(މާޗް 22، 2014 ވަނަ ދުވަހުގެ ބަޔާ ގުޅޭ)
ހިތަދޫ މާމެންދޫން ހޯދި ބިމެއްގައި މަދަރުސާ އިމާރާތް ކުރަން ފެށި އިރު، އަދި އެ ހިސާބުގައި މީހުން އާބާދުވާކަށް ނުފަށަ އެވެ. ކަރަންޓެއް ވެސް ނެތެވެ.
އެންމެ ފުރަތަމަ ބަގައިގައި ވެސް ގޯތީގެ ވަށާ އަށް ފޫަޓަށް ފާރު ރާނައި، ކްލާސްރޫމްތަކާއި އޮފީސް އިމާރާތެއް ބިނާ ކުރެވުނެވެ. އަދި މުދައްރިސުން ތިބޭނެ ދެ އިމާރާތާއި މިސްކިތެއް ވެސް ބިނާ ކުރެވުނެވެ. މި މިސްކިތަކީ 500 މީހުްނގެ ޖާގަ ހުރި މިސްކިތެކެވެ. މުންނާރަކާ އެކު ފާރުތަކުގެ ދެ ފަރާތު ތަޅުމުގައި މާބްލް ޖަހާފައިވާ ފެންވަރު ރަނގަޅު މިސްކިތެކެވެ.
މި މަސައްކަތަކަށް ބޭނުން ކުރި ހުރިހާ ސިމެންތިއެއް ހަދިޔާ ކުރެއްވީ ކޮލިގޭ އަލީ އުމަރު މަނިކެވެ. އެއީ އެ ހިސާބަށް ދިވެއްސަކު ދެއްވި އެންމެ ބޮޑު އެހީ އެވެ.
މި މަދަރުސާ ވަނީ މީހުން ދިރިއުޅޭ ހިސާބާ ތަންކޮޅެއް ދުރުގައި ކަމަށްވާތީ އެންމެ ފުރަތަމަ ވެސް ދަތުރުފަތުރާ މެދު ވިސްނާން ޖެހުނެވެ. އެ މައްސަލަ ހައްލު ކުރުމަށާއި ގުޅިފައިވާ އެހެން ރަށްރަށުގެ ކުދިންނަށް ވެސް ފުރުސަތު ދިނުމަށްޓަކަ އެވެ. އެކަމަށްޓަކައި ހެޔޮ އެދޭ ފަރާތްތަކުން ތިން ބަހާއި ވޭނެއް ހަދިޔާ ކުރި އެވެ. އަދި ދެ ސައިކަލް ވެސް ލިބުނެވެ.
އިމާރާތްކޮށް ނިންމުމަށް ފަހު، ކިޔަވައި ދޭން ފެށީ 1986/1987 ވަނަ އަހަރު އެވެ.
"އަޅުގަނޑުމެންނަށް ލިބުނީ ވަރަށް އާދައިގެ ކުދިންކޮޅެއް (ސްކޫލް ފަށައި ގަތުމަށް). ރަށުތެރޭގައި ހިނގައިގެން އެއްވެސް ސްކޫލަކަށް ނުގޮސް ތިބި ކުދިންނާ އެކު، މަދު ކުދިންކޮޅެއް ލިބުނީ. އިސާހިތަކު މިތަނުން ކިޔަވާ ކުދިންގެ ފެންވަރު ރަނގަޅުވުމާއި އަހުލާގް ރަނގަޅުވަމުންދާ ކަމަށް މީހުން ގަބޫލް ކުރި. އާންމުންގެ ތަރުހީބު ލިބެން ފެށި. އަޅުގަނޑުމެން މި މަދަރުސާ އިން ރަނގަޅު ނަތީޖާ ހޯދާ ކުދިން މާލެ އަށް ފޮނުވައި، މައުހަދުން ކިޔެވޭނެ ގޮތް ހަމަޖައްސައި ދިނިން، މަދަރުސާގެ ހަރަދުގައި. އަބްދުއްލަތީފުގެ ގޭގައި ކުދިން ބޭތިއްބީ އޭނާގެ ބެލެނިވެރިކަމުގައި. ވަކި ހިސާބަކުން އަޅުގަނުމެން މަދަރުސާ ހިންގުމަށް އައްޑު އާއި މާލޭގައި ހެދި މަޝްވަރާ މަޖިިލިސްތައް ރަނގަޅަކަށް ނުހިނގި. އެކަށީގެންވާ ގޮތަކަށް އެއްބާރުލުމެއް ނުލިބޭ. ވުމާ އެކު އެ ހިސާބުން ދެން އަމިއްލަ އަށް ކަންތައްތައް ނިންމަން ޖެހުނީ. އެހީ ހޯދުމުގެ މަސައްކަތް ވެސް ވިޔަފާވެރިން ގާތަށް ހިނގައިގެން ހަމަޖައްސަން ޖެހުނީ. މަދަރުސާ ހިންގުން ބިނާވެފައި އޮތީ ހިލޭ އެހީގެ މައްޗަށް ކަމަށްވާތީ މަހުން މަހަށް އެ ދެއްވާ އެއްޗެއް ދެއްވި ފަރާތްތަކާއި ހަ މަހުން ހަ މަހުން އެހީ ދެއްވި ފަރާތްތައް ވެސް ތިބި. ސަރުކާރުން ހުއްދަ ދެއްވުމަށް ފަހު ބޭރުގެ އެހީ ވެސް ލިބެން ފެށި. އިދުރީސް ދަތުރު ކުރެއްވީ ޑުބާއީއަށާއި ސައުތު އެފްރިކާ އަށް ފަންޑް ހޯދަން. އެތަންތަނުންނާއި ލަންޑަނުން ވެސް އެހީ ލިބުނު. އެކަމަކު މާ ބައިވަރު ފައިސާއެއް ނޫން. އެތަންތާނގަ ވެސް އާންމު ފަރާތްތަކާއި ކުދި ވިޔަފާވެރިން އެހީ ދިނީ. މަދުމަދުން ފައިސާ ލިބެމުން އައީ." (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.