އުމުރުން މިއަދު 27 އަހަރު ފުރުނު ކުޅަދާނަ ބަތަލާ ކަންގަނާ ރަނާވަތު ފިލްމެއްގައި 14 އަހަރުގެ އަންހެން ކުއްޖެއްގެ މަންމައެއްގެ ރޯލް ކުޅެން އެެއްބަސްވެއްޖެ އެވެ.
އެ ފިލްމަކީ ސަސްޕެންސުން ފުރިފައިވާ "ކަހާނީ" ހަދައިގެން ގިނަ ބައެއްގެ ސަމާލުކަން ހޯދި ސުޖޯއި ގޯޝްގެ އާ ފިލްމް "ދުރްގާ ރާނީ ސިންގް" އެވެ.
އެ ފިލްމުގައި ކަންގަނާ ފެނިގެން ދާނީ އުމުރުން 35 އަހަރުވެފައިވާ މަންމައެއްގެ ރޯލުންނެވެ. ފިލްމުގައި ކަންގަނާގެ 14 އަހަރުގެ އަންހެން ކުއްޖާއަކީ ހަށިގަނޑުން ވާގިނެތިފައިވާ ކުއްޖެކެވެ.
މި ފިލްމުގެ ވާހަކަ އާ ބެހޭ މާ ބޮޑު ތަފުސީލެއް އަދި މިހާތަނަށް ލިބިފައި ނެތް ނަމަވެސް، ވިދިޔާ ބާލަން ލީޑް ރޯލް ކުޅުނު "ކަހާނީ" ފަދަ ހައިރާންކަމުން ފުރިގެންވާ ފަދަ ފިލްމަކަށް "ދުރްގާ ރާނީ ސިންގް" ވެސް ވާނެ ކަމަށް ގިނަ ބަޔަކު ލަފާ ކުރެ އެވެ.
މި ފިލްމުގެ ޝޫޓިން ވަރަށް އަވަހަށް ފެށުމަށް ހަމަޖެހިފައިވާ އިރު، ކަންގަނާގެ އެންމެ ފަހުގެ ފިލްމް "ކްއީން" ވެސް ވަނީ ބޮޑު ތަރުހީބެއް ލިބިފަ އެވެ. އަދި އެ ފިލްމުގައި އޭނާ ދައްކުވައި ދިން މޮޅު އެކްޓިން އަށް ގިނަ ބަޔަކު ވަނީ ތައުރީފްކޮށްފަ އެވެ.
ކަންގަނާގެ ކުރިއަށް ހުރި ފިލްމުތަކުގެ ތެރެއިން ދެން އެންމެ އަވަހަށް ރިލީޒް ވާނީ ވެސް އޭނާ، އާދަޔާހިލާފު ރޯލަކުން ފެންނަ "ރިވޯލްވާ ރާނީ" އެވެ.