެ ދުވަސްވީ ހުވަފެނީ ޕްރޮޖެކްޓް "ބަޖިރާއީ މަސްތާނީ" ބޮޑު ސްކްރީނަށް އަންނާނެ ދުވަހެއްގެ އިންތިޒާރުގަ އެވެ.