ބާސެލޯނާ އަށް ކުޅޭ އާޖެންޓީނާގެ ފޯވަޑް ލިއޮނަލް މެސީ ފީފާގެ މޮޅު ކުޅުންތެރިޔާގެ އެވޯޑް ކާމިޔާބު ކޮށްފިއެވެ. މިއީ މި އެވޯޑް މެސީ ކާމިޔާބު ކުރި 4 ވަނަ ފަހަރެވެ.
މެސީ ބުނީ 4 ވަނަ ފަހަރަށް މި އެވޯޑް ލިބުމަކީ ގަބޫލު ކުރަން ދަތި ކަމެއް ކަމަށާއި އޭނާއަށް ދުލުން އޭނާގެ އިހުސާސްތައް ބުނެދޭން ވެސް ހަމަ އެހާ ދަތި ކަމަށެވެ. އޭނާ ވަނީ އޭނާގެ ޓީމަށާއި އެކުވެރިން އަދި އާއިލާ އަށް ޝުކުރުވެރިވެފަ އެވެ.
މި މަގާމަށް މެސީ އާއި ވާދަ ކޮށްފައި ވަނީ ރެއާލް މެޑްރިޑްގެ ކްރިސްޓިއާނޯ ރޮނާލްޑޯ އާއި ބާސެލޯނާގެ އަންދްރެސް އިނިއެސްޓާ އެވެ. 2012 ވަނަ އަހަރު މެސީ ވަނީ 91 ގޯލް ޖަހައި އެއް ސީޒަނެއްގައި އެންމެ ގިނަ ގޯލް ޖެހި ކުޅުންތެރިޔާގެ މަގާމު ވެސް ހޯދާފަ އެވެ. މީގެ ކުރިން މި ރެކޯޑް އޮތީ 85 ގޯލާއި އެކު ޖަރާޑް މުލާ އަތުގައެވެ.