އިއްޔެ ނިމިގެންދިޔަ 18 ވަނަ މަޖްލިސް އިންތުހާބްގެ ވަގުތީ ނަތީޖާ ދައްކާ ގޮތުން އައްޑޫގެ މަޖްލިސް މެޖޯރިޓީ މި ވަނީ އިދިކޮޅު އެމްޑީޕީއަށް ލިބިފައެވެ.
ޖުމްލަ ހަތް ގޮނޑީގެ ތެރެއިން ފަސް ގޮނޑި މިހާތަނަށް އެމްޑީޕީން ވަނީ ކަށަވަރު ކޮށްފައެވެ. ވެރިކަން ކުރާ ޕީޕީއެމްއަށް ލިބުނީ އެންމެ ދެ ގޮނޑިއެވެ. ޕީޕީއެމްއިން ވާދަކުރި ހިތަދޫ މެދު ދާއިރާއާއި އުތުރު ދާއިރާގެ ގޮޑި ގެއްލި ލިބިފައިވަނީ ފޭދޫ އަދި ހުޅުދޫ ދާއިރާ އެކަންޏެވެ.
އާބާދީ އެންމެ ބޮޑު މާލެއާއި އައްޑޫން ޕީޕީއެމަށް މަޖްލިސް އައްލަބިއްޔަތު ނެތްއިރު، ޕީޕީއެމް ހިމެނޭ ކޯލިޝަނަށް ވަނީ މިހާތަނަށް މަޖްލިސްގެ މެޖޯރިޓީ ކަށަވަރުވެފަ އެވެ.
ނަމަވެސް މިހާތަނުން އުފެދޭ ސުވާލަކީ އައްޑޫގެ ތަރައްޤީއަށް މަޖްލިސް އައްލަބިއްޔަތު ނުލިބުމުގެ ހިޔަނި އެޅިދާނެބާވައެވެ؟. އައްޑޫގެ ތަރައްޤީއަށް ގިނަ ކަންތައް ތަކެއް ކޮށްދިނުމަށް މި ސަރުކާރުން ވަނީ ވައުދުވެފައެވެ. ހާއްސަކޮށް އަހަރު ނިމުމުގެ ކުރިން 100 އެނދުގެ ހޮސްޕިޓަލްގެ މަަސައްކަތް ފެށޭނެކަމަށް ވަނީ ވިދާޅުވެފައެވެ.
ގަން އިންޓަނޭޝަނަލް އެއާޕޯޓްގެ ބިން ހިއްކައި ނިމި އެއާޕޯޓްގެ މަސައްކަތް މިއަހަރު ނިމިގެންދާނެކަމަށް ވަނީ ވިދާޅުވެފައެވެ. އަންނަ ޖޫން މަހު ހިތަދޫގައި އިސްލާމިކް ސެންޓަރެއް ހުޅުވަން މަސައްކަތް ފަށާނެކަމަށް ވިދާޅުވެފައިވާ އިރު މިހާރު ހުރި ހިތަދޫ ރީޖަނަލް ހޮސްޕިޓަލަށް އިތުރު ތިއޭޓަރަކާއި ވޯޑެއް އިތުރު ކުރުމަށް ވަނީ ނިންމާފައެވެ.
އައްޑޫގެ ފެނާއި ނަރުދަމާ މިއަރު ސެޕްޓެމްބަރު މަހު ފެށި ނިމިގެންދާނެ ކަމަށް ވަނީ ވިދާޅުވެއެވެ.
މަޖްލިސް އިންތިހާބްގެ ވޯޓަށް ވަގުތު ކުޑަތަންވެފައިވަނިކޮށް ރައީސް ޔާމީން އައްޑޫއަށް ވަޑައިގެން ވަނީ މިކަންކަން އަލުން ކިޔާ ދެއްވާފައެވެ. އެކަމަކު މަޖްލިސް ގޮޑި އެދެމެދަށް ކޮންމެ ފަހަރަކުވެސް ގެންނަވައެވެ.
"އަޅުގަނޑު ގާތު މިއިންނެވި ހިޔަލީއަށް ވަރަށް ފަސޭހަވާނެ ކަންކަމުގައި ވިދާޅުވާން، އަޅުގަނޑުމެން ދެމީހުންނަކީ ވަރަށް ގިނަ ދުވަހު އެކު އުޅެފައިވާ ދެމީހުން، އެހެންވެ މިފަހަރު ހިޔަލީ ހޮވަން އެބަޖެހޭ" ހިތަދޫ މެދު ދާއިރާގެ އެންމެ ފަހު ކެމްޕެއިން ޖަލްސާގައި ރައީސް ޔާމީން ވިދާޅުވިއެވެ.
ރައީސް ޔާމީން މިގޮތަށް ވިދާޅުވެފައިވާއިރު ޑިފެންސް މިނިސްޓަރ މުހައްމަދު ނާޒިމް ވަނީ "ޖަޒްބާތުގައި" ޖެހިވަޑައިގެން އައްޑޫ ރައްޔިތުން ކައުންސިލުން އެއްކޮށް އެމްޑީޕީއަށް ދިނުމާއި ގުޅިގެން ފާޑު ވިދާޅުވެފައެވެ. އަދި ކައުންސިލް އުވާލަންޖެހިދާނެ ކަމުގެ އިންޒާރު ނާޒިމް ވަނީ އެރޭ ދެއްވާފައެވެ.
ނާޒިމް އެގޮތަށް "ޖަޒްބާތު"ގައި ވިދާޅުވެފައިވާއިރު އައްޑޫ ރައްޔިތުން އަނެއްކާވެސް މިވަނީ މަޖްލިސް އައްލަބިއްޔަތު އެމްޑީޕީ އާއި ހަވާލުކޮށްފައެވެ.
ހިޔަލީގެ ކެމްޕެއިން ޖަލްސާގައި ރައީސް ޔާމީން ވިދާޅުވީ އައްޑޫގެ ތަރައްޤީގެ ކަންކަން ކުރުމަށް އެކަށައެޅި ބަޖެޓައް އައްޑޫއަށް ނިސްބަތްވާ އެމްޑީޕީގެ އެއްވެސް މެމްބަރަކު ވޯޓު ދެއްވާފައި ނުވާކަމަށެވެ. އެހެންވެ ސަރުކާރަށް އައްޑޫގެ މަޖްލިސް މެޖޯރިޓީ ބޭނުންވާކަމަށެވެ.
މަޖްލިސް އިންތުހާބްގެ އެންމެ ފޯރިގަދަ ވަގުތު ސަރުކާރުން ވަނީ ހިތަދޫގެ މެދު ދާއިރާގެ ތިން މަގެއް ތާރު އަޅައިގެން ހަދަން ފަށާފައެވެ. ހިޔަލީ މަޖްލިސްއަށް "ހަލުވި ދުވެލީ"ގައި ދިޔުމަށް ހެދި މަގުގެ ސަބަބުން ވަކި ކުރިއެރުމެއް ނުލިބުނެވެ. ހިޔަލީ ވަނީ އިއްޔެގެ އިންތިހާބުން ފެއިލްވެފައެވެ. ރައްޔިތުންގެ ނިންމުން ދިޔައީ މުޅިން ސަރުކާރުން ބޭނުންވި ގޮތަކަށް ނޫނެވެ، އެހެންވެ ރައްޔިތުން ބޭނުންވާ ތަރައްޤީ ސަރުކާރުން ކަށަވަރުކޮށްދޭނެ ބާވައެވެ؟
ފަހަރުގައި ކޮންމެ ޖަލްސާއެއްގައި ސަރުކާރު "ޖަޒްބާތުގައި" ޖެހިވަޑައިގެން މިވާހަކަ ދައްކަފާނެއެވެ. އަދި ބަހަނާއަކަށް މަޖްލިސް ގޮޑި ވެދާނެއެވެ. އެކަމަކު މިފަހަރު އައްޑޫން ހޮވުނު 7 މެމްބަރުންވެސް ގުޅިގެން އައްޑޫގެ ތަރައްޤީއަށް މަސައްކަތް ކުރާނެކަން ވަރަށް ޔަޤީނެވެ. ހާއްސަކޮށް އެމްޑީޕީން ހޮވިފައި ތިއްބެވީ މިކަންކަމަށް ވަރަށް ފާރަވެރިވާނެ ހަރުދަނާ ބޭފުޅުންނެވެ. އަނެއް ކޮޅުން ޕީޕީއެމްގެ އިބްރާހިމް ދީދީ އާއި ޝާޑްވެސް އައްޑޫ ދޫކޮށްނުލާނެއެވެ.